കളമശ്ശേരി: ബയോസയൻസസ് മേഖലയിലെ ഗവേഷണ പ്രവർത്തനങ്ങൾ വിപുലീകരിക്കുന്നതിന്റെ ഭാഗമായി രാജഗിരി കോളേജ് ഓഫ് സോഷ്യൽ സയൻസസ്, കളമശ്ശേരിയിൽ അത്യാധുനിക ലബോറട്ടറി സൗകര്യങ്ങൾ സജ്ജമാക്കി. കോളേജ് പ്രിൻസിപ്പൽ റവ. ഫാ. ഡോ. സാജു എം.ഡി. നവീകരിച്ച ലബോറട്ടറി സൗകര്യങ്ങളുടെ വെഞ്ചരിപ്പ് കർമം നിർവഹിച്ചു.പരിസ്ഥിതി ശാസ്ത്രം, മറൈൻ സയൻസ്, പ്ലാന്റ് ബയോടെക്നോളജി, മൈക്രോബയോളജി, നാനോടെക്നോളജി, ഫൈറ്റോകെമിസ്ട്രി, ഡ്രഗ് ഡിസൈൻ, എത്നോബോട്ടണി, കൂൺ കൃഷിയും സാങ്കേതികവിദ്യയും, കമ്പ്യൂട്ടേഷണൽ ബയോളജി, എന്റമോളജി (കീടശാസ്ത്രം), ഫുഡ് സയൻസ് ആൻഡ് ന്യൂട്രീഷൻ തുടങ്ങിയ വിവിധ മേഖലകളിൽ ഗവേഷണം നടത്തുന്നതിനാവശ്യമായ ആധുനിക ഉപകരണങ്ങളും സംവിധാനങ്ങളും ലബോറട്ടറിയിൽ ഒരുക്കിയിട്ടുണ്ട്. ഇതുവഴി ബയോസയൻസസിലെ വിവിധ ഗവേഷണ മേഖലകളിൽ കൂടുതൽ വിപുലമായ പഠനങ്ങൾക്കും നൂതന ഗവേഷണ പ്രവർത്തനങ്ങൾക്കും അവസരമൊരുങ്ങും.

ഗവേഷണ മികവിന്റെ കാര്യത്തിൽ ശ്രദ്ധേയമായ നേട്ടങ്ങളാണ് കോളേജിലെ ബയോസയൻസസ് വിഭാഗം കൈവരിച്ചിട്ടുള്ളത്. ഉയർന്ന ഇംപാക്ട് ഫാക്ടറുള്ള ശാസ്ത്ര ജേണലുകളിൽ വിഭാഗത്തിലെ ഗവേഷകർ പ്രബന്ധങ്ങൾ പ്രസിദ്ധീകരിച്ചിട്ടുണ്ട്. സ്റ്റാൻഫോർഡ് സർവകലാശാലയുമായി ബന്ധപ്പെട്ട ലോകത്തിലെ മികച്ച രണ്ട് ശതമാനം ശാസ്ത്രജ്ഞരുടെ പട്ടികയിൽ വിഭാഗത്തിലെ നാല് ഗവേഷകർ ഇടം നേടിയിട്ടുണ്ട്. വ്യവസായ സ്ഥാപനങ്ങളുടെ സഹകരണത്തോടെ ഉൽപ്പന്ന വികസന പ്രവർത്തനങ്ങളിലും വിഭാഗം സജീവമാണ്. കൂടാതെ, ദേശീയവും അന്തർദേശീയവുമായ തലങ്ങളിൽ സംയുക്ത ഗവേഷണ പദ്ധതികളും നടപ്പിലാക്കിവരുന്നു.

അർജുന നാച്ചുറൽ പ്രൈവറ്റ് ലിമിറ്റഡിന്റെ പിന്തുണയോടെയാണ് ലബോറട്ടറി സൗകര്യങ്ങൾ നവീകരിച്ചത്. കമ്പനിയും കോളേജിലെ ബയോസയൻസസ് വിഭാഗവും തമ്മിലുള്ള സഹകരണത്തിന്റെ ഭാഗമായി സംയുക്ത ഗവേഷണ പദ്ധതികളും നടന്നുവരുന്നുണ്ട്. അക്കാദമിക ഗവേഷണവും വ്യവസായ മേഖലയിലെ വൈദഗ്ധ്യവും സംയോജിപ്പിച്ച് പ്രായോഗിക പ്രാധാന്യമുള്ള ഗവേഷണങ്ങൾ പ്രോത്സാഹിപ്പിക്കുകയാണ് ഈ സഹകരണത്തിന്റെ ലക്ഷ്യം.

ചടങ്ങിൽ കോളേജ് അസോസിയേറ്റ് ഡയറക്ടർ ഡോ. ബിനോയ് ജോസഫ്, അസിസ്റ്റന്റ് ഡയറക്ടർ റവ. ഫാ. ഡോ. ഷിന്റോ ജോസഫ്, അർജുന നാച്ചുറൽ പ്രൈവറ്റ് ലിമിറ്റഡ് മാനേജിങ് ഡയറക്ടർ ഡോ. ബെന്നി ആന്റണി, ബയോസയൻസസ് ഡയറക്ടർ ഡോ. അൽഫോൻസ വിജയ ജോസഫ് എന്നിവർ സംസാരിച്ചു.

Photo Courtesy - Google