കൊച്ചി:കോടതിയലക്ഷ്യ കേസ് അവസാനിപ്പിച്ചു
യൂത്ത് കോൺഗ്രസ് പ്രവർത്തകൻ ഷുഹൈബ് വധക്കേസിൽ സി.ബി.ഐ അന്വേഷണം നിഷേധിച്ച ഹൈക്കോടതി ഡിവിഷൻ ബെഞ്ച് വിധിക്കെതിരെ അപകീർത്തികരമായ പരാമർശം നടത്തിയെന്ന കോടതിയലക്ഷ്യ കേസ് കേരള ഹൈക്കോടതി അവസാനിപ്പിച്ചു. കോൺഗ്രസ് എം.പി കെ. സുധാകരൻ നേരിട്ട് ഹാജരായി നൽകിയ നിരുപാധിക മാപ്പ് കോടതി സ്വീകരിക്കുകയായിരുന്നു.
ജസ്റ്റിസ് രാജ വിജയരാഘവൻ വി., ജസ്റ്റിസ് കെ. വി. ജയകുമാർ എന്നിവരടങ്ങിയ ഡിവിഷൻ ബെഞ്ചാണ് കേസ് തീർപ്പാക്കിയത്.
2018 ഫെബ്രുവരി 12-നാണ് രാഷ്ട്രീയപ്പകയെ തുടർന്ന് ഷുഹൈബ് റോഡിൽ വെച്ച് വെട്ടിക്കൊല്ലപ്പെടുന്നത്. കേസിൽ സി.ബി.ഐ അന്വേഷണം വേണമെന്ന സിംഗിൾ ബെഞ്ച് ഉത്തരവ് സംസ്ഥാന സർക്കാരിന്റെ അപ്പീലിനെ തുടർന്ന് ഡിവിഷൻ ബെഞ്ച് റദ്ദാക്കിയിരുന്നു. ഈ വിധിയെ സുധാകരൻ തന്റെ പ്രസംഗത്തിനിടെ 'അപമാനകരം' എന്ന് വിശേഷിപ്പിക്കുകയും ജഡ്ജിമാർക്കെതിരെ മോശം പരാമർശങ്ങൾ നടത്തുകയും ചെയ്തു എന്നാണ് കേസ്.
തന്റെ പ്രസംഗത്തിൽ കോടതിയുടെ അന്തസ്സിനെയോ നിഷ്പക്ഷതയെയോ ചോദ്യം ചെയ്യാൻ താൻ ഉദ്ദേശിച്ചിരുന്നില്ലെന്നും, സംഭവിച്ചതിൽ ഖേദിക്കുന്നുവെന്നും സുധാകരന്റെ അഭിഭാഷകൻ മുൻപ് അറിയിച്ചിരുന്നു. തുടർന്ന് കോടതി നിർദ്ദേശപ്രകാരം ഇന്നലെ നേരിട്ട് ഹാജരായ സുധാകരൻ ബോധിപ്പിച്ച ക്ഷമാപണം ആത്മാർത്ഥവും നിയമപരവുമാണെന്ന് വ്യക്തമാക്കിയാണ് കോടതി അദ്ദേഹത്തെ കോടതിയലക്ഷ്യ നടപടികളിൽ നിന്ന് ഒഴിവാക്കിയത്.
