അമരാവതി: അർണബ് അതിതീവ്ര ചുഴലിക്കാറ്റിന്റെ പ്രഭാവത്തിൽ ആന്ധ്രാപ്രദേശിൽ കനത്ത മഴയും ശക്തമായ കാറ്റും. ചുഴലിക്കാറ്റ് ഭീഷണി നിലനിൽക്കുന്ന തീരമേഖലകളിൽ നിന്ന് ഏകദേശം ഒരു ലക്ഷം പേരെ സുരക്ഷിത സ്ഥാനങ്ങളിലേക്ക് മാറ്റിപ്പാർപ്പിച്ചു. മുൻകരുതൽ നടപടികളുടെ ഭാഗമായി ഒക്ടോബർ 27, 28 തീയതികളിലായി 72 ട്രെയിൻ സർവീസുകൾ റദ്ദാക്കിയതിനു പിന്നാലെ വിമാന സർവീസുകളും തടസ്സപ്പെട്ടു.

ചൊവ്വാഴ്ച പുലർച്ചെയോടെ ചുഴലിക്കാറ്റ് കരതൊടുമെന്നായിരുന്നു കാലാവസ്ഥാ വകുപ്പിന്റെ പ്രവചനം. ബാപ്പറ്റ്‌ല–വിശാഖപട്ടണം തീരമേഖലയ്ക്കിടയിൽ യാനത്തിന് സമീപം ചുഴലിക്കാറ്റ് കരയിൽ പ്രവേശിക്കുമെന്നാണ് അറിയിച്ചിരുന്നത്. മണിക്കൂറിൽ 125 മുതൽ 150 കിലോമീറ്റർ വരെ വേഗത്തിൽ കാറ്റ് വീശാനും അതിശക്തമായ മഴ പെയ്യാനും സാധ്യതയുള്ളതിനാൽ തീരപ്രദേശങ്ങളിൽ ജാഗ്രത ശക്തമാക്കി.

ട്രെയിൻ സർവീസുകൾക്ക് നിയന്ത്രണം

ചുഴലിക്കാറ്റിന്റെ പശ്ചാത്തലത്തിൽ ദക്ഷിണ മധ്യ റെയിൽവേയും ഈസ്റ്റ് കോസ്റ്റ് റെയിൽവേയും ചേർന്ന് 72 ട്രെയിൻ സർവീസുകൾ പൂർണമായോ ഭാഗികമായോ റദ്ദാക്കി. ആന്ധ്രാപ്രദേശ്, ഒഡീഷ, തെലങ്കാന എന്നിവിടങ്ങളെ ബന്ധിപ്പിക്കുന്ന സർവീസുകളെയാണ് തീരുമാനം പ്രധാനമായും ബാധിച്ചത്.

സെക്കന്തരാബാദ്–ഹൗറ ഫലക്‌നുമ സൂപ്പർഫാസ്റ്റ് എക്‌സ്പ്രസ്, ഹൈദരാബാദ്–വിശാഖപട്ടണം ഗോദാവരി എക്‌സ്പ്രസ്, സെക്കന്തരാബാദ്–ഭുവനേശ്വർ വിശാഖ എക്‌സ്പ്രസ്, സെക്കന്തരാബാദ്–വിശാഖപട്ടണം ഗരീബ് രഥ്, ലിംഗമ്പള്ളി–കാക്കിനാഡ ഗൗതമി എക്‌സ്പ്രസ് എന്നിവ റദ്ദാക്കിയ സർവീസുകളിൽ ഉൾപ്പെടുന്നു. നിരവധി പാസഞ്ചർ ട്രെയിനുകളും സർവീസ് നടത്തില്ല.

വിമാന സർവീസുകളും താറുമാറായി

വിശാഖപട്ടണം, വിജയവാഡ വിമാനത്താവളങ്ങളിലേക്കും അവിടെനിന്നുമുള്ള സർവീസുകളെയും ചുഴലിക്കാറ്റ് ബാധിച്ചു. ഡൽഹി, ഹൈദരാബാദ്, ബെംഗളൂരു, കൊൽക്കത്ത, ചെന്നൈ, തിരുപ്പതി തുടങ്ങിയ നഗരങ്ങളിലേക്കുള്ള 32 ഓളം വിമാന സർവീസുകൾ ചൊവ്വാഴ്ച റദ്ദാക്കിയിരുന്നു.

