ദോഹ: ഖത്തർ ഫൗണ്ടേഷന് കീഴിലുള്ള പ്രമുഖ സ്ഥാപനങ്ങളായ സിദ്ര മെഡിസിനും (Sidra Medicine) സുലാൽ വെൽനസ് റിസോർട്ടും (Zulal Wellness Resort) സംയുക്തമായി സമഗ്ര ആരോഗ്യ-പ്രതിരോധ പദ്ധതികൾ വികസിപ്പിക്കുന്നതിനായി ധാരണാപത്രത്തിൽ (MoU) ഒപ്പുവെച്ചു. ആധുനിക ക്ലിനിക്കൽ ചികിത്സാരീതികളും പരമ്പരാഗത ആരോഗ്യ പരിപാലനവും സമന്വയിപ്പിച്ചുകൊണ്ടുള്ള പുതിയ പദ്ധതികൾക്കാണ് ഈ പങ്കാളിത്തത്തിലൂടെ തുടക്കമിടുന്നത്.
ക്ലിനിക്കൽ മേൽനോട്ടത്തോടെയുള്ള വെൽനസ് പ്രോഗ്രാമുകൾ, മികച്ച ജീവിതശൈലി-പോഷകാഹാര പദ്ധതികൾ, രോഗനിർണ്ണയ-പ്രതിരോധ ആരോഗ്യ സേവനങ്ങൾ എന്നിവയ്ക്ക് പുറമെ പ്രൊഫഷണൽ വിദ്യാഭ്യാസ-പരിശീലന പരിപാടികളും ഇരുസ്ഥാപനങ്ങളും ചേർന്ന് നടപ്പിലാക്കും.
ട്രഡീഷണൽ അറബിക് ആൻഡ് ഇസ്ലാമിക് മെഡിസിൻ (TAIM) രീതികൾ അവലംബിക്കുന്ന മേഖലയിലെ ആദ്യ വെൽനസ് റിസോർട്ടായ സുലാലിന്റെ പാരമ്പര്യവും, സിദ്ര മെഡിസിന്റെ അത്യാധുനിക മെഡിക്കൽ സേവനങ്ങളും സമന്വയിപ്പിച്ചു കൊണ്ട് വ്യക്തിഗത ചികിത്സകളും ജീവിതശൈലീ വികസന പരിപാടികളും ഈ കൂട്ടുകെട്ടിലൂടെ രൂപപ്പെടുത്തും.പദ്ധതിയുടെ ആദ്യഘട്ടം സിദ്ര മെഡിസിനിലെ വനിതാ വിഭാഗം (Women's Services) സേവനങ്ങളുടെ വിപുലീകരണത്തിന്റെ ഭാഗമായിട്ടായിരിക്കും നടപ്പിലാക്കുക.ക്ലിനിക്കൽ മികവിനെ വെൽനസ് ഇന്നൊവേഷനുമായി ബന്ധിപ്പിക്കുന്നതിൽ ഈ പങ്കാളിത്തം വലിയൊരു ചുവടുവെപ്പാണ്. സംയുക്തമായ പ്രവർത്തനത്തിലൂടെ രോഗികൾക്കും കുടുംബങ്ങൾക്കും കൂടുതൽ സമഗ്രവും വ്യക്തിഗതവുമായ പരിചരണം ഉറപ്പാക്കാൻ സാധിക്കുമെന്ന് സിദ്ര മെഡിസിൻആക്ടിങ് സി.ഇ.ഒ മുഹമ്മദ് ഖാലിദ് അൽ മനപറഞ്ഞു.
