ശബരിമല സ്വർണത്തട്ടിപ്പ് കേസിൽ അറസ്റ്റിലായ മുൻ അഡ്മിനിസ്ട്രേറ്റീവ് ഓഫിസർ മുരാരി ബാബുവിന്റെ ജീവിതകഥ അന്വേഷണ സംഘത്തെ അതിശയത്തിലാഴ്ത്തുകയാണ്. സാധാരണ കുടുംബത്തിൽ ജനിച്ച് ദേവസ്വം ബോർഡിൽ ജോലിയിൽ പ്രവേശിച്ച ശേഷം സമ്പന്നനായതെങ്ങനെയെന്നതിലാണ് എസ്ഐടിയുടെ ശ്രദ്ധ.

ചങ്ങനാശേരി പെരുന്നയിലെ ഒരു ചെറിയ കടയുടമയായിരുന്നു മുരാരിയുടെ പിതാവ്. എന്നാൽ ഇപ്പോൾ മുരാരിക്ക് കോടികൾ വിലമതിക്കുന്ന ആസ്തിയുണ്ടെന്നാണ് അന്വേഷണ സംഘത്തിന് ലഭിച്ച സൂചന. ദേവസ്വം ബോർഡിൽ ജോലി കിട്ടിയതിനു ശേഷം അദ്ദേഹത്തിന്റെ ജീവിതത്തിൽ വൻ മാറ്റം സംഭവിച്ചതായി എസ്ഐടി കണ്ടെത്തിയിട്ടുണ്ട്.

1994-ൽ പോലീസ് വകുപ്പിൽ കോൺസ്റ്റബിളായി മുരാരിക്ക് ജോലി ലഭിച്ചു. കണ്ണൂരിലായിരുന്നു ആദ്യ പരിശീലനം, പക്ഷേ അത് പൂർത്തിയാക്കാതെ 1997-ൽ തിരുവിതാംകൂർ ദേവസ്വം ബോർഡിൽ ചേർന്നു. ആദ്യം ഒരു ഉന്നത ഉദ്യോഗസ്ഥന്റെ സഹായിയായി തുടക്കം കുറിച്ച അദ്ദേഹം പിന്നീട് ഏറ്റുമാനൂർ ക്ഷേത്രത്തിലെ ക്ലർക്കായി സ്ഥിരനിയമനം നേടി.

2019-ൽ, സ്വന്തം പഴയ തറവാടിന്റെ സ്ഥലത്താണ് മുരാരി ബാബു ആഡംബര വീട് പണിയാൻ തുടങ്ങിയത്. ഒന്നര വർഷത്തിനുള്ളിൽ തന്നെ നിർമാണം പൂർത്തിയായി — അതേ കാലഘട്ടത്തിലാണ് ശബരിമലയിൽ നിന്നുള്ള സ്വർണപ്പാളികൾ അപ്രത്യക്ഷമായത്. ഈ നിർമാണവുമായി ബന്ധപ്പെട്ട സാമ്പത്തിക ഉറവിടങ്ങളെയും എസ്ഐടി ഇപ്പോൾ സൂക്ഷ്മമായി പരിശോധിക്കുന്നു.

ശബരിമല ക്ഷേത്രത്തിലെ കട്ടിളപ്പാളി, ദ്വാരപാലക ശിൽപങ്ങൾ തുടങ്ങിയവയിൽ നിന്ന് സ്വർണം പൊതിഞ്ഞ പാളികൾ മോഷ്ടിക്കപ്പെട്ട കേസിലാണ് മുരാരിയുടെ അറസ്റ്റ്. കേസിലെ രണ്ടാം പ്രതിയാണ് അദ്ദേഹം.

സ്വർണപ്പാളി ചെമ്പാണെന്ന രേഖ ആദ്യമായി തയ്യാറാക്കിയത് മുരാരിയാണെന്നാണ് അന്വേഷണ റിപ്പോർട്ട്. എന്നാൽ, താൻ ഒറ്റയ്ക്ക് തീരുമാനങ്ങൾ എടുക്കില്ലെന്നും, എല്ലാ പ്രവൃത്തികൾക്കും ദേവസ്വം ബോർഡ് പ്രസിഡന്റിന്റെയും കമ്മിഷണറിന്റെയും അനുമതി ആവശ്യമായിരുന്നുവെന്നും മുരാരി മൊഴി നൽകിയിട്ടുണ്ട്. ഈ മൊഴി ബോർഡിനും ഭരണസംവിധാനത്തിനും തിരിച്ചടിയാകുമെന്നതാണ് വിലയിരുത്തൽ.

സിഐടിയു നിയന്ത്രണത്തിലുള്ള തിരുവിതാംകൂർ ദേവസ്വം എംപ്ലോയീസ് കോൺഫെഡറേഷൻ അംഗമായ മുരാരി ബാബു ഇപ്പോൾ തിരുവനന്തപുരം സ്പെഷ്യൽ സബ് ജയിലിലാണ്. അന്വേഷണം കൂടുതൽ വ്യാപിപ്പിച്ചിരിക്കുകയാണ് എസ്ഐടി. ബാങ്ക് ഇടപാടുകൾ മുതൽ ആസ്തിവിവരങ്ങൾ വരെ മുരാരിയുടെ എല്ലാ സാമ്പത്തിക രേഖകളും ഇപ്പോൾ അന്വേഷണം നേരിടുന്നു.