കൊച്ചി: പ്രശസ്ത എഴുത്തുകാരി അരുന്ധതി റോയിയുടെ പുതിയ പുസ്തകമായ 'Mother Mary Comes To Me'-യുടെ കവറിലെ ബീഡി വലിക്കുന്ന ചിത്രം വിവാദത്തിൽ. നിയമപരമായ ആരോഗ്യ മുന്നറിയിപ്പ് ഇല്ലാതെ പുസ്തകം വിൽക്കുന്നത് ചോദ്യം ചെയ്തുള്ള പൊതുതാൽപ്പര്യ ഹർജിയിൽ (PIL) കേരള ഹൈക്കോടതി വിധി പറയാൻ മാറ്റി. ഒക്ടോബർ 13 തിങ്കളാഴ്ച വിധി പറയുമെന്നാണ് അറിയിച്ചിരിക്കുന്നത്.
​നിയമപ്രകാരമുള്ള മുന്നറിയിപ്പ് ഉൾപ്പെടുത്തുന്നത് വരെ പുസ്തകത്തിന്റെ വിൽപ്പന നിർത്തിവെക്കണമെന്നാവശ്യപ്പെട്ട് ഒരു അഭിഭാഷകനാണ് ഹൈക്കോടതിയെ സമീപിച്ചത്. കവറിലെ ചിത്രം സിഗരറ്റ്സ് ആൻഡ് അദർ ടുബാക്കോ പ്രോഡക്ട്സ് ആക്ട് (COTPA)-ലെ സെക്ഷൻ 5 ലംഘിക്കുന്നതായും, ഇത് പുകയില ഉൽപ്പന്നങ്ങളുടെ ഉപയോഗം പ്രോത്സാഹിപ്പിക്കുന്നതിന് തുല്യമാണെന്നും ഹർജിക്കാരൻ വാദിച്ചു.

​വാദം കേൾക്കുന്നതിനിടെ, ഈ വിഷയത്തിൽ COTPA ആക്ട് പ്രകാരം രൂപീകരിച്ചിട്ടുള്ള പ്രത്യേക സമിതിയെ സമീപിക്കാമെന്ന് ഹൈക്കോടതി ഡിവിഷൻ ബെഞ്ച് (ചീഫ് ജസ്റ്റിസ് നിതിൻ ജാംദാർ, ജസ്റ്റിസ് ബസന്ത് ബാലാജി) നിരീക്ഷിച്ചു. ഹർജിക്കാരൻ കോടതിയെ ഒരു "പ്രസംഗിക്കാനുള്ള വേദിയായി" ഉപയോഗിക്കരുതെന്നും കോടതി അഭിപ്രായപ്പെട്ടു.

​അതേസമയം, ഇത്തരം പരാതികൾ പരിഹരിക്കാൻ COTPA പ്രകാരം സ്റ്റിയറിംഗ് കമ്മിറ്റിയും ഓൺലൈൻ പരാതി പോർട്ടലും നിലവിലുണ്ടെന്ന് കേന്ദ്ര സർക്കാരിന് വേണ്ടി ഹാജരായ അഭിഭാഷക കൗൺസിൽ കോടതിയെ അറിയിച്ചു. നിയമപരമായ ഈ സംവിധാനങ്ങളെ സമീപിക്കാതെ നേരിട്ട് ഹൈക്കോടതിയെ സമീപിച്ചതിനെ പ്രതിഭാഗം എതിർത്തു.
​എല്ലാ കക്ഷികളുടെയും വാദങ്ങൾ പൂർത്തിയായതിനെ തുടർന്ന്, കേസ് (രാജസിംഹൻ v. യൂണിയൻ ഓഫ് ഇന്ത്യ, WP (PIL) 117/2025) വിധി പറയാനായി മാറ്റി.