​ആധുനിക സമൂഹത്തിൽ ഒഴിച്ചുകൂടാനാവാത്ത ഘടകമായി സാങ്കേതികവിദ്യ മാറിയതോടെ സൈബർ കുറ്റകൃത്യങ്ങളുടെ എണ്ണവും വർധിച്ചു വരികയാണ്. കേരളത്തിൽ ഓരോ വർഷവും റിപ്പോർട്ട് ചെയ്യുന്ന സൈബർ കേസുകളുടെ എണ്ണത്തിൽ വലിയ വർധനവാണ് കാണുന്നത്. 2020 മുതൽ ഈ വർഷം ജൂലൈ വരെ 10,139 സൈബർ കുറ്റകൃത്യങ്ങളാണ് സംസ്ഥാനത്ത് റിപ്പോർട്ട് ചെയ്യപ്പെട്ടത്. 2019-ൽ 307 കേസുകളായിരുന്നത്, 2023-ൽ 3,295 ആയും കഴിഞ്ഞ വർഷം 3,581 ആയും വർധിച്ചു.

​സൈബർ കെണികൾ പലവിധം

​കമ്പ്യൂട്ടർ, ഇന്റർനെറ്റ്, മൊബൈൽ ഫോൺ എന്നിവയുടെ അനിയന്ത്രിതമായ ഉപയോഗം പലപ്പോഴും അപകടങ്ങളിലേക്ക് നയിച്ചേക്കാം. സോഷ്യൽ മീഡിയ പ്ലാറ്റ്‌ഫോമുകൾ ഉപയോഗിച്ചുള്ള സൈബർ തട്ടിപ്പുകൾ, പ്രായപൂർത്തിയാകാത്ത കുട്ടികളെ ലൈംഗിക ചൂഷണത്തിനും ബ്ലാക്ക്‌മെയിലിങ്ങിനും ഇരയാക്കുന്ന സംഭവങ്ങൾ, പണം വച്ചുള്ള ഓൺലൈൻ ഗെയിമുകളിലൂടെ കുട്ടികൾ കുറ്റകൃത്യങ്ങളിൽ ഏർപ്പെടുന്നത് തുടങ്ങിയവ സമൂഹത്തിൽ വർധിച്ചു വരുന്നു.

​സൈബർ ബുള്ളിയിങ്, അപകീർത്തിപ്പെടുത്തുന്ന ഇ-മെയിലുകൾ, മോർഫ് ചെയ്ത ചിത്രങ്ങളും വീഡിയോകളും, അശ്ലീല പോസ്റ്റുകൾ എന്നിവയെല്ലാം സൈബർ കുറ്റകൃത്യങ്ങളിൽപ്പെടും. ഒരു വ്യക്തിയുടെ പാസ്‌വേഡ് ചോർത്തുകയോ സ്വകാര്യ വിവരങ്ങൾ ദുരുപയോഗം ചെയ്യുകയോ ചെയ്യുന്നതും ഗുരുതരമായ കുറ്റമാണ്. മൊബൈൽ ഫോൺ ഉപയോഗിച്ച് മറ്റൊരാളുടെ സ്വകാര്യതയിലേക്ക് കടന്നുകയറി സംഭാഷണങ്ങൾ റെക്കോർഡ് ചെയ്യുന്നതും ചിത്രങ്ങളെടുക്കുന്നതും കുറ്റകരമാണ്.

​പ്രതിരോധവും നിയമപരമായ സംരക്ഷയും

​സൈബർ കുറ്റകൃത്യങ്ങൾ തടയാൻ രക്ഷിതാക്കളും സ്കൂൾ അധികൃതരും ശ്രദ്ധിക്കേണ്ടത് അത്യാവശ്യമാണ്. കുട്ടികളുമായി തുറന്നു സംസാരിക്കുകയും സൈബർ ലോകത്തെ അപകടങ്ങളെക്കുറിച്ച് അവരെ ബോധവാന്മാരാക്കുകയും വേണം. അപരിചിതരുമായി വ്യക്തിപരമായ വിവരങ്ങൾ പങ്കുവെക്കരുത്. ഓൺലൈൻ ഇടങ്ങളിൽ നേരിടുന്ന ദുരനുഭവങ്ങളെക്കുറിച്ച് തുറന്നു പറയാനുള്ള ധൈര്യം കുട്ടികൾക്ക് നൽകണം.
​സൈബർ കുറ്റകൃത്യങ്ങൾക്ക് ഇരയാകുന്നവർ മാനസികമായി തളരാതെ ശക്തമായി പ്രതികരിക്കുകയാണ് വേണ്ടത്. സമൂഹം ഒറ്റപ്പെടുത്തുമോ എന്ന ഭയത്താൽ പലരും പരാതി നൽകാൻ മടിക്കുന്നു. ഇരകളല്ല, മറിച്ച് കുറ്റവാളികളാണ് ശിക്ഷിക്കപ്പെടേണ്ടതെന്ന ധാരണ സമൂഹത്തിൽ വളർത്തേണ്ടത് അത്യാവശ്യമാണ്. ഇൻഫർമേഷൻ ടെക്നോളജി ആക്ട്, ഐ.പി.സി. തുടങ്ങിയ നിയമങ്ങൾ സൈബർ കുറ്റവാളികൾക്കെതിരെ കർശന നടപടി എടുക്കാൻ അധികാരികളെ സഹായിക്കും.

​സൈബർ ലോകത്തെ ചതിക്കുഴികളെക്കുറിച്ച് വ്യക്തമായ അവബോധം ഓരോ പൗരനും ഉണ്ടായിരിക്കണം. ജാഗ്രതയോടെയുള്ള ഇന്റർനെറ്റ് ഉപയോഗത്തിലൂടെ മാത്രമേ ഈ കെണികളിൽ നിന്ന് രക്ഷപ്പെടാൻ സാധിക്കൂ.