​ദോഹ: ഖത്തറിലെ ഇന്ത്യൻ പ്രവാസികൾക്ക് കൂടുതൽ വേഗത്തിലും സുതാര്യമായും സേവനങ്ങൾ ലഭ്യമാക്കുക എന്ന ലക്ഷ്യത്തോടെ ഇന്ത്യൻ കൾച്ചറൽ സെന്റർ (ICC) ഡിജിറ്റൽ യുഗത്തിലേക്ക്. ഐസിസിയുടെ പ്രവർത്തനങ്ങൾ ഡിജിറ്റലൈസ് ചെയ്യുന്നതിന്റെ ഭാഗമായി തയ്യാറാക്കിയ പുതിയ മൊബൈൽ ആപ്ലിക്കേഷൻ ഔദ്യോഗികമായി പുറത്തിറക്കി. ഐസിസി അശോക ഹാളിൽ നടന്ന പ്രൗഢഗംഭീരമായ ചടങ്ങിൽ ഖത്തറിലെ ഇന്ത്യൻ അംബാസഡർ വിപുൽ ആപ്പിന്റെ ലോഞ്ചിംഗ് നിർവഹിച്ചു.
ഇന്ത്യൻ കമ്മ്യൂണിറ്റിയുമായുള്ള ആശയവിനിമയം കൂടുതൽ കാര്യക്ഷമമാക്കാൻ ഈ ആപ്പ് സഹായിക്കുമെന്ന് അംബാസഡർ പറഞ്ഞു. ഐസിസിയുടെ വാർത്തകൾ, പ്രധാന അറിയിപ്പുകൾ, വരാനിരിക്കുന്ന പരിപാടികൾ (Events) എന്നിവയെക്കുറിച്ചുള്ള വിവരങ്ങൾ തത്സമയം ഈ പ്ലാറ്റ്‌ഫോമിലൂടെ കമ്മ്യൂണിറ്റി അംഗങ്ങൾക്ക് ലഭിക്കും.
തൊഴിലന്വേഷകർക്കും തൊഴിലുടമകൾക്കും ഒരുപോലെ പ്രയോജനപ്പെടുന്ന രീതിയിലാണ് ഇതിലെ ജോബ് പോർട്ടൽ സജ്ജീകരിച്ചിരിക്കുന്നത്. പ്രവാസികൾക്ക് തങ്ങളുടെ ബയോഡാറ്റ അപ്‌ലോഡ് ചെയ്യാനും നിലവിലുള്ള തൊഴിലവസരങ്ങൾ തിരയാനും ഇതിലൂടെ സാധിക്കും.പ്രത്യേക ആനുകൂല്യങ്ങളും മുൻഗണനാ സേവനങ്ങളും പാർട്ണർ ഡിസ്കൗണ്ടുകളും ലഭ്യമാകുന്ന പ്രീമിയം മെമ്പർഷിപ്പ് പദ്ധതിയായ 'എലൈറ്റ് ക്ലബ്' ആപ്പിന്റെ പ്രധാന ആകർഷണമാണ്.ഐസിസിക്ക് കീഴിലുള്ള വിവിധ ഫോറങ്ങൾ, ക്ലബ്ബുകൾ, അസോസിയേഷനുകൾ എന്നിവയെക്കുറിച്ചുള്ള വിവരങ്ങളും സാമൂഹിക ക്ഷേമ പദ്ധതികളെക്കുറിച്ചുള്ള അപ്‌ഡേറ്റുകളും ആപ്പിൽ ലഭ്യമാക്കിയിട്ടുണ്ട്.
​ചടങ്ങിൽ ഇന്ത്യൻ എംബസി കൗൺസിലർ ഡോ. വൈഭവ് എ. ടണ്ടാലെ, ഐസിസി പ്രസിഡന്റ് എ.പി. മണികണ്ഠൻ, ഉപദേശക സമിതി ചെയർമാൻ പി.എൻ. ബാബു രാജൻ, വൈസ് പ്രസിഡന്റ് ശാന്തനു ദേശ്പാണ്ഡെ, ജനറൽ സെക്രട്ടറി എബ്രഹാം കെ. ജോസഫ് എന്നിവരും വിവിധ മാനേജിംഗ് കമ്മിറ്റി അംഗങ്ങളും സംബന്ധിച്ചു.
​ഐഒഎസ് (iOS), ആൻഡ്രോയിഡ് (Android) പ്ലാറ്റ്‌ഫോമുകളിൽ ഇപ്പോൾ ഈ ആപ്ലിക്കേഷൻ ലഭ്യമാണ്. ഖത്തറിലെ ഇന്ത്യൻ സമൂഹത്തിന് അവരുടെ സാംസ്‌കാരികവും സാമൂഹികവുമായ ആവശ്യങ്ങൾക്ക് ഈ ആപ്പ് വലിയൊരു മുതൽക്കൂട്ടാകുമെന്ന് ഐസിസി ഭാരവാഹികൾ അറിയിച്ചു.