ദോഹ: വിശുദ്ധ റമദാൻ മാസത്തിന് മുന്നോടിയായി രാജ്യത്തെ ഭക്ഷ്യസുരക്ഷ ഉറപ്പാക്കാൻ നഗരസഭ മന്ത്രാലയം (Ministry of Municipality) വിപുലമായ നിരീക്ഷണ പദ്ധതി ആവിഷ്കരിച്ചു. ഉപഭോക്താക്കളുടെ ആരോഗ്യം സംരക്ഷിക്കുന്നതിനും വിപണിയിൽ ഗുണനിലവാരം ഉറപ്പുവരുത്തുന്നതിനുമായി എല്ലാ നഗരസഭകളിലും പരിശോധന കർശനമാക്കും.റമദാൻ മാസത്തിൽ മാത്രമായി ദോഹ മുനിസിപ്പാലിറ്റിയിൽ 10,000-ത്തോളം പരിശോധനാ സന്ദർശനങ്ങൾ നടത്താൻ ലക്ഷ്യമിടുന്നു.
റസ്റ്റോറന്റുകൾ, സെൻട്രൽ കിച്ചണുകൾ, റമദാൻ ടെന്റുകൾ, ഹോട്ടൽ ബുഫേകൾ, കശാപ്പുശാലകൾ എന്നിവയ്ക്ക് പുറമെ പുരുഷന്മാരുടെ ബാർബർ ഷോപ്പുകളിലും വനിതാ സലൂണുകളിലും പരിശോധനയുണ്ടാകും.
ഭക്ഷണ പദാർത്ഥങ്ങളുടെ ഗുണനിലവാരം ഉറപ്പാക്കാൻ ഇതിനോടകം 298 സാംപിളുകൾ സർക്കാർ ലബോറട്ടറിയിൽ പരിശോധനയ്ക്കായി ശേഖരിച്ചു.
പരാതികൾ സ്വീകരിക്കുന്നതിനും അടിയന്തര നടപടികൾക്കുമായി പ്രത്യേക സംഘങ്ങൾ 24 മണിക്കൂറും സജ്ജമായിരിക്കും.
നിയമലംഘനം നടത്തുന്ന സ്ഥാപനങ്ങൾക്കെതിരെ 60 ദിവസം വരെ അടച്ചിടൽ ഉൾപ്പെടെയുള്ള കർശന നിയമനടപടികൾ സ്വീകരിക്കും.
