തിരുവനന്തപുരം: കോൺഗ്രസിൻറെ വിശ്വാസ സംരക്ഷണ മേഖല ജാഥകൾക്ക് ഇന്ന് തുടക്കമാകും. ശബരിമല സ്വർണക്കൊള്ളയ്ക്കെതിരെയാണ് കോൺഗ്രസ് നാല് മേഖലാ ജാഥകൾ നടത്തുന്നത്. വിശ്വാസ സംരക്ഷണ ജാഥ എന്നപേരിൽ സംഘടിപ്പിക്കുന്ന മേഖല ജാഥകൾ വെള്ളിയാഴ്ച്ച ചെങ്ങന്നൂരിൽ സംഗമിക്കും. ഈ മാസം പതിനെട്ടിന് പന്തളത്താണ് ജാഥകളുടെ സമാപനം.
ശബരിമലയുടെ ആചാരവും വിശ്വാസവും സംരക്ഷിക്കണം, ദേവസ്വം സ്വത്തുവകകൾ മോഷ്ടിച്ചവരെ കണ്ടെത്തി ശിക്ഷിക്കണം തുടങ്ങിയ ആവശ്യങ്ങളുയർത്തിയാണ് കോൺഗ്രസിന്റെ മേഖലാ ജാഥകൾ. പാലക്കാട്,കാസർകോഡ്, തിരുവനന്തപുരം എന്നിവിടങ്ങളിൽ ഇന്ന് ജാഥ തുടങ്ങും. നാളെ മൂവാറ്റുപുഴയിൽ നിന്നും ജാഥ ആരംഭിക്കും.
പാലക്കാട് നിന്ന് കൊടിക്കുന്നിൽ സുരേഷ് എംപിയും കാസർകോട് നിന്ന് കെ.മുരളീധരനും തിരുവനന്തപുരത്ത് നിന്ന് യുഡിഎഫ് കൺവീനർ അടൂർ പ്രകാശ് എംപിയും ജാഥ നയിക്കും.മൂവാറ്റുപുഴയിൽ നിന്ന് ബെന്നി ബഹ്നാൻ എംപിയാണ് ജാഥ നയിക്കുന്നത്. കെപിസിസി പ്രസിഡന്റും പ്രതിപക്ഷ നേതാവും അടക്കമുള്ളവർ ജാഥ ഉദ്ഘാടനം ചെയ്യും.
