തിരുവനന്തപുരം:സംസ്ഥാനത്ത് വേനൽച്ചൂട് അസഹനീയമായി തുടരുന്ന പശ്ചാത്തലത്തിൽ, വിദ്യാർത്ഥികൾക്ക് ആശ്വാസമേകുന്ന നിർണ്ണായക തീരുമാനവുമായി വിദ്യാഭ്യാസ വകുപ്പ്. അവധിക്കാലത്ത് സ്കൂളുകളിൽ സ്പെഷ്യൽ ക്ലാസുകൾ സംഘടിപ്പിക്കുന്നത് പൂർണ്ണമായും നിരോധിച്ചതായി വിദ്യാഭ്യാസ മന്ത്രി വി.ശിവൻകുട്ടി അറിയിച്ചു. പൊള്ളുന്ന വെയിലിൽ കുട്ടികളെ സ്കൂളുകളിലേക്ക് അയക്കുന്നത് അവരുടെ ആരോഗ്യത്തെ സാരമായി ബാധിക്കുമെന്ന വിലയിരുത്തലിനെ തുടർന്നാണ് ഈ കർശന നടപടി.
ഏപ്രിൽ, മെയ് മാസങ്ങളിലെ കഠിനമായ ചൂട് കണക്കിലെടുത്ത് പ്രൈമറി തലം മുതൽ ഹയർ സെക്കൻഡറി വരെയുള്ള ഒരു വിഭാഗത്തിലും ക്ലാസുകൾ പാടില്ലെന്നാണ് ഉത്തരവ്. അവധിക്കാലം കുട്ടികൾക്ക് മാനസികമായും ശാരീരികമായും വിശ്രമിക്കാനുള്ള സമയമാണെന്നും, ഈ സമയത്ത് അവരെ വീണ്ടും പഠനസമ്മർദ്ദത്തിലേക്കും വെയിലിലേക്കും തള്ളിവിടുന്നത് അംഗീകരിക്കാനാവില്ലെന്നും മന്ത്രി വ്യക്തമാക്കി.
സർക്കാർ ഉത്തരവ് ലംഘിച്ച് ഏതെങ്കിലും വിദ്യാലയങ്ങൾ ക്ലാസുകൾ നടത്തിയാൽ അവർക്കെതിരെ കർശനമായ നിയമനടപടികൾ സ്വീകരിക്കും. ഇതിനാവശ്യമായ നിരീക്ഷണങ്ങൾ നടത്താൻ അതത് ജില്ലാ വിദ്യാഭ്യാസ ഓഫീസർമാർക്ക് നിർദ്ദേശം നൽകിയിട്ടുണ്ട്. സൂര്യാഘാതവും നിർജ്ജലീകരണവും ഉൾപ്പെടെയുള്ള ആരോഗ്യപ്രശ്നങ്ങളിൽ നിന്ന് കുട്ടികളെ സംരക്ഷിക്കുക എന്നതിനാണ് ഇപ്പോൾ മുൻഗണന നൽകുന്നതെന്നും വാർത്താക്കുറിപ്പിൽ പ്പറയുന്നു.
