​തിരുവനന്തപുരം: ഫുട്ബോൾ ഇതിഹാസം ലയണൽ മെസിയെ കേരളത്തിൽ കൊണ്ടുവരാമെന്ന വാഗ്ദാനത്തിന്റെ മറവിൽ 549.22 കോടി രൂപയുടെ വൻ സാമ്പത്തിക തട്ടിപ്പ് നടന്നതായി ജി.എസ്.ടി പ്രത്യേക അന്വേഷണ സംഘത്തിന്റെ (എസ്‌.ഐ.ടി) കണ്ടെത്തൽ. പ്രധാന സ്പോൺസർമാരായ റിപ്പോർട്ടർ ബ്രോഡ്കാസ്റ്റിംഗ് കമ്പനിയുടെ നേതൃത്വത്തിലാണ് ഈ തട്ടിപ്പ് അരങ്ങേറിയത്. കള്ളപ്പണം വെളുപ്പിക്കൽ, അനധികൃത വിദേശനാണ്യ ഇടപാടുകൾ, രഹസ്യ ഡോളർ അക്കൗണ്ട് ഇടപാടുകൾ, ആദായനികുതി വെട്ടിപ്പ് തുടങ്ങിയ ഗുരുതര ക്രമക്കേടുകളാണ് അന്വേഷണത്തിൽ കണ്ടെത്തിയിട്ടുള്ളത്.
​പ്രധാന കണ്ടെത്തലുകൾ:
​ഉറവിടമില്ലാത്ത പണം: സമാഹരിച്ച 549.22 കോടിയിൽ 212.75 കോടി രൂപ മാത്രമാണ് ബാങ്കിതര ധനകാര്യ സ്ഥാപനങ്ങളിൽ നിന്നുള്ള വായ്പ. ബാക്കി വന്ന 336.47 കോടി രൂപയുടെ ഉറവിടം വ്യക്തമല്ല. ഇതിൽ 234.31 കോടി രൂപ കള്ളപ്പണമാണെന്നാണ് കണ്ടെത്തൽ.
​രഹസ്യ അക്കൗണ്ടുകൾ: ഔദ്യോഗിക രേഖകളിൽ ഒരിടത്തും പരാമർശിക്കാത്ത ആറ് രഹസ്യ അക്കൗണ്ടുകൾ വഴിയാണ് മുഴുവൻ തുകയും സ്പോൺസറുടെ മെയിൻ അക്കൗണ്ടിലേക്ക് മാറ്റിയത്.
​സർക്കാരിന് നികുതി നഷ്ടം: ജി.എസ്.ടി വെട്ടിപ്പും സ്റ്റേഡിയം നവീകരണത്തിന്റെ പേരിൽ നടത്തിയ തട്ടിപ്പും ഉൾപ്പെടെ സംസ്ഥാന സർക്കാരിന് ആകെ 25.78 കോടി രൂപയുടെ നികുതി നഷ്ടമുണ്ടായി.
​കേന്ദ്ര ഏജൻസികളുടെ അന്വേഷണത്തിന് ശുപാർശ
​ഇതുമായി ബന്ധപ്പെട്ട അന്തിമ റിപ്പോർട്ട് എസ്‌.ഐ.ടി സർക്കാരിന് കൈമാറി. എൻഫോഴ്‌സ്‌മെന്റ് ഡയറക്ടറേറ്റ് (ഇ.ഡി), ഇൻകം ടാക്സ് ഇൻവെസ്റ്റിഗേഷൻ വിംഗ്, ആർ.ബി.ഐയുടെ ഫെമ വിഭാഗം, സെൻട്രൽ ജി.എസ്.ടി ഇന്റലിജൻസ് തുടങ്ങിയ കേന്ദ്ര ഏജൻസികൾക്ക് കേസ് അന്വേഷണം കൈമാറണമെന്നാണ് പ്രധാന ശുപാർശ.
​കൂടാതെ, സാമ്പത്തിക തിരിമറികൾ തടയുന്നതിൽ വീഴ്ച വരുത്തിയ ചില ജി.എസ്.ടി ഉദ്യോഗസ്ഥർക്കെതിരെ വകുപ്പ് തല അച്ചടക്ക നടപടിയെടുക്കാനും മുഖ്യമന്ത്രിക്ക് സമർപ്പിച്ച റിപ്പോർട്ടിൽ ശുപാർശ ചെയ്തിട്ടുണ്ട്.