ദോഹ:  പ്രമുഖ ഡെലിവറി പ്ലാറ്റ്‌ഫോമായ തലബാത്തിന്റെ സാമൂഹിക പ്രതിബദ്ധതയുള്ള പ്രവർത്തനങ്ങളെ ഖത്തർ ക്യാൻസർ സൊസൈറ്റി (QCS) ആദരിച്ചു. 2025 ൽ സൊസൈറ്റിയുടെ വിവിധ പദ്ധതികളിൽ നൽകിയ സജീവമായ പങ്കാളിത്തവും സംഭാവനകളും പരിഗണിച്ചാണ് ഈ അംഗീകാരം. ദോഹയിലെ റിറ്റ്‌സ് കാൾട്ടണിൽ നടന്ന ചടങ്ങിൽ ഖത്തർ ക്യാൻസർ സൊസൈറ്റി ചെയർമാൻ ഷെയ്ഖ് ഡോ. ഖാലിദ് ബിൻ ജബർ അൽതാനി തലബാത്തിനും തലബാത്ത് മാർട്ടിനുമുള്ള പുരസ്കാരങ്ങൾ സമ്മാനിച്ചു.
​സ്തനാർബുദ അവബോധത്തിനായി ഒക്ടോബർ മാസത്തിൽ സംഘടിപ്പിച്ച 'പിങ്ക് ടോബർ' (Pinktober) കാമ്പയിനിൽ തലബാത്ത് മാർട്ട് ശ്രദ്ധേയമായ പങ്കുവഹിച്ചിരുന്നു. ആപ്പ് വഴി ഉപഭോക്താക്കൾക്ക് പിങ്ക് റിബൺ പിന്നുകൾ വാങ്ങാനും തിരഞ്ഞെടുത്ത ബ്രാൻഡുകളിൽ നിന്ന് ഷോപ്പിംഗ് നടത്താനും സൗകര്യം ഒരുക്കിയിരുന്നു. ഇതിലൂടെ സമാഹരിച്ച തുക രോഗികളുടെ ചികിത്സാ സഹായ പദ്ധതികൾക്കും ബോധവൽക്കരണ പ്രവർത്തനങ്ങൾക്കുമായി കൈമാറി.
​കൂടാതെ, ക്യാൻസർ അതിജീവനത്തിന്റെ പ്രതീകമായ 'റിലേ ഫോർ ലൈഫ്' (Relay for Life) എന്ന നടത്തത്തിലും തലബാത്ത് ജീവനക്കാർ അണിനിരന്നു. പരിപാടിയിൽ പങ്കെടുത്തവർക്കായി തലബാത്ത് മാർട്ടിന്റെ പ്രത്യേക സ്റ്റാളിലൂടെ ലഘുഭക്ഷണങ്ങളും വിതരണം ചെയ്തു.
​സമൂഹത്തിന് ഗുണകരമാകുന്ന പ്രവർത്തനങ്ങൾ സാങ്കേതികവിദ്യയിലൂടെ ജനങ്ങളിലെത്തിക്കാൻ സാധിച്ചതിൽ അഭിമാനമുണ്ടെന്ന് തലബാത്ത് ഖത്തർ മാനേജിംഗ് ഡയറക്ടർ ഫ്രാൻസിസ്കോ മിഗ്വൽ ഡി സൂസ പറഞ്ഞു. ഇത്തരം പ്രവർത്തനങ്ങളിലൂടെ രാജ്യത്തെ ആരോഗ്യ ബോധവൽക്കരണ ശ്രമങ്ങളിൽ പങ്കാളികളാകുന്നത് തുടരുമെന്നും അദ്ദേഹം കൂട്ടിച്ചേർത്തു. തുടർച്ചയായ രണ്ടാം വർഷമാണ് തലബാത്തിനെ തേടി ഈ പുരസ്കാരം എത്തുന്നത്.