​ദോഹ:നിയമനിർമ്മാണത്തിലും ഭരണപരമായ മേൽനോട്ടത്തിലും മനുഷ്യാവകാശ സംരക്ഷണത്തിനാണ് ശൂറാ കൗൺസിൽ എപ്പോഴും പ്രഥമ പരിഗണന നൽകുന്നതെന്ന് കൗൺസിൽ വ്യക്തമാക്കി. അമീർ ശൈഖ് തമീം ബിൻ ഹമദ് അൽഥാനിയുടെ ദീർഘവീക്ഷണത്തോടെയുള്ള നിർദ്ദേശങ്ങൾക്ക് കീഴിൽ, പൗരന്മാരുടെ അവകാശങ്ങൾ സംരക്ഷിക്കുന്നതിനും അവ പ്രോത്സാഹിപ്പിക്കുന്നതിനുമുള്ള ഖത്തർ സർക്കാരിന്റെ ശക്തമായ പ്രതിബദ്ധതയുടെ ഭാഗമായാണ് കൗൺസിൽ ഇതിനെ കാണുന്നത്.
​എല്ലാ വർഷവും ജൂൺ 30-ന് ആചരിക്കുന്ന 'അന്താരാഷ്ട്ര പാർലമെന്ററി ദിന'ത്തോടനുബന്ധിച്ച് (International Day of Parliamentarism) പുറത്തിറക്കിയ പ്രസ്താവനയിലാണ് ശൂറാ കൗൺസിൽ ഇക്കാര്യം വ്യക്തമാക്കിയത്.അന്താരാഷ്ട്ര പാർലമെന്ററി ദിനാചരണത്തിന്റെ ഭാഗമായി ശൂറാ കൗൺസിൽ ജനറൽ സെക്രട്ടേറിയറ്റ് സംഘടിപ്പിച്ച പ്രത്യേക ചർച്ചാ സമ്മേളനത്തിൽ സ്പീക്കർ ഹസൻ ബിൻ അബ്ദുള്ള അൽ ഗാനിം മുഖ്യപ്രഭാഷണം നടത്തി.
​"മനുഷ്യാവകാശങ്ങൾ സംരക്ഷിക്കുന്നതിലും അതിന് കരുത്തുപകരുന്ന നിയമങ്ങൾ നിർമ്മിക്കുന്നതിലും ഖത്തർ എന്നും മുൻപന്തിയിലാണ്. ഇസ്ലാമിക ശരീഅത്ത് തത്വങ്ങളിലും ഖത്തറിന്റെ സമ്പന്നമായ സംസ്കാരത്തിലും പാരമ്പര്യത്തിലും ഊന്നിയാണ് നമ്മുടെ രാജ്യം ഈ അവകാശങ്ങളെ സംരക്ഷിക്കുന്നതെന്ന് 
ശൂറാ കൗൺസിൽസ്പീക്കർ
ഹസൻ ബിൻ അബ്ദുള്ള അൽ ഗാനിം പറഞ്ഞു.
ഭരണഘടന നൽകുന്ന ഉത്തരവാദിത്തങ്ങൾ കൃത്യമായി വിനിയോഗിച്ചുകൊണ്ട് പൊതുജനങ്ങളുടെ അവകാശങ്ങളും സ്വാതന്ത്ര്യവും ഉറപ്പാക്കാനും, സുസ്ഥിര വികസനവും സുതാര്യതയും നിലനിർത്താനും കൗൺസിൽ നിരന്തരം പ്രവർത്തിക്കുന്നുണ്ടെന്ന് പ്രസ്താവനയിൽ കൂട്ടിച്ചേർത്തു.സമൂഹത്തിന്റെ പുരോഗതിക്കായി വനിതകളുടെയും യുവാക്കളുടെയും അവകാശങ്ങൾ സംരക്ഷിക്കുന്ന നയങ്ങൾ കൂടുതൽ വികസിപ്പിക്കേണ്ടതിന്റെ ആവശ്യകതയും ആരോഗ്യ സംരക്ഷണം ഓരോ പൗരന്റെയും അടിസ്ഥാന അവകാശമാണെന്ന കാര്യവും ചർച്ചയിൽ പങ്കെടുത്തവർ അടിവരയിട്ടു പറഞ്ഞു.