​ദോഹ: ജർമ്മനിയുടെ കയറ്റുമതി അധിഷ്ഠിത വ്യവസായ മാതൃക  വെല്ലുവിളികൾ നേരിടുകയാണെന്നും ഇത് രാജ്യത്തിന്റെ സാമ്പത്തിക വളർച്ചയെ സാരമായി ബാധിക്കുന്നുവെന്നും ഖത്തർ നാഷണൽ ബാങ്ക് (QNB) വ്യക്തമാക്കി. ഊർജ്ജ പ്രതിസന്ധി, വർദ്ധിച്ചുവരുന്ന ഉൽപ്പാദനച്ചെലവുകൾ, ചൈനയിൽ നിന്നുള്ള കടുത്ത മത്സരം, ആഭ്യന്തര ഘടനാപരമായ തടസ്സങ്ങൾ എന്നിവയാണ് യൂറോപ്പിലെ ഏറ്റവും വലിയ സമ്പദ്‌വ്യവസ്ഥയായ ജർമ്മനിക്ക് തിരിച്ചടിയാകുന്നത്.
​ഖത്തർ നാഷണൽ ബാങ്ക് പുറത്തുവിട്ട പ്രതിവാര റിപ്പോർട്ടിലാണ് ഈ നിരീക്ഷണങ്ങളുള്ളത്. യൂറോസോണിലെ മുൻനിര സമ്പദ്‌വ്യവസ്ഥയായിരുന്ന ജർമ്മനി, നിർമ്മാണ മേഖലയിലുണ്ടായ മന്ദത കാരണം നിലവിൽ പിന്നാക്കം നിൽക്കുകയാണ്. രാജ്യത്തിന്റെ മൊത്തം ആഭ്യന്തര ഉൽപ്പാദനം (GDP) 2023-ൽ ഇടിവുരേഖപ്പെടുത്തുകയും 2024-ൽ മാറ്റമില്ലാതെ തുടരുകയും ചെയ്തിരുന്നു. തുടർന്ന് 2025-ൽ 0.2 ശതമാനത്തിന്റെ  വളർച്ച മാത്രമാണ് കൈവരിക്കാനായത്.
​ജർമ്മൻ സമ്പദ്‌വ്യവസ്ഥയുടെ നട്ടെല്ലായ ചെറുകിട-ഇടത്തരം സംരംഭങ്ങളുടെ (Mittelstand) പ്രവർത്തനത്തിലുണ്ടായ മന്ദതയാണ് പ്രധാന തിരിച്ചടിയായി ബാങ്ക് ചൂണ്ടിക്കാണിക്കുന്നത്. 2017-ൽ മികച്ച പ്രകടനം കാഴ്ചവെച്ച വ്യവസായ മേഖലയിൽ, നിലവിൽ മൊത്തം ഉൽപ്പാദനം മുൻപത്തെ ഉയർന്ന നിരക്കിനേക്കാൾ 15 ശതമാനം കുറവാണ്.
​പാരിസ്ഥിതിക പുനർനിർമ്മാണം, അടിസ്ഥാന സൗകര്യ വികസനം, ഭരണപരമായ സങ്കീർണ്ണതകൾ കുറയ്ക്കൽ എന്നിവയിലൂടെ മാത്രമേ ജർമ്മനിക്ക് ഈ പ്രതിസന്ധിയെ മറികടക്കാനാകൂ എന്ന് റിപ്പോർട്ട് ഓർമ്മിപ്പിക്കുന്നു. സ്‌പെയിൻ ഉൾപ്പെടെയുള്ള മറ്റ് യൂറോപ്യൻ രാജ്യങ്ങൾ സ്വീകരിച്ച സാമ്പത്തിക പരിഷ്കാരങ്ങൾ ജർമ്മനിയും മാതൃകയാക്കേണ്ടതുണ്ടെന്നും QNB വ്യക്തമാക്കി.