റിയാദ്: സൗദി അറേബ്യയെ ലക്ഷ്യമിട്ട് യെമനിലെ ഹൂതി വിമതർ നടത്തിയ മിസൈൽ–ഡ്രോൺ ആക്രമണശ്രമം തകർത്തതായി സൗദി നേതൃത്വത്തിലുള്ള സഖ്യസേന. ഇന്ന് പുലർച്ചെയായിരുന്നു ആക്രമണശ്രമം. ഖമീസ് മുഷൈത് ലക്ഷ്യമാക്കി എത്തിയ രണ്ട് ബാലിസ്റ്റിക് മിസൈലുകളും റിയാദിന് നേരെ അയച്ച രണ്ട് ഡ്രോണുകളുമാണ് ആകാശത്തുവച്ച് സഖ്യസേന തകർത്തത്.
സഖ്യസേനാ വക്താവ് കേണൽ തുർക്കി അൽ മാലികിയാണ് ഇക്കാര്യം എക്സിലൂടെ അറിയിച്ചത്. ആക്രമണത്തിൽ ലക്ഷ്യമിട്ട പ്രദേശങ്ങളിൽ കാര്യമായ നാശനഷ്ടങ്ങളോ ആളപായമോ റിപ്പോർട്ട് ചെയ്തിട്ടില്ലെന്നാണ് ലഭിക്കുന്ന വിവരം.
ഹൂതി ആക്രമണസാധ്യത കണക്കിലെടുത്ത് ഖമീസ് മുഷൈത്, അബഹ മേഖലകളിൽ സൗദി സിവിൽ ഡിഫൻസ് രാത്രി തന്നെ ജാഗ്രതാ നിർദേശം നൽകിയിരുന്നു. എന്നാൽ റിയാദ് നഗരത്തിൽ പ്രത്യേക ജാഗ്രതാ നിർദേശം പുറപ്പെടുവിച്ചിരുന്നില്ല.
ഹൂതികളുടെ പുതിയ ആക്രമണശ്രമത്തിന് പിന്നാലെ സൗദിയിലെ വിവിധ മേഖലകളിൽ സുരക്ഷാ സംവിധാനങ്ങൾ കൂടുതൽ ശക്തമാക്കിയിട്ടുണ്ട്. മേഖലയിൽ സംഘർഷസാധ്യത തുടരുന്നതിനിടെ സുരക്ഷാ ഏജൻസികൾ സ്ഥിതിഗതികൾ നിരീക്ഷിച്ചുവരികയാണ്.
