പാൽ ആരോഗ്യത്തിന് ഏറെ ഗുണകരമായ ഭക്ഷണമാണെങ്കിലും, സുരക്ഷിതമല്ലാത്ത രീതിയിൽ ഉപയോഗിച്ചാൽ ഗുരുതര ആരോഗ്യപ്രശ്നങ്ങൾക്ക് കാരണമാകാം. കാൽസ്യം, പ്രോട്ടീൻ തുടങ്ങി ശരീരത്തിന് ആവശ്യമായ നിരവധി പോഷകങ്ങൾ നൽകുന്ന പാലിൽ അപകടകാരികളായ ബാക്ടീരിയകൾ ഉണ്ടാകാനുള്ള സാധ്യതയുണ്ട്. പാസ്ചറൈസ് ചെയ്യാത്തതോ ആവശ്യത്തിന് ചൂടാക്കാത്തതോ ആയ പാൽ ഉപയോഗിക്കുന്നതാണ് പ്രധാന അപകടസാധ്യത.

തിളപ്പിക്കാത്ത പാൽ കുടിച്ചതിനെ തുടർന്ന് ബ്രൂസെല്ലോസിസ് ബാധിച്ച 33കാരന് പിന്നീട് ഹൃദയത്തെ ബാധിക്കുന്ന ഗുരുതര സങ്കീർണതയുണ്ടായ സംഭവമാണ് ഇപ്പോൾ ദേശീയതലത്തിൽ തന്നെ ചർച്ചയാകുന്നത്. എൻഡിടിവിയാണ് സംഭവം റിപ്പോർട്ട് ചെയ്തത്.

ഏകദേശം 20 ദിവസത്തോളം അണുബാധയോട് പോരാടിയ യുവാവിന്റെ ആരോഗ്യനില പിന്നീട് വഷളാവുകയായിരുന്നു. പരിശോധനകളിലാണ് ബ്രൂസെല്ല ബാക്ടീരിയയാണ് രോഗത്തിന് പിന്നിലെന്ന് കണ്ടെത്തിയത്. തിളപ്പിക്കാത്ത പാൽ കഴിച്ചതിലൂടെ ബാക്ടീരിയ ശരീരത്തിലെത്തിയതായാണ് കണ്ടെത്തൽ. തുടർന്ന് അണുബാധ ഹൃദയത്തെയും ബാധിക്കുകയും ഇൻഫെക്റ്റീവ് എൻഡോകാർഡൈറ്റിസ് എന്ന ഗുരുതര അവസ്ഥയിലേക്ക് എത്തുകയും ചെയ്തു.

എങ്ങനെയാണ് ബ്രൂസെല്ല മനുഷ്യരിലെത്തുന്നത്?

രോഗബാധയുള്ള കന്നുകാലികൾ, ആടുകൾ, മറ്റ് മൃഗങ്ങൾ എന്നിവയുമായി നേരിട്ട് സമ്പർക്കം പുലർത്തുന്നതിലൂടെയും ബ്രൂസെല്ല ബാക്ടീരിയ മനുഷ്യരിലേക്ക് പകരാം. രോഗബാധയുള്ള മൃഗങ്ങളിൽ നിന്നുള്ള പാൽ പാസ്ചറൈസ് ചെയ്യാതെ കുടിക്കുന്നതും പ്രധാന അപകടസാധ്യതയാണ്.

തുടർച്ചയായോ ഇടവിട്ടോ ഉണ്ടാകുന്ന പനി, അമിതമായ ക്ഷീണം, തലവേദന, സന്ധിവേദന, വിശപ്പില്ലായ്മ തുടങ്ങിയവയാണ് ബ്രൂസെല്ലോസിസിന്റെ പ്രധാന ലക്ഷണങ്ങൾ. കൃത്യസമയത്ത് ചികിത്സ ലഭിച്ചില്ലെങ്കിൽ അണുബാധ ദീർഘകാലം തുടരാനും മെനിഞ്ചൈറ്റിസ്, ഹൃദയത്തിലെ അണുബാധ തുടങ്ങിയ ഗുരുതര സങ്കീർണതകൾക്കും കാരണമാകാം.

തിളപ്പിക്കാത്ത പാൽ എന്തുകൊണ്ട് അപകടകരം?

പാസ്ചറൈസ് ചെയ്യാത്തതോ തിളപ്പിക്കാത്തതോ ആയ പാൽ നേരിട്ട് കുടിക്കുന്നത് ഒഴിവാക്കണമെന്നാണ് ആരോഗ്യവിദഗ്ധരുടെ നിർദേശം. പാലിൽ ഉണ്ടായേക്കാവുന്ന രോഗകാരികളായ സൂക്ഷ്മാണുക്കളെ നശിപ്പിക്കുകയാണ് പാസ്ചറൈസേഷന്റെയും ചൂടാക്കലിന്റെയും പ്രധാന ലക്ഷ്യം.

അണുവിമുക്തമാക്കാത്ത പാലിലൂടെ ഇ.കോളി, സാൽമൊണെല്ല, ലിസ്റ്റീരിയ മോണോസൈറ്റോജെൻസ് തുടങ്ങിയ ബാക്ടീരിയകൾ ശരീരത്തിലെത്താം.

ഇ.കോളി അണുബാധ കടുത്ത വയറുവേദന, വയറിളക്കം, ഛർദി എന്നിവയ്ക്ക് കാരണമാകാം. ചില സാഹചര്യങ്ങളിൽ ഇത് വൃക്കകളുടെ പ്രവർത്തനത്തെയും ഗുരുതരമായി ബാധിക്കാം. സാൽമൊണെല്ല അണുബാധ വയറിളക്കം, പനി, അടിവയറുവേദന തുടങ്ങിയ പ്രശ്നങ്ങൾക്ക് ഇടയാക്കും. ലിസ്റ്റീരിയ മോണോസൈറ്റോജെൻസ് ലിസ്റ്റീരിയോസിസ് എന്ന ഗുരുതര അണുബാധയ്ക്കും കാരണമാകാം.

പ്രത്യേകിച്ച് കുട്ടികൾ, പ്രായമായവർ, ഗർഭിണികൾ, പ്രതിരോധശേഷി കുറഞ്ഞവർ എന്നിവർ അണുവിമുക്തമാക്കാത്ത പാൽ ഉപയോഗിക്കുന്നത് കൂടുതൽ അപകടസാധ്യതയുള്ളതാണ്. അതിനാൽ പാൽ സുരക്ഷിതമായി പാസ്ചറൈസ് ചെയ്തതാണെന്ന് ഉറപ്പാക്കുകയോ ആവശ്യമായ രീതിയിൽ ചൂടാക്കിയ ശേഷം മാത്രം ഉപയോഗിക്കുകയോ ചെയ്യുന്നത് പ്രധാനമാണ്.