തിരുവനന്തപുരം: സ്പൈനൽ മസ്‌കുലാർ അട്രോഫി (എസ്.എം.എ.) ചികിത്സയ്ക്കുള്ള മരുന്നുമായി ബന്ധപ്പെട്ട വിവാദത്തിൽ ആരോഗ്യമന്ത്രി കെ. മുരളീധരനോട് ആറ് ചോദ്യങ്ങളുമായി സി.പി.എം. സംസ്ഥാന സെക്രട്ടറി എം.വി. ഗോവിന്ദൻ. വിഷയത്തിൽ മന്ത്രി വ്യക്തമായ വിശദീകരണം നൽകുന്നില്ലെന്ന് അദ്ദേഹം ആരോപിച്ചു. ക്ലിനിക്കൽ പരിശോധനയ്ക്കു മാത്രമുള്ള മരുന്നുകൾ ആശുപത്രികളിൽ എത്തിയത് എങ്ങനെയെന്നും, കുഴപ്പമില്ലെന്ന് പറയുന്ന മരുന്നുകൾ പിന്നീട് പിൻവലിക്കേണ്ടിവന്നത് എന്തുകൊണ്ടാണെന്നും അദ്ദേഹം ചോദിച്ചു.

മെഡിക്കൽ സർവീസസ് കോർപ്പറേഷൻ വാങ്ങി ആശുപത്രികളിലെത്തിച്ച മരുന്നുകളിൽ 'ഫോർ ക്ലിനിക്കൽ ട്രയൽസ് ഒൺലി' എന്ന ലേബൽ എങ്ങനെ വന്നുവെന്നതാണ് എം.വി. ഗോവിന്ദൻ ഉന്നയിച്ച പ്രധാന ചോദ്യം. മരുന്നിന് പ്രശ്നങ്ങളില്ലെന്നാണ് ആരോഗ്യമന്ത്രി വിശദീകരിക്കുന്നതെങ്കിൽ, അത് പിൻവലിക്കാനുള്ള സാഹചര്യം എന്തായിരുന്നുവെന്നും അദ്ദേഹം ആരാഞ്ഞു.

മരുന്നിന്റെ ബയോ ഇക്വലൻസ് പരിശോധന പൂർത്തിയായിട്ടില്ലെന്ന് സർക്കാർ വിദഗ്ധ സമിതി അറിയിച്ചിട്ടുണ്ടോയെന്നും അദ്ദേഹം ചോദിച്ചു. മരുന്നിന്റെ ക്ലിനിക്കൽ പരിശോധന പൂർത്തിയായിട്ടുണ്ടോ, മെഡിക്കൽ സർവീസസ് കോർപ്പറേഷൻ ഗുണനിലവാര പരിശോധന നടത്തിയിട്ടുണ്ടോ എന്നീ കാര്യങ്ങളിലും വ്യക്തത വരുത്തണമെന്ന് എം.വി. ഗോവിന്ദൻ ആവശ്യപ്പെട്ടു.

സർക്കാർ തീരുമാനിച്ച സമയക്രമത്തേക്കാൾ രണ്ടുമാസം വൈകി ടെൻഡർ നടപടികൾ ആരംഭിക്കേണ്ടിവന്നതിന്റെ കാരണവും വ്യക്തമാക്കണമെന്നാണ് അദ്ദേഹത്തിന്റെ ആവശ്യം. കുട്ടികൾക്ക് മരുന്ന് നൽകിയതിനെത്തുടർന്ന് ഏതെങ്കിലും തരത്തിലുള്ള പാർശ്വഫലങ്ങൾ ഉണ്ടായാൽ അതിന്റെ ഉത്തരവാദിത്വം ആര് ഏറ്റെടുക്കുമെന്ന ചോദ്യവും അദ്ദേഹം ഉയർത്തി.

എസ്.എം.എ. ബാധിച്ച കുട്ടികളുടെ ചികിത്സയുമായി ബന്ധപ്പെട്ട് നിർണായകമായ ഈ വിഷയത്തിൽ മരുന്നിന്റെ സുരക്ഷ, ഗുണനിലവാരം, പരിശോധനാ നടപടികൾ എന്നിവ സംബന്ധിച്ച് വ്യക്തമായ വിശദീകരണം വേണമെന്ന നിലപാടിലാണ് എം.വി. ഗോവിന്ദൻ.

എം വി ഗോവിന്ദന്‍റെ 6 ചോദ്യങ്ങൾ

1 ക്ലിനിക്കൽ ടെസ്റ്റിന് ഉള്ള മരുന്നുകൾ എങ്ങനെ ആശുപത്രിയിലെത്തി?

2 കുഴപ്പമില്ലെങ്കിൽ എന്തിനാണ് മരുന്ന് പിൻവലിച്ചത്?

3 ഈ മരുന്നിന്‍റെ ക്ലിനിക്കിൽ പരിശോധന പൂർത്തിയായിട്ടുണ്ടോ? 

4 മെഡിക്കൽ സർവീസ് കോർപ്പറേഷൻ ഗുണപരിശോധന നടത്തിയിട്ടുണ്ടോ?

5 ടെൻഡർ വിളിക്കാൻ കാലതാമസം വന്നത് എന്തുകൊണ്ട്, ഒരു കമ്പനിക്ക് വേണ്ടി മാത്രം പ്രത്യേക ഇളവ് നൽകിയത് എന്തിന്?

6 കുട്ടികൾക്ക് പാർശ്വഫലം ഉണ്ടായാൽ ആര് ഉത്തരവാദിത്വം ഏറ്റെടുക്കും?