ബിഗ് ബോസ് താരങ്ങളായ അഖിൽ മാരാരും ഷിയാസ് കരീമും തമ്മിലുള്ള വാക്പോരാട്ടം വീണ്ടും ചൂടുപിടിച്ചു. ഷിയാസ് സ്വന്തം ഉമ്മയെ വീട്ടിൽ നിന്ന് പുറത്താക്കിയെന്ന അഖിൽ മാരാരുടെ ആരോപണത്തിന് സോഷ്യൽ മീഡിയയിലൂടെ ശക്തമായ മറുപടിയുമായി രംഗത്തെത്തിയിരിക്കുകയാണ് ഷിയാസ്. ഒരു ഓൺലൈൻ ചാനലിന് നൽകിയ അഭിമുഖത്തിലാണ് ഷിയാസിനെതിരെ മാരാർ വിവാദ പരാമർശം നടത്തിയത്. “സ്വന്തം ഉമ്മയെ വീട്ടിൽ നിന്ന് പുറത്താക്കിയ അവന്റെ വാക്ക് ആരാണ് വിശ്വസിക്കുക?” എന്നായിരുന്നു അഖിൽ മാരാർ ചോദിച്ചത്. ഈ പരാമർശം സമൂഹമാധ്യമങ്ങളിൽ വ്യാപകമായി ചർച്ചയായതിന് പിന്നാലെയാണ് ഷിയാസ് പ്രതികരിച്ചത്.
തന്റെ ഉമ്മയുമായി ഉള്ള ബന്ധം ഏറെ ആഴമുള്ളതാണെന്നും, ജനിച്ച നാൾ മുതൽ ഹൃദയത്തിൽ സൂക്ഷിച്ച സ്നേഹമാണ് അതെന്നും ഷിയാസ് കുറിപ്പിൽ വ്യക്തമാക്കി. തനിയെക്കുറിച്ചുള്ള യഥാർത്ഥ സ്ഥിതിവിവരം നാട്ടുകാർക്കും അടുത്തറിയുന്നവർക്കും അറിയാമെന്നും, കുടുംബബന്ധത്തിന്റെ വില അറിയുന്ന ഒരാൾക്കും ഇത്തരമൊരു ആരോപണം ഉന്നയിക്കാൻ കഴിയില്ലെന്നും അദ്ദേഹം ചോദിച്ചു. അഖിൽ മാരാരെ കടുത്ത ഭാഷയിൽ വിമർശിച്ച ഷിയാസ്, അടിസ്ഥാനമില്ലാത്ത ആരോപണങ്ങൾ ഉയർത്തുന്നവരോട് മറുപടി പറയേണ്ട സാഹചര്യമാണിതെന്നും കൂട്ടിച്ചേർത്തു.
"ഏതൊരു മകനും ഉമ്മയുമായുള്ള ബന്ധം ആഴിയേക്കാൾ ആഴമേറിയതാണ്. അതാണ്‌ എന്റെ പൊന്നുമ്മയോട് ജനിച്ചിന്നോളം എന്റെ ഹൃദയത്തിൽ അടയാളപ്പെടുത്തിയിട്ടുള്ളതും. എന്റെ ഇടനെഞ്ചിൽ പച്ചക്കുത്തിയ ആ സ്നേഹത്തെ എന്നെ കണ്ടും കേട്ടും അനുഭവിച്ചും വന്ന എന്റെ നാട്ടുകാർ ചാണകം ചവിട്ടി കോട്ടത്തലയോട് പറഞ്ഞെത്രെ ഞാൻ തള്ളി പറഞ്ഞെന്ന്. ഞാൻ വീട്ടിൽ നിന്ന് ചവിട്ടി പുറത്താക്കി എന്ന്. കുടുംബ ബന്ധത്തിന്റെ വിലയറിയുന്ന അമ്മമാരോട് സ്നേഹമുള്ള ഏതേലും ഒരാൾക്ക് പറയാൻ കഴിയുന്ന കാര്യമാണോ കോട്ടാത്തല ഒരു ഓൺലൈൻ ചാനലിന് കൊടുത്ത അഭിമുഖത്തിൽ പറഞ്ഞത്?
എന്റെ ഉമ്മ അന്നും ഇന്നും എന്നും എന്റെ കൂടെയുണ്ട് . എനിക്കെന്നും എപ്പോഴും താങ്ങായ്, തണലായ്, ഊർജ്ജമായ്. പേപ്പട്ടികൾ കുരയ്ക്കും കെട്ടിയിട്ടിടത്തു നിന്ന് കുരയ്ക്കും. ആ പേപ്പട്ടിയുടെ കുരയ്ക്കുള്ള മറുപടിയാണിത് നീ കൊണ്ട് പോയി തിന്ന് കോട്ടത്തലേ." ഷിയാസ് കരീം കുറിച്ചു.
കുറിപ്പിൽ ഒതുക്കാതെ, ആരോപണങ്ങൾ തള്ളിക്കളയാൻ തന്റെ ഉമ്മയെ തന്നെ ക്യാമറ മുന്നിലെത്തിച്ചുള്ള വീഡിയോയും ഷിയാസ് പങ്കുവച്ചു. വീഡിയോയിൽ ഷിയാസിന്റെ ഉമ്മയും വലിയുമ്മയും കൂടെയുണ്ട്. താൻ വീട്ടിൽ തന്നെയാണെന്നും ആരും തന്നെ പുറത്താക്കിയിട്ടില്ലെന്നും ഷിയാസിന്റെ ഉമ്മ വീഡിയോയിൽ വ്യക്തമാക്കി. “എന്നും രാവിലെ പുറത്തുപോകും, വൈകിട്ട് വീട്ടിലേക്ക് തിരികെ വരും. അതാകാം ആരെങ്കിലും പുറത്താക്കി എന്ന് പറഞ്ഞത്. ആരും എന്നെ വീട്ടിൽ നിന്ന് പുറത്താക്കിയിട്ടില്ല,” എന്ന് ചിരിക്കെ അവർ പ്രതികരിച്ചു.
ഇതിനിടെ, ബിഗ് ബോസ് ഷോയുമായി ബന്ധപ്പെട്ടും മറ്റു വിഷയങ്ങളുമായി ബന്ധപ്പെട്ടും ഇരുവരും പരസ്പരം വിമർശനങ്ങളുമായി രംഗത്തെത്തുന്നത് പതിവാണ്. വ്യക്തിപരമായ ആരോപണങ്ങളും വെല്ലുവിളികളും ഉയർത്തിയുള്ള വാക്പോരുകൾ തുടർന്നതോടെയാണ് ഈ തർക്കം കൂടുതൽ ശക്തമായത്. ഇപ്പോഴത്തെ പുതിയ ആരോപണവും മറുപടിയും സമൂഹമാധ്യമങ്ങളിൽ വീണ്ടും വലിയ ചർച്ചയ്ക്ക് വഴിവച്ചിരിക്കുകയാണ്.
