ദോഹ: കന്നുകാലി ക്യാമ്പുകളുടെയും (Livestock Camps) ഫാമുകളുടെയും എസ്റ്റാബ്ലിഷ്മെന്റ് രജിസ്ട്രേഷൻ പുതുക്കുന്നതിനും വിവരങ്ങൾ അപ്ഡേറ്റ് ചെയ്യുന്നതിനും പുതിയ ഡിജിറ്റൽ സേവനം ആരംഭിച്ച് ഖത്തർ ആഭ്യന്തര മന്ത്രാലയം. മന്ത്രാലയത്തിന്റെ ഔദ്യോഗിക ആപ്പായ മെട്രാഷ്2 (Metrash2) വഴിയാണ് ഈ സേവനം ലഭ്യമാകുക.
സേവനങ്ങൾ കൂടുതൽ ലളിതമാക്കുന്നതിനും ഡിജിറ്റലൈസേഷൻ വ്യാപിപ്പിക്കുന്നതിനുമുള്ള മന്ത്രാലയത്തിന്റെ ശ്രമങ്ങളുടെ ഭാഗമായാണ് ഈ നടപടി.
മെട്രാഷ് ആപ്പിലെ 'ജനറൽ സർവീസസ്' (General Services) വിഭാഗത്തിലൂടെ ലളിതമായ ഘട്ടങ്ങളിലൂടെ ഈ പ്രക്രിയ പൂർത്തിയാക്കാം.അപേക്ഷ അംഗീകരിക്കുകയും നിശ്ചിത ഫീസ് അടയ്ക്കുകയും ചെയ്താലുടൻ പുതുക്കിയ എസ്റ്റാബ്ലിഷ്മെന്റ് രജിസ്ട്രേഷൻ സർട്ടിഫിക്കറ്റ് ലഭ്യമാകും. ഇത് ഉപയോക്താവിന്റെ മെട്രാഷ് പ്രൊഫൈലിലെ 'ഇ-വാലറ്റിൽ' (e-wallet) ഡിജിറ്റലായി സൂക്ഷിക്കാനും സാധിക്കും.
പൊതുജനങ്ങൾക്ക് മന്ത്രാലയ ഓഫീസുകളിൽ നേരിട്ട് പോകാതെ തന്നെ അതിവേഗം സേവനങ്ങൾ ലഭ്യമാക്കാൻ പുതിയ ഫീച്ചർ സഹായിക്കും. രാജ്യത്തെ ബിസിനസ്, കാർഷിക മേഖലയിലുള്ളവർക്ക് ഈ നീക്കം വലിയ ആശ്വാസമാകും.
