തിരുവനന്തപുരം: ശബരിമല സ്വർണ്ണപ്പാളി തട്ടിപ്പിന് സമാനമായി ചോറ്റാനിക്കര ക്ഷേത്രത്തിലും വൻതട്ടിപ്പ് നടത്താനുള്ള ശ്രമം നടന്നതായി കൊച്ചിൻ ദേവസ്വം മുൻ വിജിലൻസ് ഓഫീസർ ആർ. കെ. ജയരാജ്. വാർത്താ ചാനലായ ഏഷ്യാനെറ്റ് ന്യൂസിന്റെ ന്യൂസ് അവറിൽ സംസാരിക്കവെയാണ് അദ്ദേഹം ഇക്കാര്യം വ്യക്തമാക്കിയത്. ശ്രീകോവിൽ സ്വർണ്ണം പൂശാനും ക്ഷേത്ര നവീകരണത്തിനുമായി 100 കോടി രൂപയുടെ സ്പോൺസർഷിപ്പ് വാഗ്ദാനം ചെയ്താണ് തട്ടിപ്പുകാരൻ ദേവസ്വം അധികൃതരെ സമീപിച്ചതെന്നും അദ്ദേഹം വെളിപ്പെടുത്തി.
ബാംഗ്ലൂർ സ്വദേശിയായ ഗണശ്രാവൺ എന്നയാൾ 2019-20 കാലഘട്ടത്തിൽ ക്ഷേത്രത്തിൽ എത്തിയിരുന്നു. സ്വയം വലിയ ബിസിനസുകാരനാണെന്ന് പരിചയപ്പെടുത്തിയാണ് ഇയാൾ എത്തിയത്. ഇയാൾക്ക് ആറുമാസം വരെ ക്ഷേത്രപരിധിയിൽ സ്വാതന്ത്ര്യമായി പ്രവർത്തിക്കാൻ അവസരം ലഭിച്ചെങ്കിലും, വിജിലൻസ് നടത്തിയ പരിശോധനയിൽ വിലാസം, ആസ്തി ഉൾപ്പെടെയുള്ള വിവരങ്ങൾ വ്യാജമാണെന്ന് കണ്ടെത്തി. ഒടുവിൽ ഇയാൾ തട്ടിപ്പുകാരനാണെന്ന് ഉറപ്പായതോടെ പദ്ധതി റദ്ദാക്കുകയായിരുന്നുവെന്ന് ജയരാജ് പറഞ്ഞു.
ദേവസ്വം ബോർഡ് അധികൃതരോട് മുകളിൽ നിന്നുള്ള നിർദ്ദേശമെന്ന പേരിൽ പദ്ധതി മുന്നോട്ടു കൊണ്ടുപോവാൻ സമ്മർദം ചെലുത്തിയതും, വിവിധ രേഖകൾ സമർപ്പിക്കാൻ കഴിയാത്തതും സംശയങ്ങൾ ശക്തിപ്പെടുത്തി. ആന്ധ്രയിൽ ഉൾപ്പെടെ നിരവധി ക്ഷേത്രങ്ങളുടെ പേരിൽ പിരിവ് നടത്തിയിട്ടുള്ള തട്ടിപ്പുകാരനാണെന്ന് തുടർ അന്വേഷണത്തിൽ പുറത്തുവന്നു. സ്പോൺസർഷിപ്പ് പദ്ധതിക്ക് വ്യക്തമായ രൂപരേഖയോ വിശ്വസനീയമായ തെളിവുകളോ നൽകാൻ കഴിഞ്ഞില്ലെന്ന് ചോറ്റാനിക്കര ക്ഷേത്ര ഭാരവാഹികളും സ്ഥിരീകരിച്ചു.
