ദോഹ: ഖത്തറിലെ നിലമ്പൂർ പ്രവാസികളുടെ കൂട്ടായ്മയായ 'ഖത്തർ-നിലമ്പൂർ കൂട്ടം' പന്ത്രണ്ടാം വാർഷികാഘോഷത്തിന്റെ ഭാഗമായി സംഘടിപ്പിക്കുന്ന "നിലമ്പൂർ പാട്ടുത്സവം - സീസൺ 12" ഫെബ്രുവരി 10 ചൊവ്വാഴ്ച അരങ്ങേറും. ഖത്തർ ദേശീയ കായിക ദിനത്തോടനുബന്ധിച്ച് വൈകുന്നേരം 4 മണി മുതൽ ഐസിസി (ICC) അശോക ഹാളിലാണ് പരിപാടി നടക്കുന്നത്.
നിലമ്പൂരിന്റെ കലാ-സാഹിത്യ-സാംസ്കാരിക പൈതൃകം വിളിച്ചോതുന്ന വൈവിധ്യമാർന്ന കലാപരിപാടികളാണ് ഇത്തവണയും അണിയറയിൽ ഒരുങ്ങുന്നത്. ഒരു പതിറ്റാണ്ടിലേറെയായി ഖത്തറിലെ പ്രവാസി സമൂഹത്തിനിടയിൽ സജീവമായ കൂട്ടായ്മ, നാടിന്റെ ഒത്തുകൂടലിലൂടെ ശ്രദ്ധേയമായ ചരിത്രമാണ് സൃഷ്ടിച്ചിട്ടുള്ളത്.നിലമ്പൂർ എംഎൽഎ ആര്യാടൻ ഷൗക്കത്ത്, പ്രശസ്ത പിന്നണി ഗായികയും സരിഗമപ ഫെയിമുമായ കീർത്തന, പ്രശസ്ത ചലച്ചിത്ര താരങ്ങൾ, സാംസ്കാരിക നായകർ എന്നിവർ ആഘോഷങ്ങളിൽ അതിഥികളായെത്തും. നാട്ടിലെയും ഖത്തറിലെയും പ്രമുഖ കലാപ്രതിഭകൾ അവതരിപ്പിക്കുന്ന വിവിധ പരിപാടികൾ ആഘോഷത്തിന് മാറ്റുകൂട്ടും.
നിലമ്പൂർ പാട്ടുത്സവത്തിന്റെ പന്ത്രണ്ടാം പതിപ്പിലേക്ക് ഖത്തറിലെ മുഴുവൻ പ്രവാസി സുഹൃത്തുക്കളെയും സ്വാഗതം ചെയ്യുന്നതായി സംഘാടകർ അറിയിച്ചു.
