തദ്ദേശസ്വയംഭരണ സ്ഥാപനങ്ങളിലെയും നിയമസഭയിലേക്കുമുള്ള തിരഞ്ഞെടുപ്പ് വിജയിക്കാൻ തന്ത്രങ്ങൾ ആവിഷ്കരിക്കാൻ ബിജെപി സംസ്ഥാന പ്രസിഡന്റ് രാജീവ് ചന്ദ്രശേഖർ സ്വന്തം പ്രൊഫഷണൽ സംഘത്തെ സജ്ജമാക്കി. ‘ടീം വികസിതകേരളം’ എന്ന പേരിലാണ് ബിജെപി സംസ്ഥാന അധ്യക്ഷന്റെ സ്വന്തം ടീമിനെ നിയോഗിച്ചിരിക്കുന്നത്. എട്ട് സാങ്കേതിക വിദഗ്ധരാണ് സംഘത്തിലുള്ളത്. ഇവരുടെ ശമ്പളവും ചെലവുകളും രാജീവ് ചന്ദ്രശേഖർ തന്നെയാണ് വഹിക്കുന്നത്.
ടീം നേരിട്ട് പ്രസിഡന്റിന്റെ ഓഫീസ് മുഖാന്തിരമാണ് പ്രവർത്തിക്കുന്നത്. പാർട്ടിയുടെ നിലപാടുകളും തന്ത്രങ്ങളും വിലയിരുത്തി ആഴ്ചതോറും രാജീവ് ചന്ദ്രശേഖറിന് റിപ്പോർട്ട് നൽകണം. നിലമ്പൂർ ഉപതിരഞ്ഞെടുപ്പിലെ കൃത്യമായ വിലയിരുത്തൽ വിജയകരമായതോടെ സംഘത്തിന് കൂടുതൽ ചുമതല നൽകി. പാർട്ടിയുടെ തദ്ദേശ, നിയമസഭാ തിരഞ്ഞെടുപ്പ് തന്ത്രങ്ങൾക്കും ഇപ്പോൾ ഈ ടീമിന്റെ പ്രൊഫഷണൽ ടച്ചാണ് മുഖ്യമായിരിക്കുക.
