സമുദ്ര ജൈവഅധിനിവേശം കേരളതീരത്ത് സൃഷ്ടിക്കുന്ന പ്രശ്നങ്ങൾ പഠിക്കാനും അധിനിവേശജീവികളെ രേഖപ്പെടുത്താനും, കേരള സമുദ്ര അധിനിവേശ ജീവികളുടെ ആക്ഷൻ പ്ലാൻ (KMISAP) തയ്യാറാക്കാനുമായി   കേരള സംസ്ഥാന ജൈവവൈവിധ്യ ബോർഡ് (KSBB)ന്റെ രണ്ട് വർഷത്തെ ഗവേഷണ പദ്ധതി കേരള ഫിഷറീസ് സമുദ്ര പഠന സർവകലാശാലയ്ക്ക് (KUFOS)  അനുവദിച്ചു.  തീരദേശ ജില്ലകളായ എറണാകുളം, തൃശൂർ, മലപ്പുറം, കണ്ണൂർ, കാസർഗോഡ് എന്നിവിടങ്ങളിൽ കുഫോസ് പഠനങ്ങൾ നടത്തും. സമുദ്ര അധിനിവേശ ജീവികളുടെ ഡാറ്റാബേസിന്റെ വികസനം, വിദേശ ജൈവജാതികൾ കടന്നുവരുന്ന വഴികളും വ്യാപനത്തിന്റെ പാതകളും തിരിച്ചറിയൽ, പാരിസ്ഥിതിക ആഘാതങ്ങൾ വിലയിരുത്തൽ, മത്സ്യബന്ധനത്തിനും തീരദേശ സമൂഹങ്ങൾക്കും ഉണ്ടാകാനിടയുള്ള സാമൂഹിക-സാമ്പത്തിക പ്രത്യാഘാതങ്ങളുടെ വിലയിരുത്തൽ എന്നിങ്ങനെ നാല് പ്രധാന മേഖലകളിലാണ് പദ്ധതി ശ്രദ്ധ കേന്ദ്രീകരിക്കുക.
കേരള സമുദ്ര അധിനിവേശ ജീവികളുടെ ആക്ഷൻ പ്ലാൻ (KMISAP)  സംസ്ഥാനത്തിനായുള്ള ഇത്തരത്തിലുള്ള ആദ്യത്തെ സമഗ്ര ചട്ടക്കൂട് ആയിരിക്കും. കേരളത്തിലെ സമുദ്ര ജൈവ അധിനിവേശങ്ങളുടെ ഭാവി നിരീക്ഷണം, പ്രതിരോധം, മാനേജ്മെന്റ് എന്നിവയ്ക്ക് ആക്ഷൻ പ്ലാൻ വഴികാട്ടും. ഡോ. രാജീവ് രാഘവൻ, ഡോ. എ. ബിജു കുമാർ എന്നിവർ ഈ പദ്ധതിക്ക് നേതൃത്വം നൽകും. ഡോ. രഞ്ജിത് കെ., ഡോ. ജയലക്ഷ്മി കെ.വി., ഡോ. ഷിജോ ജോസഫ് എന്നിവർ സഹ-അന്വേഷകരായി പ്രവർത്തിക്കും. ഐസിഎആർ–സെൻട്രൽ മറൈൻ ഫിഷറീസ് റിസർച്ച് ഇൻസ്റ്റിറ്റ്യൂട്ട് (സിഎംഎഫ്ആർഐ) കേരളത്തിലെ തെക്കൻ തീരദേശ ജില്ലകളിൽ അനുബന്ധ പഠനങ്ങൾ പ്രത്യേക ഗവേഷണ ഗ്രാന്റ് വഴി നടത്തും. ഈ പഠനങ്ങൾ ഒരുമിച്ച്, സംസ്ഥാനത്തിന്റെ തീരപ്രദേശങ്ങളിലുടനീളമുള്ള സമുദ്ര അധിനിവേശ ജീവിവർഗങ്ങളുടെ സമഗ്രമായ വിലയിരുത്തലിന് മുതൽക്കൂട്ടാവും.“കേരളത്തിന്റെ ജൈവവൈവിധ്യത്തിനും മത്സ്യബന്ധനത്തിനും തീരദേശ ഉപജീവനമാർഗ്ഗത്തിനും ഉയർന്നുവരുന്ന ഒരു ഭീഷണിയാണ് വിദേശ സമുദ്ര അധിനിവേശ ജീവിവർഗങ്ങൾ. ഈ പദ്ധതി സംസ്ഥാനത്തെ  വിദേശ സമുദ്രജീവികളുടെ സാന്നിധ്യത്തെപ്പറ്റിയുള്ള തെളിവുകളിലേക്കും, കണ്ടെത്തലിലേക്കും, ഏകോപിത  പരിപാലന നടപടികളിലേക്കും  വഴികാട്ടിയായി മാറും. ഗവേഷകർ, സർക്കാർ ഏജൻസികൾ, മത്സ്യത്തൊഴിലാളികൾ, തീരദേശ സമൂഹങ്ങൾ എന്നിവരുടെ പങ്കാളിത്തത്തിലൂടെ പുതിയ അധിനിവേശങ്ങൾ തടയുന്നതിനും, അവയുടെ വ്യാപനം നിരീക്ഷിക്കുന്നതിനും, അവയുടെ പാരിസ്ഥിതികവും സാമൂഹിക-സാമ്പത്തികവുമായ പ്രത്യാഘാതങ്ങൾ കൈകാര്യം ചെയ്യുന്നതിനുമുള്ള ഒരു ശാസ്ത്രാധിഷ്ഠിത റോഡ്മാപ്പ് പ്രദാനം ചെയ്യുമെന്ന്  കുഫോസ് വൈസ് ചാൻസലറും അധിനിവേശ  ജീവജാലങ്ങളെക്കുറിച്ചുള്ള ദേശീയ തല വിദഗ്ദ്ധ സമിതിയുടെ സഹ-അധ്യക്ഷനുമായ പ്രൊഫ. എ. ബിജു കുമാർ പറഞ്ഞു.

Photo Courtesy - Google