പേരാമ്പ്ര: ഓപ്പറേഷൻ മൺസൂണിന്റെ ഭാഗമായി ഭക്ഷ്യസുരക്ഷാ വകുപ്പ് നടത്തിയ പരിശോധനയിൽ വൻ ക്രമക്കേടുകൾ കണ്ടെത്തിയതിനെ തുടർന്ന് പേരാമ്പ്രയിലെ സമൂസ നിർമാണ യൂണിറ്റ് അടച്ചുപൂട്ടി. വൃത്തിഹീനമായ സാഹചര്യത്തിൽ നിർമിച്ചിരുന്ന ആയിരത്തോളം സമൂസകളും ഉദ്യോഗസ്ഥർ നശിപ്പിച്ചു.
കുരുടിമുക്കിലെ കോഫി ഇൻ സ്ഥാപനത്തിലായിരുന്നു പരിശോധന. നിർമാണ യൂണിറ്റിലെ തൊഴിലാളികൾക്ക് മെഡിക്കൽ ഫിറ്റ്നസ് സർട്ടിഫിക്കറ്റോ മറ്റ് ആരോഗ്യപരിശോധന രേഖകളോ ഇല്ലെന്ന് പരിശോധനയിൽ വ്യക്തമായി. കൂടാതെ, ഉൽപാദനത്തിനായി ഉപയോഗിച്ചിരുന്ന വെള്ളത്തിന്റെ ഗുണനിലവാര പരിശോധന റിപ്പോർട്ടും ഹാജരാക്കാനായില്ല.
നിർമാണ കേന്ദ്രം അതീവ വൃത്തിഹീനമായ സാഹചര്യത്തിലായിരുന്നെന്നും എലി, പൂച്ച, പാമ്പ് തുടങ്ങിയ ജീവികൾക്ക് എളുപ്പത്തിൽ പ്രവേശിക്കാവുന്ന വിധത്തിൽ കെട്ടിടവും പരിസരവും സുരക്ഷിതമല്ലാത്ത നിലയിലായിരുന്നെന്നും ഭക്ഷ്യസുരക്ഷാ വകുപ്പ് അറിയിച്ചു.
ഭക്ഷ്യവസ്തുക്കൾ തയ്യാറാക്കുന്നതിനും കൈകാര്യം ചെയ്യുന്നതിനും തൊഴിലാളികൾ ഗ്ലൗസ്, ഹെഡ് ക്യാപ് തുടങ്ങിയ വ്യക്തിഗത ശുചിത്വ സുരക്ഷാ ഉപകരണങ്ങൾ ഉപയോഗിച്ചിരുന്നില്ലെന്നും ഇത് ഗുരുതരമായ ഭക്ഷ്യസുരക്ഷാ ലംഘനമാണെന്നും ഉദ്യോഗസ്ഥർ ചൂണ്ടിക്കാട്ടി.
പേരാമ്പ്ര ഭക്ഷ്യസുരക്ഷാ ഓഫീസർ ഡോ. വിജി വിൽസണിന്റെയും പി. അഭിനന്ദിന്റെയും നേതൃത്വത്തിലായിരുന്നു പരിശോധന.
