ദോഹ:സൗത്ത് അൽ ദുഹൈൽ, ഉമ്മു ലെഖ്ബ പ്രദേശങ്ങളിൽ നടന്നുവരുന്ന റോഡ്, അടിസ്ഥാന സൗകര്യ വികസന പ്രവർത്തനങ്ങൾ 2027-ന്റെ മൂന്നാം പാദത്തോടെ പൂർത്തിയാകുമെന്ന് പൊതുമരാമത്ത് അതോറിറ്റി (അശ്ഗാൽ) അറിയിച്ചു. അൽ-ഷർഖ് പത്രത്തിന് നൽകിയ മറുപടിയിലാണ് അതോറിറ്റി ഇക്കാര്യം വ്യക്തമാക്കിയത്.2025 ഏപ്രിലിൽ 50 ശതമാനത്തിലധികം പൂർത്തിയായ ഈ പദ്ധതിയുടെ ബാക്കി പണികൾ നിലവിൽ വേഗത്തിൽ നടന്നു വരികയാണ്. ശേഷിക്കുന്ന ജോലികളിൽ 25 ശതമാനം കൂടി ഇതിനകം പൂർത്തിയായിട്ടുണ്ട്.
നിർമ്മാണ പ്രവർത്തനങ്ങൾ മൂലം പ്രദേശവാസികൾക്കും സന്ദർശകർക്കും ഉണ്ടാകുന്ന ബുദ്ധിമുട്ടുകൾ അതോറിറ്റി മനസ്സിലാക്കുന്നു. ജനങ്ങൾ കാണിക്കുന്ന ക്ഷമയ്ക്കും സഹകരണത്തിനും അശ്ഗാൽ നന്ദി അറിയിച്ചു.നിർമ്മാണ പ്രവർത്തനങ്ങൾക്കിടയിൽ പൊതുജനങ്ങളുടെ സുരക്ഷ ഉറപ്പാക്കാനും ബുദ്ധിമുട്ടുകൾ കുറയ്ക്കാനും ആവശ്യമായ എല്ലാ മുൻകരുതലുകളും അതോറിറ്റി സ്വീകരിച്ചിട്ടുണ്ട്.ഖത്തർ നാഷണൽ വിഷൻ 2030-ന്റെ ഭാഗമായി, നഗരവളർച്ചയ്ക്ക് അനുസൃതമായി റോഡുകളുടെയും ഡ്രെയിനേജ് ശൃംഖലകളുടെയും നിലവാരം ഉയർത്തുക, അതുവഴി ജനങ്ങളുടെ ജീവിതനിലവാരം മെച്ചപ്പെടുത്തുക എന്നതാണ് ഈ പദ്ധതിയുടെ പ്രധാന ലക്ഷ്യം.
നിർമ്മാണ പ്രവർത്തനങ്ങൾ പൂർത്തിയാകുന്നതോടെ ഈ പ്രദേശങ്ങളിലെ ഗതാഗത സൗകര്യങ്ങളും അടിസ്ഥാന സൗകര്യങ്ങളും മികച്ച നിലവാരത്തിലേക്ക് ഉയരുമെന്നും അശ്ഗാൽ കൂട്ടിച്ചേർത്തു.
