​ദോഹ: രാജ്യത്ത് തുടരുന്ന ശക്തമായ മഴയെത്തുടർന്നുണ്ടായ വെള്ളക്കെട്ടുകൾ പരിഹരിക്കുന്നതിൽ നിർണ്ണായക പുരോഗതിയുമായി പൊതുമരാമത്ത് അതോറിറ്റി (അശ്ഗാൽ). നിലവിൽ ലഭിച്ച 770 പരാതികളിൽ 85 ശതമാനവും പരിഹരിച്ചതായും ശേഷിക്കുന്നവയിൽ ദ്രുതഗതിയിലുള്ള നടപടികൾ തുടരുകയാണെന്നും അശ്ഗാൽ അറിയിച്ചു.​യുദ്ധകാലാടിസ്ഥാനത്തിൽ നടപടികൾ
​അൽ വക്ര, അൽ വുഖൈർ, ഇൻഡസ്ട്രിയൽ ഏരിയ, മെബൈരീക്ക് എന്നീ പ്രദേശങ്ങളിലാണ് മഴ ഏറ്റവും കൂടുതൽ ബാധിച്ചത്. ഗതാഗത തടസ്സം ഒഴിവാക്കാനും വെള്ളം ഒഴുക്കിക്കളയാനും അശ്ഗാലിന്റെ ഫീൽഡ് ടീമുകൾ 24 മണിക്കൂറും കർമ്മനിരതരാണ്.വെള്ളക്കെട്ട് നീക്കം ചെയ്യുന്നതിനായി 370-ലധികം വാട്ടർ ടാങ്കറുകളും 44-ലധികം മൊബൈൽ പമ്പുകളും വിവിധയിടങ്ങളിൽ വിന്യസിച്ചിട്ടുണ്ട്.ആഭ്യന്തര മന്ത്രാലയം, ട്രാഫിക് ഡയറക്ടറേറ്റ്, മുൻസിപ്പാലിറ്റി മന്ത്രാലയം എന്നിവയുമായി ചേർന്നാണ് 'റെയിൻ എമർജൻസി റൂം' പ്രവർത്തനങ്ങൾ ഏകോപിപ്പിക്കുന്നത്.കാലാവസ്ഥാ വകുപ്പിൽ നിന്നുള്ള വിവരങ്ങൾ തത്സമയം നിരീക്ഷിച്ചുകൊണ്ട് പ്രധാന ടണലുകളിലും റോഡുകളിലും വെള്ളം ഉയരാതിരിക്കാൻ അത്യാധുനിക സംവിധാനങ്ങൾ ഉപയോഗിക്കുന്നുണ്ട്. റോഡുകളിലെ ഡിജിറ്റൽ സൈൻ ബോർഡുകൾ വഴി യാത്രക്കാർക്ക് കൃത്യമായ നിർദ്ദേശങ്ങൾ നൽകുന്നുണ്ടെന്നും അശ്ഗാൽ അറിയിച്ചു.മഴക്കാലത്തിന് മുന്നോടിയായി വിപുലമായ അറ്റകുറ്റപ്പണികളാണ് അതോറിറ്റി പൂർത്തിയാക്കിയിരുന്നത്. 1,70,000 ഡ്രെയിനേജ് ഇൻലെറ്റുകൾ, 658 കിലോമീറ്റർ ഡ്രെയിനേജ് ശൃംഖല, 120-ലധികം ടണലുകൾ എന്നിവ മുൻകൂട്ടി വൃത്തിയാക്കി പ്രവർത്തനക്ഷമമാക്കിയിരുന്നു.
​മഴസമയത്ത് വാഹനമോടിക്കുന്നവർ അതീവ ജാഗ്രത പാലിക്കണമെന്ന് അധികൃതർ അഭ്യർത്ഥിച്ചു. വെള്ളക്കെട്ടുകൾ ശ്രദ്ധയിൽപ്പെട്ടാൽ അശ്ഗാലിന്റെ കസ്റ്റമർ സർവീസ് സെന്ററിലോ (188), 'Ashghal 360' ആപ്ലിക്കേഷൻ വഴിയോ വിവരം അറിയിക്കാവുന്നതാണ്.