കോഴിക്കോട്: പ്രതിപക്ഷ നേതാവ് വി.ഡി. സതീശൻ നയിക്കുന്ന യു.ഡി.എഫ് 'പുതുയുഗ യാത്ര'യുടെ ഭാഗമായി കുറ്റ്യാടിയിൽ നടന്ന സ്വീകരണ പരിപാടിയിൽ കല്ലുകടിയായി വേദിയിലെ കൈയാങ്കളി. പരിപാടിയിൽ ഷാഫി പറമ്പിൽ എം.പിക്ക് പ്രസംഗിക്കാൻ അവസരം ലഭിക്കാത്തതിനെത്തുടർന്നുണ്ടായ തള്ളും ബഹളവുമാണ് യാത്രയുടെ ശോഭ കെടുത്തിയത്. കോൺഗ്രസ് വേദികളിൽ പതിവായുള്ള സ്റ്റേജ് അച്ചടക്കമില്ലായ്മ ഇവിടെയും ആവർത്തിച്ചെന്നാണ് ഉയരുന്ന വിമർശനം.
വിശദീകരണവുമായി ഡി.സി.സി; 'ഇതൊരു സ്നേഹത്തള്ളൽ'
വേദിയിലുണ്ടായ സംഭവങ്ങൾ രാഷ്ട്രീയ എതിരാളികൾ ആയുധമാക്കിയതോടെ വിശദീകരണവുമായി ഡി.സി.സി പ്രസിഡന്റ് കെ. പ്രവീൺ കുമാർ രംഗത്തെത്തി. കുറ്റ്യാടിയിലുണ്ടായത് കേവലം 'സ്നേഹത്തള്ളൽ' മാത്രമാണെന്നും ഷാഫി പറമ്പിലിന് ഇതിൽ യാതൊരു നീരസവുമില്ലെന്നും അദ്ദേഹം പറഞ്ഞു. സമയം വൈകിയതിനാലുണ്ടായ തിരക്ക് മാത്രമാണിതെന്നും അദ്ദേഹം കൂട്ടിച്ചേർത്തു. എന്നാൽ, സ്വന്തം മണ്ഡലത്തിലെ പരിപാടിയിൽ എം.പി കൂടുതൽ ജാഗ്രത കാണിക്കണമായിരുന്നു എന്ന അഭിപ്രായം പാർട്ടിയിലെ ഒരു വിഭാഗത്തിനുണ്ട്.
സതീശന്റെ പ്രതികരണം
ജാഥയുടെ വിജയത്തിൽ അസൂയ പൂണ്ടവരാണ് ഇല്ലാത്ത കാര്യങ്ങൾ ഊതിവീർപ്പിക്കുന്നതെന്ന് വി.ഡി. സതീശൻ പ്രതികരിച്ചു. വേദിയിൽ സംഘർഷമുണ്ടായെന്നും മുല്ലപ്പള്ളി രാമചന്ദ്രൻ വീണെന്നുമുള്ള പ്രചാരണം അദ്ദേഹം തള്ളി. മുല്ലപ്പള്ളി കസേരയിൽ നിന്ന് എഴുന്നേറ്റ് ഇരിക്കുക മാത്രമാണ് ചെയ്തതെന്ന് സതീശൻ മാധ്യമങ്ങളോട് പറഞ്ഞു. എങ്കിലും, യാത്രയ്ക്കിടെയുണ്ടായ ഈ അസ്വാരസ്യങ്ങളിൽ പ്രതിപക്ഷ നേതാവ് വലിയ അതൃപ്തിയിലാണ്.
അച്ചടക്കം വേണമെന്ന് മുല്ലപ്പള്ളി
പാർട്ടി പരിപാടികളിൽ സംഘാടകർ അച്ചടക്കവും നിയന്ത്രണവും പാലിക്കണമെന്ന് മുൻ കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രൻ ഓർമ്മിപ്പിച്ചു.
"ചെറിയ ബഹളം കേട്ടപ്പോൾ ഞാൻ എഴുന്നേറ്റു നോക്കി എന്നല്ലാതെ വീണിട്ടില്ല. സ്വന്തം മണ്ഡലത്തിലെ പരിപാടിയിൽ സംസാരിക്കാൻ ഷാഫിക്ക് ആഗ്രഹമുണ്ടാകുന്നത് സ്വാഭാവികമാണ്. എന്തുകൊണ്ടാണ് അദ്ദേഹത്തെ നേരത്തെ വിളിക്കാതിരുന്നതെന്ന് അറിയില്ല." - മുല്ലപ്പള്ളി രാമചന്ദ്രൻ
കർശന പ്രോട്ടോക്കോൾ വരുന്നു
സംഭവം വിവാദമായതോടെ ഇനിയുള്ള സ്വീകരണ വേദികളിൽ കൃത്യമായ പ്രോട്ടോക്കോൾ പാലിക്കണമെന്ന് കെ.പി.സി.സി പ്രസിഡന്റ് ജില്ലാ പ്രസിഡന്റുമാർക്ക് കർശന നിർദ്ദേശം നൽകിയിട്ടുണ്ട്. സ്റ്റേജിലെ തിരക്ക് നിയന്ത്രിക്കാനും പ്രസംഗകരുടെ പട്ടിക മുൻകൂട്ടി നിശ്ചയിക്കാനും സംഘാടകർക്ക് നിർദ്ദേശം ലഭിച്ചു.
