​ദോഹ: പരിസ്ഥിതി സംരക്ഷണത്തിനും സുസ്ഥിര വികസനത്തിനുമുള്ള പ്രതിബദ്ധത ഊട്ടിയുറപ്പിച്ചുകൊണ്ട് റവാബി ഹൈപ്പർമാർക്കറ്റ് പുതിയ പരിസ്ഥിതി സൗഹൃദ സംരംഭമായ ‘ലെറ്റ്‌സ് ഗ്രോ ഗ്രീൻ - എ ഗ്രീനർ ടുമാറോ സ്റ്റാർട്ട്സ് ടുഡേ’ കാമ്പെയ്‌ന് തുടക്കം കുറിച്ചു. ഖത്തർ നാഷണൽ വിഷൻ 2030-ന്റെ പാരിസ്ഥിതിക ലക്ഷ്യങ്ങൾക്ക് പിന്തുണ പ്രഖ്യാപിച്ചുകൊണ്ട് റവാബി ഹൈപ്പർമാർക്കറ്റിന്റെ ഇസ്ഗാവ ബ്രാഞ്ചിലാണ് ഒരു മാസം നീണ്ടുനിൽക്കുന്ന ഈ പ്രചാരണ പരിപാടി ആരംഭിച്ചത്.
​കാമ്പെയ്‌നിന്റെ ഭാഗമായി ഇസ്ഗാവ ബ്രാഞ്ചിൽ പ്രത്യേകമായി തയ്യാറാക്കിയ ‘ഗ്രീൻ ഗാർഡൻ’ ഉപഭോക്താക്കൾക്ക് വ്യത്യസ്തമായ ഒരു ഷോപ്പിംഗ് അനുഭവം സമ്മാനിക്കുന്നു. വീടുകളിലും ഓഫീസുകളിലും ബാൽക്കണികളിലും വെച്ചുപിടിപ്പിക്കാൻ അനുയോജ്യമായ വൈവിധ്യമാർന്ന ഇൻഡോർ-ഔട്ട്ഡോർ ചെടികളും പൂക്കളും ഇവിടെ പ്രദർശിപ്പിച്ചിട്ടുണ്ട്.
​ചെടികൾക്ക് പുറമെ വളങ്ങൾ, പ്രഷർ സ്‌പ്രേയറുകൾ, ഗാർഡൻ സ്‌പ്രേയറുകൾ, സസ്യ സംരക്ഷണ ദ്രാവകങ്ങൾ, മറ്റ് ഗാർഡനിംഗ് ഉപകരണങ്ങൾ തുടങ്ങിയ സസ്യപരിപാലനത്തിനാവശ്യമായ എല്ലാ അനുബന്ധ സാമഗ്രികളും ഒരു കുടക്കീഴിൽ ലഭ്യമാക്കിയിട്ടുണ്ട്. ദിനംപ്രതിയുള്ള ജീവിതത്തിൽ ഹരിത സംസ്കാരം വളർത്തിയെടുക്കാനും പരിസ്ഥിതിയെ കൂടുതൽ അടുത്തറിയാനും ഉപഭോക്താക്കളെ പ്രോത്സാഹിപ്പിക്കുകയാണ് പദ്ധതിയിലൂടെ ലക്ഷ്യമിടുന്നത്.
​വരും തലമുറകൾക്കായി പ്രകൃതിവിഭവങ്ങൾ സംരക്ഷിക്കുക എന്ന ലക്ഷ്യത്തോടെയാണ് കമ്പനി ഈ സംരംഭം നടപ്പിലാക്കുന്നതെന്ന് അൽ റവാബി ഗ്രൂപ്പ് മാനേജിംഗ് ഡയറക്ടർ മുഹമ്മദ് അബ്ദുള്ള വ്യക്തമാക്കി. "സുസ്ഥിരമായ ഒരു ഭാവി പടുത്തുയർത്തുക എന്നത് സമൂഹത്തിന്റെ കൂട്ടായ ഉത്തരവാദിത്തമാണ്. ദിനചര്യകളിൽ ചെറിയ മാറ്റങ്ങൾ വരുത്തിക്കൊണ്ട് പ്രകൃതിയെ സംരക്ഷിക്കാൻ ഉപഭോക്താക്കളെ പ്രാപ്തരാക്കുകയാണ് 'ലെറ്റ്‌സ് ഗ്രോ ഗ്രീൻ' കാമ്പെയ്‌നിലൂടെ ഞങ്ങൾ ചെയ്യുന്നത്. ഖത്തർ നാഷണൽ വിഷൻ 2030 മുന്നോട്ടുവെക്കുന്ന സാമ്പത്തിക-സാമൂഹിക-പാരിസ്ഥിതിക വികസന കാഴ്ചപ്പാടുകളോട് റവാബി ഗ്രൂപ്പ് പൂർണ്ണമായി സഹകരിക്കുന്നു," അദ്ദേഹം കൂട്ടിച്ചേർത്തു.
​റവാബി ഹൈപ്പർമാർക്കറ്റ് ഇസ്ഗാവ ശാഖയിൽ ആരംഭിച്ച 'ലെറ്റ്‌സ് ഗ്രോ ഗ്രീൻ' കാമ്പെയ്‌ൻ ഒരു മാസക്കാലം തുടരും.