തിരുവനന്തപുരം: സംസ്ഥാനത്തെ രൂക്ഷമായ വൈദ്യുതി പ്രതിസന്ധിക്കും രാത്രികാല ലോഡ്‌ഷെഡിംഗ് ഭീഷണിക്കും പരിഹാരമായി സോളാർ ഊർജ്ജ സംഭരണ സംവിധാനങ്ങൾ (Battery Energy Storage System - BESS) വ്യാപകമാക്കാൻ സർക്കാരും കെ.എസ്.ഇ.ബിയും നീക്കം വേഗത്തിലാക്കുന്നു.
​പകൽ സമയത്ത് പുരപ്പുറ സോളാർ അടക്കമുള്ള മാർഗ്ഗങ്ങളിലൂടെ ഉത്പാദിപ്പിക്കുന്ന അധിക വൈദ്യുതി, ആവശ്യത്തിന് സ്റ്റോറേജ് സൗകര്യങ്ങളില്ലാത്തതിനാൽ രാത്രികാലങ്ങളിൽ പ്രയോജനപ്പെടുത്താൻ സാധിക്കുന്നില്ല. ഇതിന് ശാശ്വത പരിഹാരമെന്ന നിലയിലാണ് കൂടുതൽ 'ബെസ്' (BESS) പ്ലാന്റുകൾ സ്ഥാപിക്കാൻ പദ്ധതിയിടുന്നത്.

പ്രധാന പദ്ധതികളും നിർമ്മാണ കേന്ദ്രങ്ങളും:

​നിലവിൽ 3,000 കോടി മുതൽമുടക്കിൽ 6 പ്രധാന കേന്ദ്രങ്ങളിലായി 'ബെസ്' നിർമ്മാണം പുരോഗമിക്കുകയാണ്:
​മൈലാട്ടി: 125 മെഗാവാട്ട്  
​മുള്ളേരിയ: 15 മെഗാവാട്ട്  
​ശ്രീകണ്ഠപുരം: 40 മെഗാവാട്ട്  
​അരീക്കോട്: 30 മെഗാവാട്ട്  
​പോത്തൻകോട്: 40 മെഗാവാട്ട്  
​ബ്രഹ്മപുരം: 250 മെഗാവാട്ട്  
​കൂടുതൽ വിപുലീകരണം:
കെ.എസ്.ഇ.ബിയുടെ അധീനതയിലുള്ള വിവിധ ജില്ലകളിലെ ഭൂമിയും കോഴിക്കോട് ഡീസൽ നിലയത്തിന്റെ ഭൂമിയും ഇതിനായി പ്രയോജനപ്പെടുത്തും. എല്ലാ പഞ്ചായത്ത് കേന്ദ്രങ്ങളിലും ജലാശയങ്ങളിലെ ഫ്ലോട്ടിംഗ് സോളാർ പ്ലാന്റുകളിലും സ്റ്റോറേജ് സംവിധാനങ്ങൾ വ്യാപിപ്പിക്കാനാണ് ലക്ഷ്യം.
  
 കേന്ദ്ര സഹായവും മറ്റ് നീക്കങ്ങളും:

​വയബിലിറ്റി ഗ്യാപ് ഫണ്ട് : കേന്ദ്ര ഊർജ്ജ മന്ത്രാലയത്തിന്റെ സാമ്പത്തിക സഹായം  പ്രയോജനപ്പെടുത്തി പരമാവധി പദ്ധതികൾ വേഗത്തിൽ പൂർത്തിയാക്കും.  
​എൻ.ടി.പി.സി പങ്കാളിത്തം: കായംകുളം താപനിലയത്തോടനുബന്ധിച്ച് എൻ.ടി.പി.സി സ്ഥാപിക്കുന്ന ബെസ്  പദ്ധതി സംബന്ധിച്ച ചർച്ചകൾ അവസാനഘട്ടത്തിലാണ്.
​ഹൈഡ്രോ ഇലക്ട്രിക് പദ്ധതികളുടെ വിപുലീകരണത്തിലെ പ്രായോഗിക ബുദ്ധിമുട്ടുകളും ആണവനിലയങ്ങളെക്കുറിച്ചുള്ള ചർച്ചകളിലെ അനിശ്ചിതത്വവും കണക്കിലെടുത്താണ് വേഗത്തിൽ നടപ്പാക്കാൻ കഴിയുന്ന സോളാർ-ബാറ്ററി സംഭരണ രീതിക്ക് മുൻഗണന നൽകുന്നത്.

സോളാർ ഉത്പാദനം ഒറ്റനോട്ടത്തിൽ:

​ആകെ സോളാർ വൈദ്യുതി ഉത്പാദനം: 2,404.20 മെഗാവാട്ട്
​പി.എം സൂര്യഘർ പദ്ധതി വഴി: 2,037 മെഗാവാട്ട്
​ഗ്രൗണ്ട് മൗണ്ടഡ് സോളാർ: 342.27 മെഗാവാട്ട്  
​ഓഫ് ഗ്രിഡ് സോളാർ: 24.93 മെഗാവാട്ട്