ഒക്ടോബർ 28-ന് വിജയവാഡയിൽ നിന്നുള്ള എല്ലാ സർവീസുകളും ഇൻഡിഗോ റദ്ദാക്കിയിട്ടുണ്ട്. എയർ ഇന്ത്യയുടെ ഡൽഹി സർവീസും ഫ്ലൈ91-ന്റെ ഹൈദരാബാദ് സർവീസുകളും റദ്ദാക്കിയവയിൽ ഉൾപ്പെടുന്നു.

എയർ ഇന്ത്യ, എയർ ഇന്ത്യ എക്സ്പ്രസ്, ഇൻഡിഗോ തുടങ്ങിയ വിമാനക്കമ്പനികൾ യാത്രക്കാരോട് യാത്ര പുറപ്പെടുന്നതിന് മുമ്പ് വിമാനത്തിന്റെ നിലവിലെ സ്ഥിതി പരിശോധിക്കാൻ നിർദേശിച്ചു. കാലാവസ്ഥാ സാഹചര്യങ്ങൾക്കനുസരിച്ച് സർവീസുകളിൽ മാറ്റമുണ്ടാകാമെന്നും അറിയിച്ചിട്ടുണ്ട്.

11 തീരദേശ ജില്ലകളിൽ റെഡ് അലർട്ട്

ആന്ധ്രാപ്രദേശിലെ 11 തീരദേശ ജില്ലകളിൽ റെഡ് അലർട്ട് പ്രഖ്യാപിച്ചിട്ടുണ്ട്. വിദ്യാഭ്യാസ സ്ഥാപനങ്ങൾക്ക് അവധി നൽകി. മത്സ്യത്തൊഴിലാളികൾ കടലിൽ പോകരുതെന്നും നിർദേശം പുറപ്പെടുവിച്ചിട്ടുണ്ട്.

ദുരന്തനിവാരണ പ്രവർത്തനങ്ങൾക്കായി ദേശീയ ദുരന്തനിവാരണ സേനയുടെയും (എൻഡിആർഎഫ്) സംസ്ഥാന ദുരന്തനിവാരണ സേനയുടെയും (എസ്ഡിആർഎഫ്) സംഘങ്ങളെ തീരമേഖലകളിൽ വിന്യസിച്ചു. അപകടസാധ്യതയുള്ള പ്രദേശങ്ങളിൽ നിന്ന് ആളുകളെ മാറ്റിപ്പാർപ്പിക്കുന്നതിനും അടിയന്തര സാഹചര്യങ്ങൾ നേരിടുന്നതിനുമുള്ള നടപടികൾ തുടരുകയാണ്.

ചുഴലിക്കാറ്റിന്റെ സഞ്ചാരപഥവും കാറ്റിന്റെ തീവ്രതയും കണക്കിലെടുത്ത് തീരദേശ മേഖലകളിൽ അധികൃതർ ജാഗ്രതാ നിർദേശങ്ങൾ തുടരുകയാണ്.

വിശാഖപട്ടണം: അർണബ് ചുഴലിക്കാറ്റ് ആന്ധ്രാപ്രദേശ് തീരത്ത് കരതൊട്ടതോടെ മേഖലയിൽ അതീവ ജാഗ്രത. വെസ്റ്റ് ഗോദാവരി ജില്ലയിലെ നരസ്പൂറിന് സമീപമാണ് ചുഴലിക്കാറ്റ് കരയിലെത്തിയത്. വിശാഖപട്ടണം, കാക്കിനട എന്നിവിടങ്ങളിൽ ശക്തമായ കാറ്റും കനത്ത മഴയും തുടരുകയാണ്. മരങ്ങൾ കടപുഴകി വീണതായും ബോട്ടുകൾ ഒഴുകിപ്പോയതായും റിപ്പോർട്ടുകളുണ്ട്.

മണിക്കൂറിൽ 125 കിലോമീറ്റർ വേഗത്തിലാണ് ചുഴലിക്കാറ്റ് കരതൊട്ടത്. അടുത്ത നാല് മണിക്കൂർ കൂടി ശക്തമായ കാറ്റ് തുടരാൻ സാധ്യതയുണ്ടെന്നാണ് മുന്നറിയിപ്പ്. കരതൊടുന്ന സമയത്ത് കാറ്റിന്റെ വേഗം മണിക്കൂറിൽ 150 കിലോമീറ്റർ വരെ ഉയരാമെന്ന് കാലാവസ്ഥാ വകുപ്പ് നേരത്തെ അറിയിച്ചിരുന്നു.

