കാർത്തി നായകനായി എത്തുന്ന വമ്പൻ ചിത്രം
'സർദാർ 2'-ന്റെ ഭാഗമായി രജിഷ വിജയന്റെ പുതിയ ലുക്ക് പുറത്തുവിട്ടു. താരത്തിന്റെ ജന്മദിനത്തോടനുബന്ധിച്ച് അണിയറപ്രവർത്തകർ പുറത്തുവിട്ട സ്പെഷ്യൽ പോസ്റ്ററിൽ, നിറവയറുമായി നിൽക്കുന്ന രജിഷയുടെ ലുക്ക് ഇതിനകം തന്നെ സോഷ്യൽ മീഡിയയിൽ വലിയ ചർച്ചയായിക്കഴിഞ്ഞു.
രജിഷയുടെ സിനിമാ ജീവിതത്തിലെ മികച്ച വേഷങ്ങളിലൊന്നായിരുന്ന ആദ്യ ഭാഗത്തിലെ 'ഇന്ദ്രാണി' എന്ന കഥാപാത്രത്തിന്റെ തുടർച്ച തന്നെയാണ് ഈ ചിത്രത്തിലും രജിഷ അവതരിപ്പിക്കുന്നത് എന്നാണ് പോസ്റ്റർ നൽകുന്ന സൂചന.
പി. എസ്. മിത്രൻ സംവിധാനം ചെയ്യുന്ന ചിത്രത്തിൽ വൻ താരനിരയാണുള്ളത്. എസ്. ജെ. സൂര്യ, മാളവിക മോഹനൻ, ആഷിക രംഗനാഥ്, യോഗി ബാബു, ബാബു ആന്റണി എന്നിവർക്കൊപ്പം കാർത്തിയുടെ ആക്ഷൻ പ്രകടനവും പ്രേക്ഷകർ വലിയ പ്രതീക്ഷയോടെയാണ് കാത്തിരിക്കുന്നത്.
സെപ്റ്റംബർ 10-ന് ലോകമെമ്പാടുമുള്ള തിയേറ്ററുകളിൽ റിലീസ് ചെയ്യുന്ന ചിത്രത്തിന് സംഗീതം ഒരുക്കുന്നത് സാം സി. എസ്. ആണ്. ജപ്പാൻ പശ്ചാത്തലമാക്കിയുള്ള മിഷനും വിമാനത്തിനുള്ളിലെ വമ്പൻ ആക്ഷൻ രംഗങ്ങളും ചിത്രത്തിന്റെ പ്രധാന ആകർഷണങ്ങളായിരിക്കും.
'അനുരാഗ കരിക്കിൻ വെള്ളം' എന്ന ചിത്രത്തിലൂടെ അരങ്ങേറ്റം കുറിച്ച രജിഷ, 'ജൂൺ' എന്ന ചിത്രത്തിലൂടെ മലയാളികളുടെ പ്രിയങ്കരിയായി മാറി. പിന്നീട് 'കർണ്ണൻ' എന്ന തമിഴ് ചിത്രത്തിലൂടെയും 'സർദാർ' എന്ന ആദ്യ ഭാഗത്തിലൂടെയും തെന്നിന്ത്യൻ സിനിമാലോകത്ത് തന്റേതായ ഇടം കണ്ടെത്താൻ താരത്തിനായി. 'ബൈസൺ', 'മസ്തിഷ്ക മരണം' എന്നിവയാണ് രജിഷയുടേതായി ഒടുവിൽ പുറത്തിറങ്ങിയ ചിത്രങ്ങൾ.
Photo Courtesy - Google
