ന്യൂഡൽഹി: ലൈംഗികാതിക്രമക്കേസുകൾ കൈകാര്യം ചെയ്യുമ്പോൾ കോടതികളും പോലീസും കൂടുതൽ സംവേദനക്ഷമതയും അനുകമ്പയും പുലർത്തണമെന്നും അനുചിതമായ ഭാഷാപ്രയോഗങ്ങൾ ഒഴിവാക്കണമെന്നും നിർദ്ദേശിച്ചുകൊണ്ടുള്ള രാജ്യവ്യാപക മാർഗ്ഗരേഖയ്ക്ക് സുപ്രീം കോടതി അംഗീകാരം നൽകി. നാഷണൽ ജുഡീഷ്യൽ അക്കാദമിയുടെ വിദഗ്ദ്ധ സമിതി തയ്യാറാക്കിയ സമഗ്രമായ ഹാൻഡ്‌ബുക്കിലെ  നിർദ്ദേശങ്ങളും മാനദണ്ഡങ്ങളും രാജ്യത്തെ എല്ലാ കോടതികളും കർശനമായി പാലിക്കണമെന്ന് ചീഫ് ജസ്റ്റിസ് സൂര്യകാന്ത്, ജസ്റ്റിസ് ജോയ്മാല്യ ബാഗ്ചി, ജസ്റ്റിസ് വി. മോഹന എന്നിവരടങ്ങിയ ബെഞ്ച് ഉത്തരവിട്ടു.
​പോലീസിനും കോടതികൾക്കും കർശന നിർദ്ദേശം
പുതിയ മാർഗ്ഗരേഖ സുപ്രീം കോടതി, വിവിധ ഹൈക്കോടതികൾ, ജില്ലാ കോടതികൾ എന്നിവയുടെ ഔദ്യോഗിക വെബ്‌സൈറ്റുകളിൽ പ്രസിദ്ധീകരിക്കാൻ കോടതി ഉത്തരവിട്ടിട്ടുണ്ട്. കൂടാതെ നാഷണൽ ജുഡീഷ്യൽ അക്കാദമി, സ്റ്റേറ്റ് ജുഡീഷ്യൽ അക്കാദമികൾ, നാഷണൽ ലാ യൂണിവേഴ്സിറ്റികൾ എന്നിവടങ്ങളിലും ഇത് വിതരണം ചെയ്യും.
​അതുപോലെ തന്നെ, പോലീസ് സ്റ്റേഷനുകളിൽ പ്രഥമ വിവര റിപ്പോർട്ട് (FIR) രജിസ്റ്റർ ചെയ്യുമ്പോഴും കുറ്റപത്രം സമർപ്പിക്കുമ്പോഴും ഈ ഹാൻഡ്‌ബുക്കിലെ നിർദ്ദേശങ്ങൾ പാലിക്കുന്നുണ്ടെന്ന് ഉറപ്പാക്കാൻ എല്ലാ സംസ്ഥാനങ്ങളിലെയും പ്രൊസിക്യൂഷൻ ഡയറക്ടർമാർക്കും പോലീസ് മേധാവിമാർക്കും  സുപ്രീം കോടതി കർശന നിർദ്ദേശം നൽകി.
​ഒരു സുപ്രധാന ചുവടുവെപ്പ്: വിദഗ്ദ്ധ സമിതിയുടെ പ്രവർത്തനം ഏറെ പ്രശംസനീയമാണെന്ന് ചീഫ് ജസ്റ്റിസ് സൂര്യകാന്ത് നിരീക്ഷിച്ചു. ഈ മാർഗ്ഗരേഖകൾ സുപ്രീം കോടതിയുടെ ജുഡീഷ്യൽ ഉത്തരവിന്റെ ഭാഗമായിരിക്കുമെന്നും ബെഞ്ച് വ്യക്തമാക്കി.
​പശ്ചാത്തലം
അലഹബാദ് ഹൈക്കോടതിയുടെ വിവാദപരമായ ഒരു വിധിയെത്തുടർന്ന് സുപ്രീം കോടതി സ്വമേധയാ  എടുത്ത കേസിലാണ് ഈ സുപ്രധാന നടപടി. പ്രായപൂർത്തിയാകാത്ത പെൺകുട്ടിയുടെ വസ്ത്രത്തിന്റെ നൂൽ അഴിക്കുന്നതും ശരീരത്തിൽ ബലമായി സ്പർശിക്കുന്നതും ബലാത്സംഗ ശ്രമമായി കണക്കാക്കാനാവില്ലെന്നായിരുന്നു അലഹബാദ് ഹൈക്കോടതിയുടെ നിരീക്ഷണം. 2026 ഫെബ്രുവരിയിൽ ഈ വിധി റദ്ദാക്കിയ സുപ്രീം കോടതി, മുൻ സുപ്രീം കോടതി ജഡ്ജിയും ഭോപ്പാലിലെ നാഷണൽ ജുഡീഷ്യൽ അക്കാദമി ഡയറക്ടറുമായ ജസ്റ്റിസ് അനിരുദ്ധ ബോസിന്റെ നേതൃത്വത്തിൽ ഒരു വിദഗ്ദ്ധ സമിതി രൂപീകരിക്കാൻ ആവശ്യപ്പെടുകയായിരുന്നു.
​പ്രാദേശിക ഭാഷകളിലും ഭാഷാഭേദങ്ങളിലും ഇരകളെ അധിക്ഷേപിക്കാൻ ഉപയോഗിക്കുന്ന മോശം പദപ്രയോഗങ്ങൾ കണ്ടെത്താനും സമിതിയോട് ആവശ്യപ്പെട്ടിരുന്നു. ഇരകൾക്ക് തങ്ങൾ നേരിട്ട ആഘാതം ഭയമില്ലാതെയും കൃത്യമായും കോടതിയെ ബോധിപ്പിക്കാൻ സാധിക്കുന്ന അന്തരീക്ഷം ഉറപ്പാക്കുകയാണ് ഇതിന്റെ ലക്ഷ്യം. ഹാൻഡ്‌ബുക്കിന്റെ പൂർണ്ണരൂപം ഉടൻ തന്നെ സുപ്രീം കോടതിയുടെ വെബ്‌സൈറ്റിൽ ലഭ്യമാകും.