ദോഹ: നാഷണൽ സ്‌പോർട്സ് ഡേയ്ക്ക് മുന്നോടിയായി, ആദ്യമായാണ് ഓൾഡ് ദോഹ പോർട്ട് ‘Move’ എന്ന പേരിൽ ഒരു സമഗ്ര സ്പോർട്സ് ഫെസ്റ്റിവൽ പ്രഖ്യാപിക്കുന്നത്. ആരോഗ്യബോധവൽക്കരണവും ശാരീരിക പ്രവർത്തനവും ഒരുമിച്ച് ഉൾക്കൊള്ളുന്ന ഈ കായികോത്സവം ഫെബ്രുവരി 5 മുതൽ 10 വരെ മിനാ പാർക്കിൽ നടക്കും.
ഖത്തറിലെ കായിക മത്സരങ്ങളും ഇവന്റുകളും സംഘടിപ്പിക്കുന്ന NO LIMITS എന്ന സ്ഥാപനത്തിന്റെ സഹകരണത്തോടെയാണ് ഫെസ്റ്റിവൽ സംഘടിപ്പിക്കുന്നത്. നാഷണൽ സ്‌പോർട്സ് ഡേയ്ക്ക് മുന്നോടിയായ വാരാന്ത്യത്തിൽ ആരംഭിക്കുന്ന പരിപാടി, അന്നുതന്നെ സമാപിക്കും.
ഖത്തരി പ്രയോഗഭാഷയിൽ വ്യാപകമായി ഉപയോഗിക്കുന്ന ‘തരയ്യദ് (Tarayyad)’ എന്ന വാക്കിൽ നിന്നാണ് ‘മൂവ്’ എന്ന ഫെസ്റ്റിവലിന് പ്രചോദനം. ദൈനംദിന ജീവിതത്തിൽ സ്വാഭാവികമായി ഉൾപ്പെട്ടിരിക്കുന്ന ശാരീരിക ചലനത്തെ സൂചിപ്പിക്കുന്ന ഈ പദം, ആരോഗ്യമാർന്ന സജീവ ജീവിതശൈലിയിലേക്ക് സമൂഹത്തെ ക്ഷണിക്കുന്നതിന്റെ പ്രതീകമാണ്. ക്ലാസിക്കൽ അറബിക് ഭാഷയിലും വേരുകളുള്ള ഈ പദം, ഫെസ്റ്റിവലിന് സാംസ്‌കാരികമായ ആധികാരികതയും നൽകുന്നു.
ആറ് ദിവസങ്ങളിലായി നടക്കുന്ന ഫെസ്റ്റിവലിൽ ഏഴ് പ്രധാന സോണുകൾ ഉൾപ്പെടും. വിവിധ പ്രായക്കാർക്കും താൽപര്യങ്ങൾക്കും അനുയോജ്യമായ അനുഭവങ്ങളാണ് ഒരുക്കുന്നത്.
ആരോഗ്യം, ഫിറ്റ്നസ്, സജീവ ജീവിതശൈലി എന്നിവയെ കേന്ദ്രീകരിച്ച് കായികതാരങ്ങളും വിദഗ്ധരും പങ്കെടുക്കുന്ന പാനൽ ചർച്ചകൾ ദിവസേന നടക്കും. കൂടാതെ, ഫിറ്റ്നസ് ക്ലാസുകൾ, കുട്ടികൾക്കായുള്ള പ്രത്യേക ആക്ടിവിറ്റി ഏരിയ, റിക്കവറി–റിലാക്സേഷൻ സോണുകൾ എന്നിവയും ഉണ്ടായിരിക്കും.
ഫെബ്രുവരി 7-ന് (ശനിയാഴ്ച) മിനാ കോർണീഷിലൂടെ നടക്കുന്ന പ്രത്യേക റണ്ണിംഗ് റേസ് ഫെസ്റ്റിവലിന്റെ പ്രധാന ആകർഷണങ്ങളിലൊന്നായിരിക്കും. മത്സരത്തിൽ പങ്കെടുക്കാൻ ഓൾഡ് ദോഹ പോർട്ടിന്റെയും NO LIMITS-ിന്റെയും സോഷ്യൽ മീഡിയ പ്ലാറ്റ്‌ഫോമുകളിലൂടെ രജിസ്റ്റർ ചെയ്യാം.
കായിക ഉൽപ്പന്നങ്ങൾ വിൽക്കുന്ന റീട്ടെയിൽ സ്റ്റാളുകൾ, ആരോഗ്യകരമായ ഭക്ഷണം നൽകുന്ന റെസ്റ്റോറന്റുകളും കഫേകളും ഫെസ്റ്റിവലിൽ സജ്ജമാകും. ഇതിലൂടെ നാഷണൽ സ്‌പോർട്സ് ഡേയ്ക്ക് മുന്നോടിയായി ജീവിതശൈലി മാറ്റങ്ങൾക്ക് പ്രചോദനം നൽകുകയാണ് ലക്ഷ്യമെന്ന് ഓൾഡ് ദോഹ പോർട്ട് സിഇഒ എഞ്ചിനീയർ മുഹമ്മദ് അബ്ദുള്ള അൽ മുല്ല പറഞ്ഞു.