വാഷിങ്ടൺ: അമേരിക്കൻ ഇടക്കാല തിരഞ്ഞെടുപ്പിൽ ഇന്ത്യൻ വംശജയായ അരുണ മില്ലറിന് തിളക്കമാർന്ന വിജയം. മേരിലൻഡ് സംസ്ഥാനത്തെ ലഫ്റ്റനന്റ് ഗവർണർ സ്ഥാനത്തേക്ക് വീണ്ടും തിരഞ്ഞെടുക്കപ്പെട്ടതോടെ രണ്ടാം തവണയും അവർ പദവിയിലെത്തും. ഗവർണർ വെസ് മൂറിനൊപ്പം മത്സരിച്ച അരുണ മില്ലർ, റിപ്പബ്ലിക്കൻ സ്ഥാനാർഥികളായ ഡാൻ കോക്സിനെയും റോബ് ക്രോപ്പിനെയും പരാജയപ്പെടുത്തി.

മേരിലൻഡിൽ ഏറെ ശ്രദ്ധിക്കപ്പെട്ട ഗവർണർ തിരഞ്ഞെടുപ്പിൽ ഡെമോക്രാറ്റിക് സഖ്യത്തിന് അധികാരം നിലനിർത്താനായി. സംസ്ഥാന തിരഞ്ഞെടുപ്പ് ബോർഡ് പുറത്തുവിട്ട കണക്കുകൾ പ്രകാരം വെസ് മൂർ–അരുണ മില്ലർ സഖ്യത്തിന് 7,61,368 വോട്ടുകളാണ് ലഭിച്ചത്. ആകെ വോട്ടിന്റെ 62.62 ശതമാനമാണിത്. റിപ്പബ്ലിക്കൻ സഖ്യത്തിന് 4,06,637 വോട്ടുകൾ ലഭിച്ചു.

ഹൈദരാബാദിൽ ജനനം, അമേരിക്കയിൽ രാഷ്ട്രീയ നേട്ടം

1964 നവംബർ ആറിന് ഹൈദരാബാദിലാണ് അരുണ മില്ലർ ജനിച്ചത്. ഏഴാം വയസ്സിൽ കുടുംബത്തോടൊപ്പം അമേരിക്കയിലേക്ക് കുടിയേറി. മിസോറി യൂണിവേഴ്‌സിറ്റി ഓഫ് സയൻസ് ആൻഡ് ടെക്‌നോളജിയിൽ സിവിൽ എൻജിനീയറിങ് പഠിച്ച അവർ 1989ൽ ബിരുദം നേടി.

2010ലാണ് അരുണ മില്ലർ രാഷ്ട്രീയരംഗത്ത് സജീവമായത്. 2010 മുതൽ 2018 വരെ മേരിലൻഡ് ഹൗസ് ഓഫ് ഡെലിഗേറ്റ്സിൽ ഡിസ്ട്രിക്ട് 15നെ പ്രതിനിധീകരിച്ചു. 2022ൽ വെസ് മൂറിനൊപ്പം ഡെമോക്രാറ്റിക് സ്ഥാനാർഥിയായി മത്സരിച്ചതോടെയാണ് അവരുടെ രാഷ്ട്രീയജീവിതത്തിൽ നിർണായക വഴിത്തിരിവുണ്ടായത്.

2022 നവംബർ എട്ടിന് നടന്ന തിരഞ്ഞെടുപ്പിൽ വിജയിച്ച അരുണ മില്ലർ 2023 ജനുവരിയിൽ ചുമതലയേറ്റു. മേരിലൻഡിന്റെ പത്താമത്തെ ലഫ്റ്റനന്റ് ഗവർണറായ അവർ, സംസ്ഥാനതല പദവിയിലേക്ക് തിരഞ്ഞെടുക്കപ്പെടുന്ന ആദ്യ വനിതാ കുടിയേറ്റക്കാരിയും ആദ്യ നിറവ്യത്യാസമുള്ള വനിതയുമായി ചരിത്രം സൃഷ്ടിച്ചു. സത്യപ്രതിജ്ഞാ ചടങ്ങിൽ ഹിന്ദുമതഗ്രന്ഥമായ ഭഗവദ്ഗീതയിൽ കൈവെച്ചാണ് അവർ അധികാരമേറ്റത്.

അടിസ്ഥാന സൗകര്യ വികസനം, ഗതാഗത പദ്ധതികൾ, സാമ്പത്തിക വളർച്ച, തൊഴിലാളി കുടുംബങ്ങൾക്കുള്ള കൂടുതൽ അവസരങ്ങൾ എന്നിവയ്ക്കാണ് ഭരണകാലത്ത് അരുണ മില്ലർ മുൻഗണന നൽകിയത്.

