തിരുവനന്തപുരം: വരാനിരിക്കുന്ന നിയമസഭാ തിരഞ്ഞെടുപ്പിൽ കേരളത്തിലെ പിന്നാക്ക സമുദായങ്ങൾക്ക് വിജയസാദ്ധ്യതയുള്ള സീറ്റുകൾ തന്നെ നൽകണമെന്ന് ലോക്സഭാ പ്രതിപക്ഷ നേതാവ് രാഹുൽ ഗാന്ധി കർശന നിർദ്ദേശം നൽകി. കോൺഗ്രസ് കേന്ദ്ര ഇലക്ഷൻ കമ്മിറ്റിക്കാണ് അദ്ദേഹം ഈ നിർദ്ദേശം നൽകിയത്. ഇതോടെ, പാർട്ടി സ്ക്രീനിംഗ് കമ്മിറ്റി നേരത്തെ സമർപ്പിച്ച സ്ഥാനാർത്ഥിപ്പട്ടികയിൽ വിപുലമായ മാറ്റങ്ങൾക്കും പരിശോധനകൾക്കും വഴിതെളിഞ്ഞു.
​കഴിഞ്ഞയാഴ്ച ശിവഗിരി സന്ദർശിച്ച രാഹുൽ ഗാന്ധിക്ക്, ശ്രീനാരായണ ധർമ്മസംഘം ട്രസ്റ്റ് പ്രസിഡന്റ് സ്വാമി സച്ചിദാനന്ദ പിന്നാക്കക്കാരുടെ അവഗണന ചൂണ്ടിക്കാട്ടി നിവേദനം നൽകിയിരുന്നു. ശിവഗിരി മഠത്തിന്റെ ഈ ആവശ്യം അതീവ ഗൗരവത്തോടെ പരിഗണിക്കുമെന്ന് അന്ന് നൽകിയ ഉറപ്പാണ് ഇപ്പോൾ രാഹുൽ പാലിച്ചിരിക്കുന്നത്.
​തൃപ്പൂണിത്തുറയിൽ സമവാക്യങ്ങൾ മാറുന്നു
​നിലവിലെ കോൺഗ്രസ് പാർലമെന്ററി പാർട്ടിയിൽ ഈഴവ സമുദായത്തിൽ നിന്നുള്ള ഏക പ്രതിനിധി കെ. ബാബുവാണ്. അദ്ദേഹം ഇത്തവണ മത്സരരംഗത്തില്ലാത്ത സാഹചര്യത്തിൽ, ആ സീറ്റിലേക്ക് രമേശ് പിഷാരടി, രാജു പി. നായർ എന്നിവരെ പരിഗണിച്ചത് പാർട്ടിയിൽ വലിയ പ്രതിഷേധത്തിന് കാരണമായിരുന്നു.
​സമുദായ പ്രാതിനിധ്യം ഉറപ്പാക്കാൻ എം. ലിജുവിനെയോ കൊച്ചി ഡെപ്യൂട്ടി മേയർ ദീപക് ജോയിയെയോ ഇവിടെ പരിഗണിച്ചേക്കും.
​എം. ലിജു മത്സരിച്ചിരുന്ന അമ്പലപ്പുഴ സീറ്റ്, സി.പി.എമ്മുമായി അകന്നുനിൽക്കുന്ന മുതിർന്ന നേതാവ് ജി. സുധാകരനെ പിന്തുണയ്ക്കാനായി മാറ്റി വെച്ചിരിക്കുകയാണ്.
​തിരുവനന്തപുരത്ത് സീറ്റ് തർക്കം
​തലസ്ഥാനത്തെ സുപ്രധാന സീറ്റായ തിരുവനന്തപുരം, ഘടകകക്ഷിയായ സി.എം.പിക്ക് (സി.പി. ജോൺ) നൽകാനുള്ള നീക്കത്തിനെതിരെ കോൺഗ്രസ് പ്രാദേശിക നേതൃത്വം രംഗത്തുവന്നു.
​ടി. ശരത്ചന്ദ്ര പ്രസാദ്, ജി. സുബോധൻ തുടങ്ങിയ നേതാക്കൾ ഈ സീറ്റുകൾക്കായി അവകാശവാദം ഉന്നയിക്കുന്നുണ്ട്.
​കഴിഞ്ഞ തവണ സി.പി.എം ഈഴവ വിഭാഗത്തിന് നൽകിയ വർക്കല, കഴക്കൂട്ടം, വട്ടിയൂർക്കാവ് സീറ്റുകളിൽ അവർ വിജയിച്ചിരുന്നു. എന്നാൽ കോൺഗ്രസിന് ഈ മേഖലകളിൽ തിരിച്ചടി നേരിട്ടു.
​ചിറയിൻകീഴ് സംവരണ മണ്ഡലത്തിലും ഇത്തവണ വിജയസാദ്ധ്യതയുള്ള പുതുമുഖങ്ങളെ ഇറക്കണമെന്ന് ആവശ്യം ശക്തമാണ്. കെ.പി.സി.സി അംഗം ജി. ലീനയും സീറ്റിനായി രംഗത്തുണ്ട്.
​ഇന്നലെ വൈകിട്ട് ചേർന്ന നിർണ്ണായക യോഗത്തിൽ കെ.പി.സി.സി പ്രസിഡന്റ് സണ്ണി ജോസഫ്, പ്രതിപക്ഷ നേതാവ് വി.ഡി. സതീശൻ, രമേശ് ചെന്നിത്തല എന്നിവർ പങ്കെടുത്തു. ഹൈക്കമാൻഡ് ഇടപെടലോടെ പിന്നാക്ക വിഭാഗങ്ങൾക്ക് അർഹമായ സീറ്റുകൾ ലഭിക്കുമെന്ന പ്രതീക്ഷയിലാണ് പ്രവർത്തകർ.