തിരുവനന്തപുരം: ശബരിമല ശ്രീകോവിലിലെ ദ്വാരപാലക ശിൽപ്പങ്ങളിലും കട്ടിളപ്പാളിയിലും നടന്ന വൻ സ്വർണക്കൊള്ളയുടെ ഞെട്ടിക്കുന്ന വിവരങ്ങൾ ശാസ്ത്രീയ പരിശോധനയിലൂടെ പുറത്ത്. ഭൂരിഭാഗം ഒറിജിനൽ സ്വർണവും തട്ടിയെടുത്ത ശേഷം, തട്ടിപ്പ് മറയ്ക്കാനായി മുകളിൽ നേർത്ത രീതിയിൽ മാത്രം സ്വർണം പൂശിയാണ് പ്രതികൾ ദേവസ്വം ബോർഡിനെ തിരിച്ചേൽപ്പിച്ചതെന്ന് കണ്ടെത്തി. ജംഷഡ്പൂരിലെ നാഷണൽ മെറ്റലർജിക്കൽ ലബോറട്ടറിയിൽ നടത്തിയ അത്യാധുനിക ശാസ്ത്രീയ പരിശോധനയിലാണ് ഈ നിർണായക വിവരങ്ങൾ പുറത്തുവന്നത്. പരിശോധനാ ഫലം പ്രത്യേക അന്വേഷണ സംഘത്തിന്  കൈമാറിയിട്ടുണ്ട്.
​വിജയ് മല്യ നൽകിയ സ്വർണം മുക്കി; തട്ടിപ്പ് ഇങ്ങനെ:
​തുടക്കം 1998-ൽ: യു.ബി ഗ്രൂപ്പ് മുൻ ചെയർമാൻ വിജയ് മല്യ 1998-ലാണ് ശബരിമല ശ്രീകോവിലിനൊപ്പം ദ്വാരപാലക ശിൽപ്പങ്ങളും വൻതോതിൽ സ്വർണം പൂശി സമർപ്പിച്ചത്.
​2019-ലെ മറവിൽ കൊള്ള: വർഷങ്ങൾ കഴിഞ്ഞ് ഇതിന്റെ നിറം മങ്ങിയപ്പോൾ, 2019-ൽ വീണ്ടും സ്വർണം പൂശാനായി ഉണ്ണിക്കൃഷ്ണൻ പോറ്റിയെ ചുമതലപ്പെടുത്തി. ഈ ഘട്ടത്തിലാണ് വൻ കൊള്ള നടന്നതെന്നാണ് സൂചന.
​രാസപ്രക്രിയയിലൂടെ സ്വർണം കടത്തി: പ്രതികൾ ശിൽപ്പങ്ങളിലെ പഴയ സ്വർണം 'അയഡൈഡ് പ്രക്രിയ' വഴി രാസപരമായി വേർതിരിച്ചെടുത്ത് കടത്തുകയായിരുന്നു. പകരം കാണികളെയും അധികൃതരെയും കണ്ണ് വെട്ടിക്കാൻ വളരെ കുറഞ്ഞ അളവിൽ മാത്രം സ്വർണം വീണ്ടും പൂശി തിരികെ നൽകി.
​പി.എസ്. പ്രശാന്തിന്റെ ഭരണസമിതിക്ക് ക്ലീൻ ചിറ്റ്
​അതേസമയം, മുൻ ദേവസ്വം ബോർഡ് പ്രസിഡന്റ് പി.എസ്. പ്രശാന്തിന്റെ ഭരണസമിതിയുടെ കാലത്ത് ചെന്നൈയിൽ കൊണ്ടുപോയി അറ്റകുറ്റപ്പണി നടത്തിയ പാളികളിൽ നിന്ന് സ്വർണം നഷ്ടപ്പെട്ടിട്ടില്ലെന്ന് ലാബ് റിപ്പോർട്ട് വ്യക്തമാക്കുന്നു. കേസിന്റെ ഭാഗമായി എട്ട് സ്വർണ സാമ്പിളുകളാണ് ജംഷഡ്പൂരിലെ ലാബിലേക്ക് അയച്ചിരുന്നത്.
​ഹൈക്കോടതി ഉത്തരവും അടുത്ത നീക്കവും:
ഫെബ്രുവരിയിൽ സ്വർണ സാമ്പിളുകളിൽ അത്യാധുനിക രീതിയിലുള്ള പരിശോധന അത്യാവശ്യമാണെന്ന് ഹൈക്കോടതി ഉത്തരവിട്ടിരുന്നു. ഇതിന്റെ അടിസ്ഥാനത്തിലാണ് സാമ്പിളുകൾ പരിശോധനയ്ക്ക് അയച്ചത്.
​നിലവിലെ റിപ്പോർട്ട് അനുസരിച്ച് നഷ്ടപ്പെട്ട സ്വർണത്തിന്റെ കൃത്യമായ അളവ് എത്രയെന്ന് തിട്ടപ്പെടുത്താനുള്ള നീക്കത്തിലാണ് അന്വേഷണ സംഘം. ഇതിനുശേഷമായിരിക്കും കോടതിയിൽ അന്തിമ കുറ്റപത്രം സമർപ്പിക്കുക. കൂടുതൽ കൃത്യതയ്ക്കായി ശബരിമലയിലെ ബാക്കി പാളികളും പരിശോധിക്കേണ്ടതുണ്ട്. ഇതിനായി കൂടുതൽ സാമ്പിളുകൾ ശേഖരിക്കാൻ അനുമതി തേടി അന്വേഷണസംഘം ഉടൻ ഹൈക്കോടതിയെ സമീപിക്കും.