ശബരിമല സ്ത്രീപ്രവേശനത്തെ സ്ത്രീകൾ എതിർത്തത് സ്ത്രീമുന്നേറ്റത്തിലെ വൈരുധ്യമെന്ന പരാമർശവുമായി കേരള ഹൈക്കോടതി. ഹേമ കമ്മിറ്റി റിപ്പോർട്ടുമായി ബന്ധപ്പെട്ട ഹർജി പരിഗണിക്കവെയാണ് ജസ്റ്റിസ് ഡോ. എ.കെ. ജയശങ്കരൻ നമ്പ്യാരും ജസ്റ്റിസ് സി.എസ്. സുധയുമടങ്ങിയ ഡിവിഷൻ ബെഞ്ച് ഇക്കാര്യം പരാമർശിച്ചത്. ശബരിമല സ്ത്രീ പ്രവേശനവുമായി ബന്ധപ്പെട്ട സുപ്രീംകോടതി ഉത്തരവ് കേരളത്തിലെ സ്ത്രീമുന്നേറ്റത്തിന് പുതിയൊരുമാനം നൽകിയെന്നും കോടതി അഭിപ്രായപ്പെട്ടു.
പൊതുഇടങ്ങളിൽ സ്ത്രീമുന്നേറ്റത്തിന്റെ കാര്യത്തിൽ വലിയ പുരോഗതിയുണ്ടായി. എന്നാൽ, സ്വകാര്യയിടങ്ങളിൽ ഇത്തരമൊരു മാറ്റമില്ല എന്നും കോടതി പറഞ്ഞു. വീടുകളിൽനിന്നാണ് മാറ്റം തുടങ്ങേണ്ടതെന്നും സ്ത്രീശക്തിയെ തിരിച്ചറിയണമെന്നും കോടതി അഭിപ്രായപ്പെട്ടു.
പൊതുവിടങ്ങളിലെ മുന്നേറ്റത്തിന് ചരിത്രപരമായ കാരണങ്ങളുണ്ട്. മത-ജാതീയ അടിച്ചമർത്തലുകൾക്കെതിരായ പോരാട്ടങ്ങൾക്കൊപ്പം സ്ത്രീകൾക്കുനേരെയുള്ള അടിച്ചമർത്തലുകൾക്കെതിരേയും മുന്നേറ്റങ്ങളുണ്ടായി. ഈ പോരാട്ടങ്ങളുടെ മുൻനിരയിൽ സ്ത്രീകളുമുണ്ടായിരുന്നു. എന്നാൽ, വീടുകളിലേക്കും മതങ്ങളിലേക്കും എത്തുമ്പോൾ അവിടെ കാര്യമായ മുന്നേറ്റമുണ്ടായെന്നു പറയാനാകില്ല. സ്ത്രീശക്തിയെ അവർ തിരിച്ചറിയണം-ഡിവിഷൻ ബെഞ്ച് വാക്കാൽ അഭിപ്രായപ്പെട്ടു.
