തിരുവനന്തപുരം: സംസ്ഥാനത്തെ വിവിധ മേഖലകളിലെ ജനങ്ങൾക്ക് ആശ്വാസകരമായ നിരവധി തീരുമാനങ്ങളുമായി മുഖ്യമന്ത്രി പിണറായി വിജയന്റെ അധ്യക്ഷതയിൽ ചേർന്ന മന്ത്രിസഭായോഗം. മത്സ്യത്തൊഴിലാളികൾക്കുള്ള നഷ്ടപരിഹാരം, നെല്ല് സംഭരണ വില വർധിപ്പിച്ച നടപടിയിലെ ഭേദഗതി, പുതിയ തസ്തികകൾ തുടങ്ങിയവയ്ക്ക് യോഗം അംഗീകാരം നൽകി.

​ദുരിതാശ്വാസ നിധിയിൽ നിന്ന് വൻതോതിൽ ധനസഹായം

​മത്സ്യത്തൊഴിലാളികൾക്ക്: 2025 മെയ് മാസത്തിലെ കാലാവസ്ഥാ മുന്നറിയിപ്പിനെത്തുടർന്ന് തൊഴിൽ നഷ്ടപ്പെട്ട 1.72 ലക്ഷം മത്സ്യത്തൊഴിലാളികൾക്കായി 48.20 കോടി രൂപ അനുവദിച്ചു.

​ദുരന്തബാധിതർക്ക്: പത്തനംതിട്ട ജില്ലയിൽ വീടുകൾക്ക് നാശനഷ്ടം സംഭവിച്ച 143 പേർക്കായി 58.45 ലക്ഷം രൂപ അനുവദിക്കും.

​മരണപ്പെട്ടവരുടെ കുടുംബങ്ങൾക്ക്: ഇടുക്കി കട്ടപ്പനയിൽ ടാങ്ക് വൃത്തിയാക്കുന്നതിനിടെ മരിച്ച മൂന്ന് തമിഴ്‌നാട് സ്വദേശികളുടെ കുടുംബങ്ങൾക്ക് 5 ലക്ഷം രൂപ വീതം നൽകും. നെന്മാറയിൽ കൊല്ലപ്പെട്ട സുധാകരന്റെ മകൾ അഖിലയ്ക്ക് 3 ലക്ഷം രൂപയും അനുവദിച്ചു.

​. നെല്ല് സംഭരണ വിലയിൽ മാറ്റം

സപ്ലൈകോ വഴി സംഭരിക്കുന്ന നെല്ലിന്റെ വില കിലോയ്ക്ക് 30 രൂപയായി ഉയർത്തിയ ഉത്തരവിൽ ഭേദഗതി വരുത്തി. 2025-26 ഒന്നാം സീസൺ ആരംഭിച്ച 2025 ഒക്ടോബർ 20 മുതൽ ഇതിന് മുൻകാല പ്രാബല്യം ഉണ്ടാകും.

​. തസ്തികകളും ശമ്പള പരിഷ്കരണവും

​പോലീസിൽ 20 പുതിയ തസ്തികകൾ: ആംഡ് റിസർവ് ക്യാമ്പുകളുടെ മേൽനോട്ടം ശക്തമാക്കാൻ 20 റിസർവ് ഇൻസ്പെക്ടർ തസ്തികകൾ സൃഷ്ടിക്കും.

​തീരദേശ പോലീസിന് വേതന വർധന: സ്രാങ്ക്, ബോട്ട് ഡ്രൈവർ, ലാസ്കർ ഉൾപ്പെടെയുള്ള തസ്തികകളിൽ വേതനം വർധിപ്പിക്കാൻ തീരുമാനിച്ചു.

​നിഷിൽ ശമ്പള പരിഷ്കരണം: 

നാഷണൽ ഇൻസ്റ്റിറ്റ്യൂട്ട് ഓഫ് സ്പീച്ച് ആൻഡ് ഹിയറിംഗിലെ ജീവനക്കാർക്ക് 2019 മുതലുള്ള പത്താം ശമ്പള പരിഷ്കരണം അനുവദിച്ചു.
​നഴ്സുമാർക്ക് സ്ഥാനക്കയറ്റം: 400 ഓളം ഒഴിവുകൾ നിലവിലുള്ളതിനാൽ ജൂനിയർ പബ്ലിക് ഹെൽത്ത് നഴ്സുമാർക്ക് താൽക്കാലിക സ്ഥാനക്കയറ്റം നൽകും.

​. ഭൂമി പതിച്ചുനൽകലും ചട്ട ഭേദഗതിയും

​1964-ലെ ഭൂപതിവ് ചട്ടപ്രകാരം ഭൂമി പതിച്ചുനൽകുമ്പോൾ അതിലെ തേക്കുൾപ്പെടെയുള്ള രാജകീയ വൃക്ഷങ്ങളുടെ അവകാശം സർക്കാരിനായിരിക്കും എന്ന ഭേദഗതിക്ക് അംഗീകാരം നൽകി.
​സ്ഥാപനങ്ങളും സംഘടനകളും കൈവശം വച്ചിരിക്കുന്ന ഭൂമി പതിച്ചുനൽകുന്നതിനുള്ള മാനദണ്ഡങ്ങളിലും മാറ്റം വരുത്തി.

​വികസന പദ്ധതികൾക്ക് അനുമതി

​കണ്ണൂർ മാവിലായിൽ ഹെറിറ്റേജ് വില്ലേജ്, എ.കെ.ജി സ്മൃതിമണ്ഡപം സൗന്ദര്യവൽക്കരണം എന്നീ പദ്ധതികൾക്ക് ഭരണാനുമതി നൽകി.
​സംസ്ഥാനത്തെ എല്ലാ സിനിമാ തിയേറ്ററുകളിലും ഇ-ടിക്കറ്റിംഗ് പദ്ധതി നടപ്പിലാക്കാൻ ചലച്ചിത്ര വികസന കോർപ്പറേഷന് 8 കോടി രൂപയുടെ സർക്കാർ ഗ്യാരണ്ടി നൽകും.