സുരേഷ് വണ്ടന്നൂർ

ചേർത്തല:കർണാടകയിലെ ധർമ്മസ്ഥലയിലും കേരളത്തിലെ ചേർത്തലയിലും നടന്ന കൂട്ടക്കൊലപാതകങ്ങളുമായി ബന്ധപ്പെട്ട് കൂടുതൽ മൃതദേഹാവശിഷ്ടങ്ങൾ കണ്ടെത്തി. ഈ രണ്ടു സംഭവങ്ങൾക്കും പരസ്പരം ബന്ധമില്ലെങ്കിലും, കുറ്റകൃത്യങ്ങൾ മറച്ചുവെച്ചതിൽ സമാനതകളുണ്ട്.
ധർമ്മസ്ഥലയിൽ, ശുചീകരണ തൊഴിലാളിയുടെ വെളിപ്പെടുത്തലിനെത്തുടർന്നാണ് പ്രത്യേക അന്വേഷണ സംഘം തെരച്ചിൽ ആരംഭിച്ചത്. വനത്തിനുള്ളിലെ ഒരു കുന്നിൻ മുകളിൽ നടത്തിയ പരിശോധനയിൽ 33 വയസ്സുള്ള ഒരു പുരുഷന്റേതെന്നു സംശയിക്കുന്ന തലയോട്ടിയുൾപ്പെടെ ഒരു പൂർണ്ണ അസ്ഥികൂടം കണ്ടെടുത്തു. നൂറിലധികം സ്ത്രീകളെയും പെൺകുട്ടികളെയും കൊന്നുകുഴിച്ചുമൂടിയെന്ന് വെളിപ്പെടുത്തിയതിന്റെ അടിസ്ഥാനത്തിലാണ് അന്വേഷണം നടക്കുന്നത്. മണ്ണിൽ മറവുചെയ്ത മൃതദേഹങ്ങൾ കണ്ടെത്താൻ ഗ്രൗണ്ട് പെനട്രേറ്റിംഗ് റഡാർ ഉപയോഗിക്കാനും സംഘം തീരുമാനിച്ചിട്ടുണ്ട്.

അതേസമയം, ചേർത്തലയിൽ മൂന്ന് സ്ത്രീകളുടെ തിരോധാനം സംബന്ധിച്ച കേസിൽ, പ്രതിയെന്ന് സംശയിക്കുന്ന സെബാസ്റ്റ്യന്റെ പറമ്പിൽ നടത്തിയ തെരച്ചിലിൽ പത്തിലധികം അസ്ഥിക്കഷണങ്ങൾ കണ്ടെത്തി. കഴിഞ്ഞ മാസം തലയോട്ടിയും തുടയെല്ലും ലഭിച്ചിരുന്നു. പിന്നീട്, കുളം വറ്റിച്ചപ്പോൾ ബാഗ്, സാരി, മറ്റ് തുണികൾ എന്നിവയും ലഭിച്ചു. കഡാവർ നായയുടെ സഹായത്തോടെ നടത്തിയ പരിശോധനയിൽ കൊന്തയുടെ ഭാഗങ്ങളും കണ്ടെത്തി. സെബാസ്റ്റ്യനെ ചോദ്യം ചെയ്തെങ്കിലും, തനിക്ക് ഈ സ്ത്രീകളെ അറിയാമെന്നും സാമ്പത്തിക ഇടപാടുകൾ ഉണ്ടായിരുന്നുവെന്നും സമ്മതിച്ചതല്ലാതെ, ഇവർക്ക് എന്തു സംഭവിച്ചുവെന്ന് വെളിപ്പെടുത്താൻ അയാൾ തയ്യാറായിട്ടില്ല. ഈ കേസുകൾ തെളിയിക്കാൻ ലഭിച്ച അസ്ഥികൾ ഡിഎൻഎ പരിശോധനയ്ക്ക് അയച്ചിട്ടുണ്ട്.