നാഗോയ (ജപ്പാൻ): ജപ്പാനിൽ നടക്കുന്ന 20-ാമത് ഏഷ്യൻ ഗെയിംസിൽ (ഐച്ചി-നാഗോയ 2026) ഖത്തർ അക്കൗണ്ട് തുറന്നു. കരാട്ടെ 60 കിലോഗ്രാം വിഭാഗത്തിൽ ഖത്തറിന്റെ അബ്ദുൾ റഹ്മാൻ മുസ്തഫ അബ്ദുൾഹമീദ് വെള്ളി മെഡൽ നേടി.
ആവേശകരമായ ഫൈനൽ പോരാട്ടത്തിൽ കുവൈത്തിന്റെ അബ്ദുള്ള ഷാബാനോട് പരാജയപ്പെട്ടാണ് (0-8) അബ്ദുൾ റഹ്മാൻ വെള്ളി മെഡലിൽ ഒതുങ്ങിയത്. ഫൈനൽ വരെയുള്ള യാത്രയിൽ മികച്ച സാങ്കേതിക തികവാർന്ന പ്രകടനമാണ് താരം പുറത്തെടുത്തത്.
പ്രി-ക്വാർട്ടറിൽ താജിക്കിസ്ഥാന്റെ തുരഖോനോവ് മഖ്‌റൂദിനെ (4-1) തോൽപ്പിച്ച അബ്ദുൾ റഹ്മാൻ, ക്വാർട്ടർ ഫൈനലിൽ വിയറ്റ്നാമിന്റെ ചു വാൻ ദുക്കിനെതിരെ 10-4 എന്ന മികച്ച സ്കോറിന് വിജയം കണ്ടു. സെമിഫൈനലിൽ മലേഷ്യൻ താരം ഹരി ശങ്കർ സൂര്യ ശങ്കറിനെ 7-1 എന്ന സ്കോറിന് നിലംപരിശാക്കിയാണ് ഖത്തർ താരം ഫൈനലിലേക്ക് മുന്നേറിയത്.
നേരത്തെ അമ്മാനിൽ നടന്ന 24-ാമത് ഏഷ്യൻ ജൂനിയർ, യൂത്ത്, അണ്ടർ-21 കരാട്ടെ ചാമ്പ്യൻഷിപ്പിൽ യു-21 (60 കിലോ) വിഭാഗത്തിൽ അബ്ദുൾ റഹ്മാൻ സ്വർണം നേടിയിരുന്നു.
