ശബരിമലയിലെ ദേവസ്വം ഭണ്ഡാരത്തിൽ കാണിക്കയായി ലഭിക്കുന്ന നാണയങ്ങൾ എണ്ണി തിട്ടപ്പെടുത്താൻ ആളില്ല. പണം എണ്ണുന്നതിനായി ആവശ്യമായ ജീവനക്കാരില്ലാത്തതിനാൽ ഭണ്ഡാരങ്ങളിൽ പണം കുന്നുകൂടുകയാണ് എന്നാണ് റിപ്പോർട്ട്. ദേവസ്വത്തിൽ നിലവിൽ 175 ജീവനക്കാരുടെ ഒഴിവുകളുണ്ട്. പണം എണ്ണാൻ സ്ഥിരം ജീവനക്കാരില്ലെന്നതാണ് സ്ഥിതിഗതികൾ സങ്കീർണ്ണമാക്കുന്നത്.

താൽക്കാലിക ജീവനക്കാരെ നിയമിച്ച് പ്രശ്നം പരിഹരിക്കാൻ ശ്രമിച്ചെങ്കിലും ആവശ്യത്തിന് ആളുകളെ കണ്ടെത്താൻ കഴിയുന്നില്ല. ഇതിന്റെ ഫലമായി, ദിവസേന കാണിക്കവഞ്ചി തുറക്കുമ്പോൾ നോട്ടുകൾ വേർതിരിച്ചെടുത്ത ശേഷം നാണയങ്ങൾ ഭണ്ഡാരത്തിന്റെ ഒരുഭാഗത്തേക്ക് മാറ്റിവയ്ക്കുകയാണ് ചെയ്യുന്നത്. മണ്ഡലകാലത്തെ നാണയങ്ങൾക്കൊപ്പം മകരവിളക്ക് കൂടി കഴിയുന്നതോടെ ലക്ഷക്കണക്കിന് രൂപയുടെ നാണയങ്ങളാകും ഭണ്ഡാരങ്ങളിലുണ്ടാകുക,

തീർഥാടന കാലത്ത് സന്നിധാനം, പമ്പ, നിലയ്ക്കൽ തുടങ്ങിയ കേന്ദ്രങ്ങളിലെ സേവനത്തിനായി സാധാരണയായി 2000 താൽക്കാലിക ജീവനക്കാരെയാണ് ദേവസ്വം നിയമിക്കുന്നത്. ഈ വർഷം പലതവണ അപേക്ഷ ക്ഷണിച്ചെങ്കിലും പ്രതികരണം കുറവായിരുന്നു. സെക്യൂരിറ്റി ഒഴികെയുള്ള താൽക്കാലിക ജീവനക്കാർക്ക് പ്രതിദിനം 650 രൂപയും സൗജന്യ താമസവും ഭക്ഷണവുമാണ് വാഗ്ദാനം ചെയ്തിരുന്നത്. സെക്യൂരിറ്റി ജോലിക്ക് 900 രൂപ ദിവസ വേതനവും താമസ-ഭക്ഷണ സൗകര്യവും വേറെയും. എന്നാൽ ഇത്തവണ 1750 പേർ മാത്രമാണ് അപേക്ഷിച്ചത്. ഇവരിൽ 1632 പേർക്ക് നിയമനം നൽകിയെങ്കിലും, സന്നിധാനത്ത് എത്തിയ ശേഷം 50 പേർ ജോലിയൊഴിഞ്ഞ് മടങ്ങിപ്പോയതായാണ് റിപ്പോർട്ട്.

മകരവിളക്കിന് നട തുറന്നതിന് ശേഷം തീർഥാടകരുടെ വൻ തിരക്കാണ് അനുഭവപ്പെട്ടത്. ഇതോടെ കാണിക്ക ഇനത്തിൽ ലഭിക്കുന്ന വരുമാനവും വർധിച്ചു. ജീവനക്കാരുടെ കുറവിനൊപ്പം വരുമാനം കുത്തനെ ഉയർന്നതോടെ, നാണയം എണ്ണാനുള്ള പ്രതിസന്ധി കൂടുതൽ രൂക്ഷമായി. നിലവിലെ സാഹചര്യത്തിൽ മകരവിളക്ക് കഴിഞ്ഞ് നട അടച്ചാലും, കാണിക്ക പൂർണമായി എണ്ണി തീർക്കാൻ കഴിയില്ലെന്ന ആശങ്ക ദേവസ്വം അധികൃതർക്കുണ്ട്.

റോബോട്ടിക് സംവിധാനം നടപ്പായില്ല

കാണിക്ക എണ്ണുന്നതിന് റോബോട്ടിക് സംവിധാനം ഉപയോഗിക്കാനുള്ള പദ്ധതി 2023ൽ ദേവസ്വം ബോർഡ് തയ്യാറാക്കിയിരുന്നു. അന്നത്തെ പ്രസിഡന്റ് കെ. അനന്തഗോപന്റെ നേതൃത്വത്തിൽ തിരുപ്പതി സന്ദർശിച്ച് ഈ സംവിധാനത്തിന്റെ പ്രവർത്തനം പഠിക്കുകയും, അത് വിജയകരമാണെന്ന് കണ്ടെത്തുകയും ചെയ്തിരുന്നു. ഇതിന്റെ അടിസ്ഥാനത്തിൽ ഇവിടെയും പദ്ധതി നടപ്പാക്കാൻ തീരുമാനിച്ചിരുന്നു.

എന്നാൽ പിന്നീട് അനന്തഗോപന്റെ കാലാവധി അവസാനിക്കുകയും, തുടർന്ന് അധികാരത്തിലെത്തിയ ദേവസ്വം ബോർഡിന് ഈ പദ്ധതിയിൽ താൽപര്യം കാണിക്കാതിരിക്കുകയും ചെയ്തതോടെ, റോബോട്ടിക് സംവിധാനം നടപ്പാകാതെ പോയി.

അടിയന്തര നടപടി

കഴിഞ്ഞ രണ്ട് വർഷമായി താൽക്കാലിക ജീവനക്കാരെ ഭണ്ഡാരത്തിൽ നിയോഗിച്ചാണ് കാണിക്ക എണ്ണൽ നടന്നിരുന്നത്. എന്നാൽ നിലവിലെ പ്രതിസന്ധി കണക്കിലെടുത്ത്, എല്ലാ ദിവസവും ഉച്ചയ്ക്ക് 2 മുതൽ 4 വരെ സന്നിധാനത്തെ എല്ലാ ഡ്യൂട്ടി പോയിന്റുകളിൽ നിന്നും 10 ജീവനക്കാരെ വീതം നാണയം എണ്ണുന്നതിനായി ഭണ്ഡാരത്തിലേക്ക് അയയ്ക്കണമെന്ന് ദേവസ്വം എക്സിക്യൂട്ടീവ് ഓഫീസർ നിർദേശം നൽകിയിട്ടുണ്ട്.