തിരുവനന്തപുരം: സംസ്ഥാനത്തെ തീവ്ര വോട്ടർപട്ടിക പുതുക്കൽ (എസ്.ഐ.ആർ.) നടപടികൾ കൃത്യസമയത്ത് പൂർത്തിയാക്കുമെന്ന് മുഖ്യ തിരഞ്ഞെടുപ്പ് ഓഫീസർ ഡോ. രത്തൻ യു. ഖേൽക്കർ അറിയിച്ചു. ബൂത്ത് ലെവൽ ഓഫീസർമാർക്ക് (ബി.എൽ.ഒ.) പൂർണ പിന്തുണ ഉറപ്പാക്കുമെന്നും അവരുടെ പരാതികൾ പരിഹരിക്കുമെന്നും അദ്ദേഹം വ്യക്തമാക്കി.
​ബി.എൽ.ഒമാർക്കെതിരെ ഇതുവരെ നടപടിയെടുത്തിട്ടില്ലെന്നും അവരുടെ വിഷമങ്ങളിൽ കമ്മീഷൻ കൂടെ നിൽക്കുമെന്നും അദ്ദേഹം പറഞ്ഞു. പരാതികൾ ബൂത്തുതല സൂപ്പർവൈസർമാർക്കോ കളക്ടർമാർക്കോ നൽകാവുന്നതാണ്.

​പ്രധാന തീരുമാനങ്ങൾ:

​ഐ.ടി ഹബ്ബുകൾ: ഫോം പൂരിപ്പിച്ച് തിരിച്ചുവാങ്ങുന്ന നടപടികൾ പൂർത്തിയാക്കാൻ ഐ.ടി ഹബ്ബുകൾ ഒരുക്കും. വോളന്റിയർമാർ, കുടുംബശ്രീ പ്രവർത്തകർ എന്നിവരെ സഹായികളായി നിയോഗിക്കും.
​ബി.എൽ.എമാർ: കൂടുതൽ ബൂത്ത് ലെവൽ ഏജന്റുമാരെ (ബി.എൽ.എ.) നിയോഗിച്ച് രാഷ്ട്രീയ പാർട്ടികളുടെ പരാതികൾ പരിഹരിക്കും.
​സമയപരിധി: സംസ്ഥാനത്ത് 97 ശതമാനം ഫോം വിതരണം പൂർത്തിയായി. ഫോം പൂരിപ്പിച്ച് വാങ്ങുന്നതിന് ഡിസംബർ നാല് വരെയാണ് സമയപരിധി. അതിന് നാലോ അഞ്ചോ ദിവസം മുമ്പ് നടപടികൾ പൂർത്തിയാക്കാൻ നിർദ്ദേശിച്ചിട്ടുണ്ട്.

​ഒഴിവാക്കപ്പെട്ട വോട്ടർമാർ:

​ഇതുവരെ 55,000 വോട്ടർമാർക്ക് ഫോം നൽകാൻ കഴിഞ്ഞിട്ടില്ലെന്ന് റിപ്പോർട്ട് ലഭിച്ചു. ഇതിൽ 29,000 പേർ മരിച്ചവരും 20,000 പേർ സ്ഥലം മാറിപ്പോയവരുമാണ്. 3800 പേർ ഇരട്ടിപ്പാണ്. ഈ വിവരം ബി.എൽ.എമാരുടെ യോഗം വിളിച്ച് അറിയിച്ച്, അഭിപ്രായങ്ങൾ ഒപ്പിട്ട് വാങ്ങി ഇലക്ഷൻ കമ്മീഷന് സമർപ്പിക്കും.ആലപ്പുഴ കളക്ടറുടെ ശബ്ദസന്ദേശം; ബി.എൽ.ഒമാർക്ക് വിമർശനം
​എസ്.ഐ.ആർ. നടപടികളിൽ ബി.എൽ.ഒമാരെ ശാസിക്കുന്ന ആലപ്പുഴ ജില്ലാ കളക്ടർ അലക്സ് വർഗീസിൻ്റെ ശബ്ദസന്ദേശം പുറത്തായി. ബി.എൽ.ഒമാരും തിരഞ്ഞെടുപ്പ് ഉദ്യോഗസ്ഥരും ഉൾപ്പെടുന്ന വാട്ട്സ്ആപ്പ് ഗ്രൂപ്പിലാണ് കളക്ടർ വിമർശനം ഉന്നയിച്ചത്.
​"പലരും ചടങ്ങിനുവേണ്ടി അഞ്ചോ ആറോ വീടുകളിൽ കയറി നടപടി പൂർത്തിയാക്കുന്നു. പലർക്കും യാതൊരു സീരിയസ്നെസുമില്ല. ആലപ്പുഴ ജില്ല ഏറ്റവും മോശമായി പോകുന്നു," തുടങ്ങിയ വിമർശനങ്ങളാണ് സന്ദേശത്തിലുള്ളത്.

​കായംകുളം, ഹരിപ്പാട് മേഖലകളിൽ മിന്നൽ പരിശോധന നടത്തിയ ശേഷമാണ് കളക്ടറുടെ ശാസന. അതേസമയം, പ്രചരിക്കുന്ന സന്ദേശം എസ്.ഐ.ആർ. നടപടികളുടെ തുടക്കസമയമായ നവംബർ 10-ന് നൽകിയതാണെന്നാണ് ഔദ്യോഗിക വിശദീകരണം. ഈ സംഭവത്തിന് പിന്നാലെ കണ്ണൂരിൽ ബി.എൽ.ഒ. അനീഷ് ജോർജ് ആത്മഹത്യ ചെയ്തിരുന്നു. പശ്ചിമ ബംഗാളിലും എസ്.ഐ.ആർ. ജോലിയുടെ സമ്മർദ്ദത്തെ തുടർന്ന് ഒരു വനിതാ ബി.എൽ.ഒ. (ശാന്തിമുനി ഒറാവോ - 48) ആത്മഹത്യ ചെയ്തതായി റിപ്പോർട്ടുണ്ട്.

​കേരളത്തിലെ എസ്.ഐ.ആർ: ഹർജികൾ സുപ്രീംകോടതി നാളെ പരിഗണിക്കും

​കേരളത്തിലെ തീവ്ര വോട്ടർപട്ടിക പുതുക്കൽ (എസ്.ഐ.ആർ.) അടിയന്തരമായി നിർത്തിവയ്ക്കണമെന്ന ഹർജികൾ സുപ്രീംകോടതി വെള്ളിയാഴ്ച ( പരിഗണിക്കും. സി.പി.എം., കെ.പി.സി.സി., മുസ്ലിം ലീഗ് നേതാക്കളും സംസ്ഥാന സർക്കാരിന് വേണ്ടി ചീഫ് സെക്രട്ടറിയും ആണ് ഹർജികൾ സമർപ്പിച്ചത്.

​തദ്ദേശ തിരഞ്ഞെടുപ്പ് കഴിയുന്നത് വരെ എസ്.ഐ.ആർ. മാറ്റി വയ്ക്കണമെന്നാണ് സംസ്ഥാന സർക്കാരിന്റെ ആവശ്യം. രണ്ടും ഒരേസമയം നടക്കുന്നത് ഭരണസ്തംഭനമുണ്ടാക്കുമെന്നും ചൂണ്ടിക്കാട്ടി. സുപ്രീംകോടതിയുടെ നിലപാട് നിർണ്ണായകമാകും.