​ദോഹ: മഷൈറെബ് മ്യൂസിയംസും സിദ്ര മെഡിസിനും സംയുക്തമായി സംഘടിപ്പിക്കുന്ന 2026-ലെ 'സയൻസ് കഫേ' പരമ്പരയുടെ നാലാമത് സെഷൻ ബൈത്ത് ബിൻ ജൽമൂദിൽ വെച്ച് നടന്നു. "ബിയോണ്ട് ദി ലേബൽ: മെഡിക്കേഷൻസ് ആൻഡ് ഡയറ്ററി സപ്ലിമെന്റ്സ്" (Beyond the Label: Medications and Dietary Supplements) എന്ന വിഷയത്തിലായിരുന്നു സംവാദം സംഘടിപ്പിച്ചത്. പൊതുജനങ്ങളുടെ വലിയ പങ്കാളിത്തമാണ് ചടങ്ങിൽ ദൃശ്യമായത്.  
കുറിപ്പടി മരുന്നുകളുടെയും ആഹാരപൂരകങ്ങളുടെയും (Dietary Supplements) സുരക്ഷിതമായ ഉപയോഗത്തെക്കുറിച്ചും ദിനചര്യയിൽ അവയുടെ പങ്കിനെക്കുറിച്ചും വിദഗ്ദ്ധർ വിശദീകരിച്ചു. സ്വയം മരുന്ന് കഴിക്കുന്ന രീതികൾ വർദ്ധിച്ചുവരുന്ന പശ്ചാത്തലത്തിൽ, രോഗികളും ആരോഗ്യപ്രവർത്തകരും തമ്മിൽ കൃത്യവും ശാസ്ത്രീയവുമായ ആശയവിനിമയം ഉറപ്പാക്കേണ്ടതിന്റെ ആവശ്യകത ചർച്ചയിൽ ഊന്നിപ്പറഞ്ഞു. വിറ്റാമിനുകൾ, മിനറലുകൾ, ഔഷധസസ്യ ഉൽപ്പന്നങ്ങൾ എന്നിവയുടെ കാര്യക്ഷമതയും അവയുടെ സുരക്ഷിതമായ നിയന്ത്രണവും വിലയിരുത്തി. വ്യക്തികളുടെ ജനിതക ഘടനയ്ക്കനുസരിച്ച് മരുന്നുകളുടെ അളവ് നിർണ്ണയിക്കുന്ന ശാസ്ത്രീയ രീതികളെക്കുറിച്ചും അത് ചികിത്സാരംഗത്ത് ഉണ്ടാക്കുന്ന പുരോഗതികളെക്കുറിച്ചും വിശദമായ സംവാദം നടന്നു.  
​ഇറാദ ഫിറ്റ്നസിലെ ഇബ്രാഹിം അൽ-സനൂസി മോഡറേറ്ററായ ചർച്ചയിൽ അസ്പറ്റാറിലെ റിസർച്ച് ആൻഡ് സയന്റിഫിക് സപ്പോർട്ട് എക്സിക്യൂട്ടീവ് ഡയറക്ടർ പ്രൊഫസർ മാർക്കോ കർഡിനാലി, ഹമദ് മെഡിക്കൽ കോർപ്പറേഷനിലെ ഡോ. അനസ് ഹമദ്, സിദ്ര മെഡിസിനിലെ ഫത്തിയ അസ്ഹർ, ഡോ. സാറ ടോമി, ഡോ. അനലിസ തിയാനിഗ്ര എന്നിവർ പങ്കെടുത്തു.  
​പൊതുജനങ്ങളിൽ ആരോഗ്യ അവബോധം വളർത്തുന്നതിനും ശാസ്ത്രീയ വിഷയങ്ങൾ ലളിതമായി എത്തിക്കുന്നതിനും 'സയൻസ് കഫേ' മികച്ചൊരു വേദിയാണെന്ന് മഷൈറെബ് മ്യൂസിയംസ് ഓപ്പറേഷൻസ് ഡയറക്ടർ മുഹമ്മദ് അൽ- യൂസഫും സിദ്ര മെഡിസിൻ റിസർച്ച് ഡയറക്ടർ ഡോ. സഹർ അൽ-ദാസും വ്യക്തമാക്കി.