ദോഹ: ഈ വർഷത്തെ വിശുദ്ധ ഹജ്ജ് കർമ്മത്തിന് പുറപ്പെടുന്ന പ്രമേഹ രോഗികളായ തീർഥാടകർക്കായി പ്രൈമറി ഹെൽത്ത് കെയർ കോർപ്പറേഷനും (PHCC) ഖത്തർ ഡയബറ്റിസ് അസോസിയേഷനും (QDA) സംയുക്തമായി ബോധവത്കരണ പരിപാടി സംഘടിപ്പിച്ചു. 'പ്രമേഹത്തിനൊപ്പം സുരക്ഷിതമായ ഹജ്ജ്' (Safe Haj with Diabetes) എന്ന പ്രമേയത്തിൽ സംഘടിപ്പിച്ച പരിപാടിയിൽ പി.എച്ച്.സി.സി.യുടെ ഓറൽ ഹെൽത്ത് പ്രൊമോഷൻ ആൻഡ് പ്രിവൻഷൻ വിഭാഗത്തിലെ ദന്തഡോക്ടർമാരുടെ സംഘം പങ്കെടുത്തു.
പ്രമേഹ രോഗികൾക്ക് പൊതുവായ ആരോഗ്യസംരക്ഷണത്തോടൊപ്പം ദന്തസംരക്ഷണവും ഏറെ പ്രധാനമാണെന്ന് ഓർമ്മിപ്പിക്കാനാണ് ഈ പരിപാടി ലക്ഷ്യമിട്ടതെന്ന് പി.എച്ച്.സി.സി ഓറൽ ഹെൽത്ത് പ്രൊമോഷൻ വിഭാഗം മാനേജർ ഡോ. നജാത് അൽ യാഫി പറഞ്ഞു. പല്ലുകൾ ശരിയായ രീതിയിൽ വൃത്തിയാക്കേണ്ട വിധം, അണുബാധ തടയൽ, ഹജ്ജ് വേളയിൽ ഉണ്ടാകാൻ സാധ്യതയുള്ള അടിയന്തര ദന്തപ്രശ്നങ്ങൾ എങ്ങനെ കൈകാര്യം ചെയ്യാം തുടങ്ങിയ കാര്യങ്ങളിൽ തീർഥാടകർക്ക് പ്രായോഗിക നിർദേശങ്ങൾ നൽകി.
യാത്ര പുറപ്പെടുന്നതിന് മുൻപ് ദന്തപരിശോധന നടത്തേണ്ടതിന്റെ പ്രാധാന്യവും ചടങ്ങിൽ ഊന്നിപ്പറഞ്ഞു. ഇത് ഹജ്ജ് വേളയിലെ അപ്രതീക്ഷിത ആരോഗ്യ സങ്കീർണ്ണതകൾ ഒഴിവാക്കാൻ സഹായിക്കും. പരിപാടിയുടെ ഭാഗമായി സജ്ജീകരിച്ചിരുന്ന മൊബൈൽ ക്ലിനിക്കിലൂടെ തീർഥാടകർക്ക് നേരിട്ടുള്ള ദന്തപരിശോധനയും വിദഗ്ധ ഉപദേശങ്ങളും ലഭ്യമാക്കി.
