ദോഹ: സൂഖ് വാഖിഫിലെ ഈസ്റ്റേൺ സ്‌ക്വയറിൽ തുടരുന്ന 11-ാമത് പ്രാദേശിക ഈന്തപ്പഴ മേള (Local Dates Festival) മികച്ച ജനപങ്കാളിത്തത്തോടെ മുന്നേറുന്നു. മേള ആരംഭിച്ചതിനു ശേഷം ഇതുവരെ 61,000-ത്തോളം സന്ദർശകരാണ് എത്തിയത്. മേളയിലുടനീളം 1,07,999 കിലോഗ്രാമിലധികം വിവിധ ഇനം ഈന്തപ്പഴങ്ങൾ വിറ്റഴിഞ്ഞതായി സംഘാടകർ അറിയിച്ചു.
ഈന്തപ്പഴ ഇനങ്ങളിൽ ഏറ്റവും കൂടുതൽ ആവശ്യക്കാരുണ്ടായിരുന്നത് ‘ഖലാസ്’ (Khalas) ഇനത്തിനായിരുന്നു. 44,247 കിലോഗ്രാം ഖലാസ് ഈന്തപ്പഴമാണ് ഇതുവരെ വിറ്റത്. 22,780 കിലോഗ്രാം വിൽപ്പനയോടെ ‘ഷിഷി’ (Shishi) രണ്ടാം സ്ഥാനത്തും, 21,118 കിലോഗ്രാമുമായി ‘ഖുനൈസി’ (Khunaizi) മൂന്നാം സ്ഥാനത്തുമുണ്ട്. കൂടാതെ 11,892 കിലോഗ്രാം ‘ബർഹി’ (Barhi) ഇനവും, മറ്റ് വൈവിധ്യമാർന്ന ഇനങ്ങളിൽപ്പെട്ട 7,962 കിലോഗ്രാം ഈന്തപ്പഴവും മേളയിലൂടെ വിറ്റഴിക്കപ്പെട്ടു.
ഖത്തറിലെ പ്രാദേശിക കാർഷിക രംഗത്തെ കരുത്തുറ്റതാക്കുന്ന ഈ മേളയിൽ 114 പ്രാദേശിക ഈന്തപ്പഴ ഫാമുകളും 11 പഴവർഗ്ഗ ഫാമുകളും പങ്കാളികളാകുന്നുണ്ട്.
ഞായർ മുതൽ വ്യാഴം വരെയുള്ള പ്രവൃത്തിദിനങ്ങളിൽ വൈകുന്നേരം 4:00 മണി മുതൽ രാത്രി 9:00 മണി വരെയും, വാരാന്ത്യങ്ങളിൽ രാത്രി 10:00 മണി വരെയുമാണ് മേളയിലേക്ക് പ്രവേശനം.ഓഗസ്റ്റ് 10 വരെ മേള തുടർന്നു പ്രവർത്തിക്കും.
