ന്യൂഡൽഹി: സുഹൃത്തുക്കളോ കുടുംബാംഗങ്ങളോ ലഭ്യമല്ലാത്ത സമയങ്ങളിൽ കൂട്ടായി ഒരാളെ വാടകയ്ക്ക് ലഭ്യമാക്കുന്ന പുതിയ സേവനമാണ് ഡൽഹിയിൽ ശ്രദ്ധ നേടുന്നത്. "വാടക ബോയ്ഫ്രണ്ട്" എന്ന പേരിലാണ് സോഷ്യൽ മീഡിയയിൽ ഇത് വൈറലാകുന്നത്. ഒരു ദിവസത്തേക്ക് ഏകദേശം 1500 രൂപ മുതൽ ആരംഭിക്കുന്ന ഈ സേവനം വിവിധ ആവശ്യങ്ങൾക്കായി കൂട്ടാളിയെ തിരഞ്ഞെടുക്കാനുള്ള അവസരമാണ് നൽകുന്നത്.

ജപ്പാനിൽ ഏറെ പ്രചാരം നേടിയ "റന്റ്-എ-ബോയ്ഫ്രണ്ട്" ആശയത്തിന് സമാനമായ രീതിയിലുള്ള സേവനമാണ് ഇപ്പോൾ ഇന്ത്യയിലും ചർച്ചയാകുന്നത്. ഇൻസ്റ്റഗ്രാം കണ്ടന്റ് ക്രിയേറ്ററായ ഇഷ ഭല്ലയാണ് ഡൽഹിയിൽ ഇത്തരം ഒരു സേവനം പരീക്ഷിച്ച അനുഭവം വീഡിയോയിലൂടെ പങ്കുവെച്ചത്.

Kopartner.in എന്ന പ്ലാറ്റ്‌ഫോമിലൂടെയാണ് ഇഷ സേവനം ബുക്ക് ചെയ്തത്. വെബ്‌സൈറ്റിൽ "റന്റ്-എ-ബോയ്ഫ്രണ്ട്" എന്ന പേര് നേരിട്ട് ഉപയോഗിക്കുന്നില്ലെങ്കിലും, വിവിധ ആവശ്യങ്ങൾക്കായി കൂട്ടായി ഒരാളെ തിരഞ്ഞെടുക്കാനുള്ള സൗകര്യം അവിടെ ലഭ്യമാണ്.

വൃദ്ധപരിചരണം, ഷോപ്പിങ് പങ്കാളി, സിനിമാ കൂട്ടുകാരൻ, ക്ലബിങ് പാർട്ണർ, യാത്രാ സഹായി, മെഡിക്കൽ സപ്പോർട്ട്, വീട്ടാവശ്യങ്ങൾക്ക് സഹായം തുടങ്ങിയ സേവനങ്ങളാണ് പ്ലാറ്റ്‌ഫോമിലൂടെ ലഭ്യമാകുന്നത്. ഓരോ സേവനത്തിനും നിരക്കിൽ വ്യത്യാസമുണ്ടെങ്കിലും ചില വിഭാഗങ്ങളിൽ ഒരു ദിവസത്തെ നിരക്ക് 1000 രൂപ മുതൽ 1500 രൂപ വരെയാണെന്ന് റിപ്പോർട്ടുകൾ പറയുന്നു.

സേവനം ബുക്ക് ചെയ്തതിന് ശേഷം മാളിൽ കണ്ടുമുട്ടിയ പാർട്ണർ ഷോപ്പിങ് ചെയ്യാൻ സഹായിക്കുകയും ബാഗുകൾ ചുമക്കുകയും സംസാരങ്ങൾക്ക് കൂട്ടിരിക്കുകയും ചെയ്തതായി ഇഷ വീഡിയോയിൽ വ്യക്തമാക്കുന്നു.

വീഡിയോ സോഷ്യൽ മീഡിയയിൽ വൈറലായതോടെ നിരവധി പേർ അതിശയം പ്രകടിപ്പിച്ചു. ചിലർ ഇത് പുതിയ കാലഘട്ടത്തിലെ സൗഹൃദ സേവനമെന്ന് വിശേഷിപ്പിച്ചപ്പോൾ, മറ്റുചിലർ സുരക്ഷയും വിശ്വാസ്യതയും സംബന്ധിച്ച് ചോദ്യങ്ങൾ ഉയർത്തി. എന്തായാലും ഇന്ത്യയിൽ companionship services എന്ന ആശയത്തെക്കുറിച്ചുള്ള ചർച്ചകൾക്ക് ഈ വീഡിയോ പുതിയ വഴിത്തിരിവ് സമ്മാനിച്ചിരിക്കുകയാണ്.