ശബരിമല സ്വർണ്ണക്കൊള്ളക്കേസിൽ തന്റെ അറസ്റ്റിന് പിന്നിൽ പ്രതികാരനടപടിയാണെന്ന് തന്ത്രി കണ്ഠരര് രാജീവര്. ജാമ്യാപേക്ഷയിലാണ് തന്ത്രി ഇക്കാര്യം ആരോപിക്കുന്നത്. യുവതീപ്രവേശന നീക്കങ്ങൾ തടഞ്ഞതും ശബരിമലയെ എല്ലാ ദിവസവും തുറക്കുന്ന ക്ഷേത്രമാക്കാനുള്ള സർക്കാർ ആലോചന വിഫലമാക്കിയതുമാണ് തനിക്കെതിരായ നടപടിക്ക് കാരണമെന്നാണ് തന്ത്രിയുടെ വാദം.
അതേസമയം, കേസിൽ തന്ത്രിക്കെതിരേ പ്രഥമദൃഷ്ട്യാ തെളിവുകൾ ഹാജരാക്കാൻ പ്രത്യേക അന്വേഷണസംഘത്തിനായില്ലെന്ന് കൊല്ലം വിജിലൻസ് കോടതി ജാമ്യവിധിയിൽ വ്യക്തമാക്കി. സ്വർണപ്പാളികൾ ഉൾപ്പെടെയുള്ള വിലപിടിപ്പുള്ള വസ്തുക്കളുടെ സൂക്ഷിപ്പും കണക്കെടുപ്പും തിരുവിതാംകൂർ ദേവസ്വം ബോർഡ് ഉൾപ്പെടുന്ന ഉദ്യോഗസ്ഥരുടെ ഉത്തരവാദിത്വമാണെന്നും, ആചാര-പൂജാകാര്യങ്ങൾ മാത്രമാണ് തന്ത്രിയുടെ ചുമതലയെന്നും കോടതി നിരീക്ഷിച്ചു.
തന്ത്രി ഉയർത്തുന്ന ഗുരുതര ആരോപണങ്ങൾ
- സന്നിധാനത്ത് യുവതികളെ കയറ്റാൻ ചില പോലീസ് ഉദ്യോഗസ്ഥർ ശ്രമിച്ചെന്നും അത് താൻ തടഞ്ഞെന്നും തന്ത്രി പറയുന്നു.
- ക്ഷേത്രകാര്യങ്ങളിൽ രാഷ്ട്രീയ ഇടപെടൽ അനുവദിക്കില്ലെന്ന് നേരത്തെ വ്യക്തമാക്കിയിരുന്നു.
- യുവതീപ്രവേശനം നടപ്പാക്കിയാൽ പൂജകൾ നിർത്തിവെക്കുമെന്നും ക്ഷേത്രത്തിന് പുറത്തുവരുമെന്നും മുന്നറിയിപ്പ് നൽകിയിരുന്നു.
- ശബരിമലയെ എല്ലാ ദിവസവും തുറക്കുന്ന ക്ഷേത്രമാക്കാനുള്ള സർക്കാർ നീക്കവും താൻ തടഞ്ഞുവെന്നാണ് അവകാശവാദം.
എസ്‌ഐടിക്കെതിരെയും ആരോപണം
കേസിലെ ഒന്നാംപ്രതി ഉണ്ണികൃഷ്ണൻ പോറ്റിയെ ശബരിമലയിൽ എത്തിച്ചത് താനാണെന്ന വാദത്തിന് ബലം കിട്ടാൻ ചില വസ്തുതകൾ എസ്‌ഐടി മറച്ചുവെച്ചുവെന്നുമാണ് തന്ത്രിയുടെ ആരോപണം. പോറ്റിയുടെ ബന്ധുക്കൾ ശബരിമലയിൽ ജോലി ചെയ്തിരുന്നുവെന്ന കാര്യം മറച്ചുവെച്ചുവെന്നും തന്ത്രി ജാമ്യാപേക്ഷയിൽ ചൂണ്ടിക്കാട്ടി.
ചുമതലകളും ഉത്തരവാദിത്വങ്ങളും
തന്ത്രിയുടെ പദവി ആചാരങ്ങൾ, അനുഷ്ഠാനങ്ങൾ, പൂജകൾ എന്നിവയിൽ മാത്രമായി പരിമിതമാണെന്നും, ഭരണപരമായ കാര്യങ്ങളിലോ സ്വത്തുക്കളുടെ പരിപാലനത്തിലോ നിയമപരമായ അധികാരം ഇല്ലെന്നും ജാമ്യാപേക്ഷയിൽ വ്യക്തമാക്കുന്നു. ദേവസ്വം മാന്വൽ പ്രകാരം തിരുവാഭരണങ്ങളുടെയും വിലപിടിപ്പുള്ള വസ്തുക്കളുടെയും സംരക്ഷണവും കണക്കെടുപ്പും ഉദ്യോഗസ്ഥരുടെ ചുമതലയാണെന്നും അതിൽ വീഴ്ചയുണ്ടായാൽ അത് തന്ത്രിക്കെതിരായ ഗൂഢാലോചനയായി കണക്കാക്കാനാവില്ലെന്നും വാദിച്ചു.
കോടതി നിരീക്ഷണം
- ഗൂഢാലോചന തെളിയിക്കാൻ മതിയായ തെളിവുകളില്ല.
- നിർണായക മഹസറുകളിൽ തന്ത്രി ഒപ്പുവെച്ചിട്ടില്ല.
- ദേവസ്വം ബോർഡ് മുമ്പേ എടുത്ത തീരുമാനങ്ങളുടെ അടിസ്ഥാനത്തിലാണ് നടപടികൾ നടന്നത്.
- പാളികൾ കൈമാറ്റംചെയ്തത് പൂജകളോടോ ആചാരങ്ങളോടോ ബന്ധപ്പെട്ടല്ല.
ഇവയെല്ലാം പരിഗണിച്ചാണ്, ശബരിമല തന്ത്രിയെന്ന നിലയും ചികിത്സാ ആവശ്യങ്ങളും കണക്കിലെടുത്ത് വിജിലൻസ് കോടതി തന്ത്രിക്ക് ജാമ്യം അനുവദിച്ചത്.
