​തിരുവനന്തപുരം: കേരളത്തിലെ രാഷ്ട്രീയ സാഹചര്യങ്ങളിലും തിരഞ്ഞെടുപ്പ് ഗോദയിലും യു.ഡി.എഫ്-എൽ.ഡി.എഫ് മുന്നണികൾക്കെതിരെ രൂക്ഷമായ വിമർശനങ്ങളുമായി ബി.ജെ.പി നേതാവ് രാജീവ് ചന്ദ്രശേഖർ. പ്രതിപക്ഷ നേതാവ് വി.ഡി സതീശന്റെ പ്രസ്താവനകൾ അധികാരമോഹത്തിൽ നിന്നുള്ള ഭയത്തിന്റെ പ്രതിഫലനമാണെന്നും കേരളത്തിൽ എൻ.ഡി.എ നിർണ്ണായക ശക്തിയാകുമെന്നും അദ്ദേഹം പറഞ്ഞു.

​സതീശന് മുഖ്യമന്ത്രി മോഹം, സി.പി.എമ്മിന് പതനം

​സി.പി.എം-ബി.ജെ.പി ഡീൽ എന്ന പ്രതിപക്ഷ നേതാവിന്റെ ആരോപണത്തെ പരിഹസിച്ചുകൊണ്ടാണ് രാജീവ് ചന്ദ്രശേഖർ സംസാരിച്ചത്. "സതീശന് വലിയ പേടിയാണ്. ജയിച്ചാലല്ലേ മുഖ്യമന്ത്രിയാകൂ എന്ന വേവലാതിയിലാണ് അദ്ദേഹം നുണകൾ പ്രചരിപ്പിക്കുന്നത്," അദ്ദേഹം പറഞ്ഞു. സി.പി.എം എന്നത് മുങ്ങിക്കൊണ്ടിരിക്കുന്ന ഒരു കപ്പലാണെന്നും ആ കപ്പലിലേക്ക് ബി.ജെ.പിയെ കെട്ടിയിടാൻ ആരും നോക്കേണ്ടെന്നും അദ്ദേഹം കൂട്ടിചേർത്തു. പാലക്കാട്ടെ നിലവിലെ എം.എൽ.എയുടെ അസാന്നിധ്യത്തെയും അദ്ദേഹം ചോദ്യം ചെയ്തു.

​നേമത്ത് 'പൂട്ടും താക്കോലും' വേണ്ട

​നേമത്തെ മത്സരത്തെക്കുറിച്ചുള്ള ചോദ്യത്തിന് വളരെ ആത്മവിശ്വാസത്തോടെയായിരുന്നു അദ്ദേഹത്തിന്റെ മറുപടി. "നേമത്ത് വലിയ പൂട്ടും താക്കോലുമൊന്നും ആരും കയ്യിൽ വെക്കേണ്ടതില്ല, ജനങ്ങൾ അത് തീരുമാനിച്ചോളും," എന്ന് അദ്ദേഹം വ്യക്തമാക്കി. താൻ നേമത്ത് മാത്രമല്ല, കേരളം മുഴുവൻ സജീവമാണെന്നും നൂറു ശതമാനം വിജയപ്രതീക്ഷയുണ്ടെന്നും അദ്ദേഹം പറഞ്ഞു.

​കേരളം മാറ്റം ആഗ്രഹിക്കുന്നു

​നരേന്ദ്ര മോദിയുടെ നേതൃത്വത്തിലുള്ള വികസനം കേരളത്തിലെ ജനങ്ങൾ തിരിച്ചറിഞ്ഞു കഴിഞ്ഞു. കഴിഞ്ഞ 12 വർഷത്തിനിടെ രാജ്യം കൈവരിച്ച നേട്ടങ്ങൾ കേരളത്തിലും പ്രതിഫലിക്കും. തദ്ദേശ തിരഞ്ഞെടുപ്പിലെ ബി.ജെ.പിയുടെ മുന്നേറ്റം ഇതിന് തെളിവാണ്. ഇത്തവണ ആരും പ്രതീക്ഷിക്കാത്ത അത്രയും സീറ്റുകൾ എൻ.ഡി.എ നേടുമെന്നും കേരള രാഷ്ട്രീയത്തിൽ ബി.ജെ.പി നിർണ്ണായക ശക്തിയാകുമെന്നും അദ്ദേഹം അവകാശപ്പെട്ടു.

​എം.ടി. രമേശിനെപ്പോലെയുള്ള മുതിർന്ന നേതാക്കളെ അവഗണിച്ചിട്ടില്ല. തിരഞ്ഞെടുപ്പ് പ്രവർത്തനങ്ങൾ ഏകോപിപ്പിക്കാനാണ് അവരെ മത്സരിപ്പിക്കാത്തത്.
​ മുസ്ലിം സമുദായത്തിന് ബി.ജെ.പിയോട് പേടിയില്ല. ഇടത്-വലത് മുന്നണികൾ പടച്ചുവിടുന്ന വിഷം കലർന്ന പ്രചാരണമാണിത്. എന്നാൽ രാജ്യദ്രോഹ പ്രവർത്തനങ്ങളിൽ ഏർപ്പെടുന്ന ജമാഅത്തെ ഇസ്ലാമിയെപ്പോലുള്ള സംഘടനകളെ ബി.ജെ.പി എക്കാലവും എതിർക്കും.
​ ബി.ജെ.പിക്ക് സീറ്റ് കിട്ടില്ലെന്ന് പറയുന്ന മുഖ്യമന്ത്രി ആദ്യം സ്വന്തം മണ്ഡലമായ ധർമ്മടം നിലനിർത്താൻ നോക്കട്ടെ എന്ന് അദ്ദേഹം പരിഹസിച്ചു.