കൊച്ചി: ശബരിമല ശ്രീകോവിലിന്റെ സ്വർണം പൊതിഞ്ഞ വാതിലുമായി ബന്ധപ്പെട്ട കേസിൽ രാജ്യാന്തര മോഷ്ടാക്കളുടെ പ്രവർത്തന രീതിക്ക് സമാനമായ വൻ ഗൂഢാലോചന നടന്നതായി ഹൈക്കോടതിയുടെ നിരീക്ഷണം. കുപ്രസിദ്ധ വിഗ്രഹ മോഷ്ടാവായ സുഭാഷ് കപൂർ ഉൾപ്പെടെയുള്ളവർ ചെയ്യുന്ന 'ഓപ്പറേഷന്' സമാനമാണ് ശബരിമലയിലെ സ്വർണക്കൊള്ളയെന്നും കോടതി അഭിപ്രായപ്പെട്ടു.

​ പ്രധാന കണ്ടെത്തലുകൾ, സംശയങ്ങൾ

​പകർപ്പ് വെച്ച് മോഷണം: ശബരിമലയിലെ വിലപ്പെട്ട സ്വർണം പൊതിഞ്ഞ വസ്തുക്കളുടെ ഒറിജിനൽ മാറ്റി പകരം പകർപ്പുകൾ ഹാജരാക്കിയുള്ള മോഷണമാണ് നടന്നതെന്ന സംശയം കോടതി ബലപ്പെടുത്തി. ക്ഷേത്ര കലാസൃഷ്ടികൾക്ക് രാജ്യാന്തര വിപണിയിൽ മോഹവില ലഭിക്കുമെന്നും കോടതി ചൂണ്ടിക്കാട്ടി.

​സ്വർണത്തിലെ കുറവ്:

​1998-99ൽ വിജയ് മല്യയുടെ കമ്പനി നൽകിയ, വാതിലിൽ ഉണ്ടായിരുന്നത്: 2519.76 ഗ്രാം സ്വർണം (24 ക്യാരറ്റ്).
​പകരം വെച്ച വാതിലിൽ പൂശാൻ പോറ്റി ഉപയോഗിച്ചത്: 324.40 ഗ്രാം സ്വർണം മാത്രം. (മഹസറിൽ വ്യക്തമാക്കിയത്).
​ദുരൂഹ ഇടപെടലുകൾ: ശ്രീകോവിൽ വാതിൽ അറ്റകുറ്റപ്പണിക്കായി ഉണ്ണികൃഷ്ണൻ പോറ്റിക്ക് കൈമാറിയതും അന്വേഷിക്കണം. ദുരൂഹ ഇടപാടുകളെല്ലാം ദേവസ്വം ബോർഡ് അധികൃതരുടെ അറിവോടെയാണ് നടന്നതെന്ന് രേഖകൾ വ്യക്തമാക്കുന്നതായും കോടതി പറഞ്ഞു.
​ക്രമക്കേട്: ചെമ്പുപാളികളാണ് കൊടുത്തുവിട്ടതെന്ന് തെറ്റിദ്ധരിപ്പിച്ചത് ബോധപൂർവമാണ്. ദ്വാരപാലക ശില്പങ്ങൾ അറ്റകുറ്റപ്പണിക്ക് കൊടുത്തത് ദേവസ്വം മിനിട്സിൽ 2025 ജൂലായ് 28ന് ശേഷം രേഖപ്പെടുത്തലുകൾ ഇല്ലാത്ത സമയത്താണെന്നും കോടതി ഗൗരവ ക്രമക്കേടായി വിലയിരുത്തി.

​ കോടതി ഉത്തരവ്

​പ്രതികൾക്കെതിരെ അഴിമതി നിരോധന നിയമത്തിലെ വകുപ്പുകൾ ചുമത്തുന്ന കാര്യം എസ്.ഐ.ടി. (പ്രത്യേക അന്വേഷണ സംഘം) പരിശോധിക്കണം.
​ജസ്റ്റിസ് വി. രാജ വിജയരാഘവൻ, ജസ്റ്റിസ് കെ.വി. ജയകുമാർ എന്നിവരുൾപ്പെട്ട ദേവസ്വം ബെഞ്ചാണ് ഉത്തരവിട്ടത്.

​ ആരാണ് സുഭാഷ് കപൂർ?

​ഇന്ത്യൻ വംശജനായ അമേരിക്കൻ പൗരനും രാജ്യാന്തര കലാസൃഷ്‌ടി കള്ളക്കടത്തുകാരനുമാണ്.
​തമിഴ്‌നാട്ടിൽ നിന്ന് മോഷ്ടിച്ച 14-ാം നൂറ്റാണ്ടിലെ പാർവതി വിഗ്രഹമടക്കം വിദേശത്ത് വിറ്റ കേസിൽ 2011-ൽ അമേരിക്കൻ കസ്റ്റംസ് ഇയാളെ പിടികൂടി. 44 കോടിയുടെ വിഗ്രഹമാണ് അന്ന് കണ്ടെടുത്തത്.
​അമേരിക്ക കൈമാറിയതിനെ തുടർന്ന് നിലവിൽ തിരുച്ചിറപ്പള്ളി ജയിലിൽ കഴിയുകയാണ്.