ദോഹ:ശീതകാലത്തിന്റെ വരവറിയിച്ച് രാജ്യത്ത് ക്യാമ്പിംഗ് സീസണിനായുള്ള ഒരുക്കങ്ങൾ സജീവമാകുന്നു. മരുഭൂമിയിലെ ടെന്റുകൾക്കും വിവിധ ക്യാമ്പിംഗ് സാമഗ്രികൾക്കുമായി ആവശ്യക്കാർ ഏറിയതോടെ വിപണിയിൽ വൈവിധ്യമാർന്ന ഉൽപ്പന്നങ്ങൾ നിരത്തി വ്യാപാരികൾ രംഗത്തെത്തി.
കുടുംബങ്ങൾക്കും സുഹൃത്തുക്കൾക്കുമായി വ്യത്യസ്ത വലിപ്പത്തിലുള്ള കൂടാരങ്ങളും, ലൈറ്റുകൾ, സ്റ്റൗവുകൾ തുടങ്ങിയ മറ്റ് അനുബന്ധ ഉപകരണങ്ങളും വിപണിയിൽ ലഭ്യമാക്കിത്തുടങ്ങിയതായി കഷ്ടാ (Kashta) കടയുടമയായ അൽ-മുഇസ് ഉസ്മാൻ പറഞ്ഞു. തങ്ങളുടെ മുൻകൂട്ടിയുള്ള തയ്യാറെടുപ്പുകൾ ജനങ്ങൾക്ക് സൗകര്യപ്രദമായി സാധനങ്ങൾ വാങ്ങാൻ സഹായിക്കുമെന്നും അദ്ദേഹം കൂട്ടിച്ചേർത്തു.
അതേസമയം, വരാനിരിക്കുന്ന ക്യാമ്പിംഗ് സീസണിന്റെ ഔദ്യോഗിക തിയ്യതിയും നിബന്ധനകളും എന്നുണ്ടാകുമെന്ന പ്രതീക്ഷയിലാണ് ജനങ്ങൾ. ഒക്ടോബർ പകുതിയോടെ രജിസ്ട്രേഷൻ ആരംഭിക്കുകയും നവംബർ ഒന്നു മുതൽ സീസണിന് തുടക്കമാവുകയും ചെയ്യുമെന്നപ്രതീക്ഷയിലാണ്.