വോട്ടർമാർക്ക് നന്ദി അറിയിച്ച് മൂറും മില്ലറും

വിജയം ഉറപ്പായതിനു പിന്നാലെ വീണ്ടും വിശ്വാസമർപ്പിച്ച മേരിലൻഡ് ജനതയ്ക്ക് ഗവർണർ വെസ് മൂർ നന്ദി അറിയിച്ചു. വിദ്യാഭ്യാസമേഖലയിലെ പുരോഗതി, ദാരിദ്ര്യനിർമാർജനം, സാമ്പത്തിക അവസരങ്ങളുടെ വിപുലീകരണം തുടങ്ങിയ ലക്ഷ്യങ്ങൾക്കായി തുടർന്നും പ്രവർത്തിക്കുമെന്നും അദ്ദേഹം വ്യക്തമാക്കി.

ജനങ്ങളോടൊപ്പം പ്രവർത്തിക്കാൻ വീണ്ടും അവസരം നൽകിയ വോട്ടർമാർക്ക് അരുണ മില്ലറും നന്ദി അറിയിച്ചു. ഗവർണർ വെസ് മൂറിനൊപ്പം മേരിലൻഡിലെ ജനങ്ങൾക്കായി പ്രവർത്തനം തുടരാൻ ആഗ്രഹിക്കുന്നുവെന്നും അവർ പറഞ്ഞു.

'വീണ്ടും ഞങ്ങളിൽ വിശ്വാസമർപ്പിച്ച മേരിലൻഡിലെ ജനങ്ങളോട് ഗവർണർ മൂറും ഞാനും ഏറെ കടപ്പെട്ടിരിക്കുന്നു. കഠിനാധ്വാനം ചെയ്ത സന്നദ്ധപ്രവർത്തകർ, പ്രചാരണസംഘങ്ങൾ, പിന്തുണ നൽകിയ കുടുംബങ്ങൾ എന്നിവർക്കും നന്ദി. മേരിലൻഡിലെ ജനങ്ങളെ സേവിക്കാൻ കഴിയുന്നതാണ് ലോകത്തിലെ ഏറ്റവും മികച്ച ജോലിയെന്ന് ഞാൻ എപ്പോഴും വിശ്വസിക്കുന്നു. വീണ്ടും പ്രവർത്തനരംഗത്തേക്ക് മടങ്ങാൻ കാത്തിരിക്കുകയാണ്' എന്നായിരുന്നു അരുണ മില്ലറുടെ പ്രതികരണം. 

ഇന്ത്യൻ വംശജർക്ക് നേട്ടവും തിരിച്ചടിയും

അമേരിക്കയിലെ ഇടക്കാല തിരഞ്ഞെടുപ്പിൽ ഇന്ത്യൻ വംശജരായ സ്ഥാനാർഥികളുടെ പ്രകടനവും ശ്രദ്ധേയമായി. ഫ്ലോറിഡയിൽനിന്ന് ജനപ്രതിനിധി സഭയിലേക്ക് മത്സരിച്ച ഡെമോക്രാറ്റ് സ്ഥാനാർഥി പിയ ദണ്ഡിയ വിജയിച്ചു. റിപ്പബ്ലിക്കൻ സ്ഥാനാർഥി കേസി അസ്കറിനെയാണ് അവർ പരാജയപ്പെടുത്തിയത്.

വെർജീനിയയിൽനിന്ന് മത്സരിച്ച ഇന്ത്യൻ വംശജൻ സുഹാസ് സുബ്രഹ്മണ്യവും വീണ്ടും ജനപ്രതിനിധി സഭയിലെത്തി. 1,73,106 വോട്ടുകൾ നേടിയ സുബ്രഹ്മണ്യം റിപ്പബ്ലിക്കൻ എതിരാളിയെ 94,990 വോട്ടുകളിൽ ഒതുക്കി.

അതേസമയം, ഒഹായോ ഗവർണർ തിരഞ്ഞെടുപ്പിൽ ഇന്ത്യൻ വംശജനായ റിപ്പബ്ലിക്കൻ സ്ഥാനാർഥി വിവേക് രാമസ്വാമിക്ക് തിരിച്ചടിയേറ്റു. ഡെമോക്രാറ്റ് സ്ഥാനാർഥി ആമി ആക്റ്റനാണ് ഇവിടെ വിജയിച്ചത്. റോ ഖന്ന, അമി ബേര, പ്രമീള ജയപാൽ തുടങ്ങിയ ഇന്ത്യൻ വംശജരും മത്സര രം​ഗത്തുണ്ടായിരുന്നു.