കടൽക്ഷോഭത്തിനും വെള്ളപ്പൊക്കത്തിനും സാധ്യതയുള്ളതിനാൽ തീരദേശത്തും താഴ്ന്ന പ്രദേശങ്ങളിലും സുരക്ഷാ നടപടികൾ ശക്തമാക്കി. സാധാരണ വേലിയേറ്റനിരപ്പിനെക്കാൾ 1.5 മുതൽ 2.5 മീറ്റർ വരെ കടൽവെള്ളം ഉയരാൻ സാധ്യതയുള്ളതിനാൽ തീരപ്രദേശങ്ങളിൽ ജാഗ്രതാ നിർദേശമുണ്ട്. അപകടസാധ്യതയുള്ള മേഖലകളിൽനിന്ന് ആയിരക്കണക്കിന് ആളുകളെ സുരക്ഷിത കേന്ദ്രങ്ങളിലേക്ക് മാറ്റി. മുൻകരുതലിന്റെ ഭാഗമായി ട്രെയിൻ, വിമാന സർവീസുകളും റദ്ദാക്കിയിട്ടുണ്ട്.

അതിനിടെ, ചുഴലിക്കാറ്റിന് മുന്നോടിയായി ബംഗാൾ ഉൾക്കടലിൽ ഭൂചലനം ഉണ്ടായതായി റിപ്പോർട്ടുകൾ പുറത്തുവന്നു. റിക്ടർ സ്കെയിലിൽ 4.52 തീവ്രത രേഖപ്പെടുത്തിയ ഭൂചലനത്തെ തുടർന്ന് സുനാമി മുന്നറിയിപ്പ് നൽകിയിട്ടില്ല.

ഒഡീഷയിലും കനത്ത ജാഗ്രത; 48,000 പേരെ മാറ്റി

അർണബിന്റെ പ്രത്യാഘാതങ്ങൾ നേരിടാൻ ഒഡീഷയിലും വിപുലമായ സുരക്ഷാ ക്രമീകരണങ്ങളാണ് ഒരുക്കിയിരിക്കുന്നത്. സംസ്ഥാനത്ത് 26 ട്രെയിൻ സർവീസുകൾ റദ്ദാക്കിയപ്പോൾ നിരവധി ട്രെയിനുകളുടെ സമയക്രമത്തിലും മാറ്റം വരുത്തി. 16 ജില്ലകളിലെ സ്കൂളുകൾക്ക് അവധി പ്രഖ്യാപിച്ചു.

വിവിധ ജില്ലകളിൽനിന്നായി 48,000 പേരെ ഇതിനകം സുരക്ഷിത കേന്ദ്രങ്ങളിലേക്ക് മാറ്റിയിട്ടുണ്ട്. ദുരിതബാധിതർക്കായി 1,700-ലധികം ദുരിതാശ്വാസ കേന്ദ്രങ്ങളും സജ്ജമാക്കി. കനത്ത മഴയ്ക്ക് സാധ്യതയുള്ളതിനാൽ നിരവധി ജില്ലകളിൽ റെഡ് അലർട്ട് പ്രഖ്യാപിച്ചിട്ടുണ്ട്.

ഒക്ടോബർ 29 വരെ ഒഡീഷ തീരത്ത് മത്സ്യബന്ധനത്തിന് വിലക്കേർപ്പെടുത്തിയിട്ടുണ്ട്. ചുഴലിക്കാറ്റുമായി ബന്ധപ്പെട്ട് വ്യാജവാർത്തകൾ പ്രചരിപ്പിക്കരുതെന്നും ഔദ്യോഗിക അറിയിപ്പുകൾ മാത്രം വിശ്വസിക്കണമെന്നും സർക്കാർ നിർദേശിച്ചു. തീരദേശവാസികൾ ജാഗ്രത പാലിക്കണമെന്നും അധികൃതരുടെ നിർദേശങ്ങൾ കർശനമായി പിന്തുടരണമെന്നും മുന്നറിയിപ്പുണ്ട്.